Zëvendëspresidenti amerikan, JD Vance, duket se ka nisur përpjekjet për t’u distancuar politikisht nga presidenti Donald Trump, pas humbjes së republikanëve në zgjedhjet e mesmandatit, me synimin për të ruajtur shanset e tij për të qenë kandidat i partisë në zgjedhjet presidenciale të vitit 2028.
Në një reagim të publikuar të mërkurën në platformën X, Vance kritikoi strategjinë zgjedhore të republikanëve dhe mesazhet e tyre ekonomike, duke argumentuar se partia kishte humbur kontaktin me shqetësimet e qytetarëve për rritjen e kostos së jetesës.
Deklarata më e drejtpërdrejtë e tij ishte “arsyeja pse humbëm është lufta”, duke iu referuar konfliktit në Iran dhe ndikimit të tij në rritjen e çmimeve të karburanteve, shkruan cnn.
Vance paraqiti edhe katër hapa që, sipas tij, mund t’i rikthejnë votuesit në anën e republikanëve – përfundimin e luftës, përqendrimin te kostoja e jetesës dhe inflacioni, vendosjen e interesave amerikane në plan të parë dhe ndryshimin e marrëdhënieve me Izraelin.
Reagimi i tij shihet edhe si një përpjekje për t’iu afruar krahut izolacionist të lëvizjes MAGA, të përfaqësuar nga komentatori Tucker Carlson, i cili mbështeti Trumpin pikërisht për shkak të premtimeve për t’i dhënë fund përfshirjes amerikane në luftëra të huaja.
Ndërkohë, pas humbjes së republikanëve, mbetet e paqartë nëse Vance dhe zyrtarët e tjerë të administratës Trump, përfshirë sekretarin e Shtetit, Marco Rubio, do të arrijnë të distancohen nga lufta në Iran gjatë fushatës presidenciale të vitit 2028.
Reagimi i Vance vjen në një kohë kur kanë nisur diskutimet për garën e ardhshme presidenciale, ndonëse kanë mbetur edhe dy vjet deri në zgjedhjet e vitit 2028. /Telegrafi/