Kryetari i Malishevës, Ekrem Kastrati, ka deklaruar se komuna po angazhohet për ruajtjen e digës në lumin Mirusha, pasi sipas tij, heqja e saj do të rrezikonte liqenin artificial, peshkimin sportiv dhe florën e faunën.
Kastrati bëri të ditur për emisionin “Fol me Arin”, se komuna synon të bashkëpunojë me Ministrinë e Ambientit për riparimin e digës, e cila është dëmtuar nga vërshimet e fundit dhe paraqet rrezik për banorët që jetojnë pranë saj.
Ai tha se do të kërkojë mirëkuptimin e ministrisë për të mos e larguar digën, por për ta riparuar ose ndërtuar një të re.
“Ne po angazhohemi që ta ruajmë digën dhe liqenin artificial të Mirushës, sepse janë pasuri e madhe e Malishevës dhe simbol i rekreacionit e turizmit. Kemi kërkuar nga Ministria që diga të riparohet ose të ndërtohet një e re, e jo të largohet”, u shpreh Kastrati në Klan Kosova.