Gjykata e Apelit e Kosovës ia ka vërtetuar Astrit Zogjanit dënimin prej 3 vjetësh e 6 muajsh burgim për përvetësim në detyrë dhe keqpërdorim të pozitës apo autoritetit zyrtar. Ankesa e mbrojtjes është aprovuar pjesërisht, vetëm për mënyrën dhe afatin e pagesës së gjobës prej 5 mijë eurosh, raporton Gazeta Sinjali.
Sipas aktgjykimit të Departamentit Special të Apelit, të marrë më 9 tetor 2026, Zogjani do ta paguajë gjobën në pesë këste, brenda pesë muajve nga marrja e aktgjykimit. Secili këst duhet të paguhet jo më vonë se data 10 e muajit vijues. Mospagesa në kohë sjell revokimin e mundësisë së pagesës me këste.
Në pjesën tjetër, Apeli e ka refuzuar si të pabazuar ankesën e avokatit Faton Hyseni dhe e ka vërtetuar aktgjykimin e Gjykatës Themelore në Prishtinë, të 14 majit 2026.
Mbetet detyrimi për kompensimin e dëmit dhe ndalimi i ushtrimit të funksioneve publike
Përveç burgimit dhe gjobës, Zogjani është obliguar t’ia kompensojë ndërmarrjes së dëmtuar, të identifikuar në aktgjykim si N.P.L. “P. R.” Sh.A., dëmin prej 107 mijë e 675 euro e 21 centësh.
Kompensimi duhet të bëhet me këste brenda një viti pas mbajtjes së dënimit me burgim, nën kërcënimin e përmbarimit të detyrueshëm.
Në fuqi ka mbetur edhe dënimi plotësues që ia ndalon për katër vjet ushtrimin e funksioneve në administratën publike apo në shërbime publike, pas mbajtjes së burgimit.
Mbrojtja kërkoi uljen e dënimit dhe dënim me kusht
Mbrojtja kishte kërkuar që dënimi unik t’i ulej në një vit burgim dhe më pas të shqiptohej me kusht. Si alternativë, kishte kërkuar zëvendësimin e burgimit me gjobë, me pëlqimin e të akuzuarit.
Avokati kishte përmendur pranimin e fajësisë, pendimin, mungesën e të kaluarës kriminale dhe rrethanat familjare. Sipas mbrojtjes, vazhdimi i punës si kontabilist do t’i mundësonte Zogjanit pagesën e gjobës dhe kompensimin e dëmit.
Vetë Zogjani, gjatë seancës së Apelit, kishte pretenduar se veprën e kishte kryer nën presionin e rrymave të caktuara brenda ndërmarrjes.
Megjithatë, Apeli vlerësoi se dënimi është në përputhje me peshën e veprave dhe shkallën e përgjegjësisë penale. Gjykata theksoi veprimet e vazhdueshme të kundërligjshme dhe dëmin e konsiderueshëm të shkaktuar.
Sipas kolegjit, pranimi i fajësisë ishte vlerësuar si rrethanë lehtësuese nga shkalla e parë, por ai nuk e detyron gjykatën që ta zbusë dënimin nën kufijtë e paraparë me ligj.
Në të njëjtën çështje, Faton Rrustemi ishte dënuar nga shkalla e parë për ndihmë në keqpërdorimin e pozitës apo autoritetit zyrtar, me një vit burgim me kusht, me periudhë verifikimi prej dy vjetësh, si dhe me një mijë euro gjobë. Atij i ishte shqiptuar edhe ndalimi dyvjeçar i ushtrimit të funksioneve në administratën publike apo në shërbime publike.
Shqyrtimi në Apel është bërë sipas ankesës së mbrojtjes së Astrit Zogjanit.
Sinjali – aty ku e vërteta flet para lajmit!
/GazetaSinjali/
Burimi: Sinjali