Blog

  • OVL-UÇK reagon ndaj deklaratës së Trendafilovës

    OVL-UÇK reagon ndaj deklaratës së Trendafilovës

    Në reagimin e saj, OVL-UÇK thekson se kompetenca për miratimin e ligjeve në Kosovë i takon Kuvendit, ndërsa Dhomat e Specializuara janë themeluar nga ky institucion.

    “Të pretendosh se një gjykatë ka të drejtën e zgjedhjes së ligjit që rregullon veprimtarinë e saj, është jo vetëm e çuditshme, por edhe qesharake”, thuhet në reagimin e organizatës.

    OVL-UÇK vlerëson se Dhomat e Specializuara nuk mund të pretendojnë pushtet mbi institucionin që i ka themeluar. Ajo gjithashtu kundërshton, siç shprehet, qasjen e Trendafilovës ndaj Kuvendit dhe çështjes së sundimit të ligjit.

    “Trendafilova duhet ta dijë se t’i mbash leksione Kuvendit për sundimin e ligjit, përderisa e trajton interpretimin personal si të padiskutueshëm, është arrogancë”, thuhet në reagim.

    Organizata e Veteranëve të Luftës së UÇK-së thekson se kritikat ndaj vendimeve gjyqësore janë e drejtë legjitime dhe se do të vazhdojë të shprehë qëndrimet e saj lidhur me proceset që zhvillohen në Dhomat e Specializuara.

    “Kritika ndaj vendimeve gjyqësore është e drejtë legjitime dhe nuk do të heqim dorë prej saj. Asnjë vendim gjyqësor nuk mund ta fshijë të vërtetën se Lufta Çlirimtare ishte e drejtë”, thuhet më tej në deklaratë.

    Në reagimin e saj, OVL-UÇK rikujton sakrificën e atyre që u ngritën kundër gjenocidit dhe thekson se shtetësia e Kosovës qëndron mbi këtë sakrificë. Sipas organizatës, gjykatat duhet të përqendrohen në mandatin e tyre juridik dhe të mos shndërrohen në institucione që përcaktojnë historinë.

    “Gjykatat asnjëherë nuk duhet të shndërrohen në institute historie, por duhet që me dinjitet e profesionalizëm ta kryejnë punën për të cilën janë mandatuar”, thuhet në reagim.

    Në përfundim, OVL-UÇK shpreh pakënaqësi me punën e Dhomave të Specializuara, duke pretenduar se në veprimtarinë e tyre kanë munguar dinjiteti dhe profesionalizmi.

    Deri në publikimin e këtij lajmi, në materialin e vënë në dispozicion nuk përfshihet një reagim i Trendafilovës ndaj deklaratave të OVL-UÇK-së.

    Burimi: RTKLive

  • Haxhiu takon Wylita Bell, në fokus forcimi i partneritetit Kosovë–SHBA

    Haxhiu takon Wylita Bell, në fokus forcimi i partneritetit Kosovë–SHBA

    Kryetarja e Kuvendit të Kosovës, Albulena Haxhiu, ka zhvilluar një takim me të Ngarkuarën me Punë të Ambasadës së Shteteve të Bashkuara të Amerikës në Kosovë, Wylita Bell, ku në fokus ishte bashkëpunimi ndërmjet dy vendeve.

    Gjatë takimit u diskutuan prioritetet e Kuvendit në legjislaturën e njëmbëdhjetë, si dhe mundësitë për forcimin e mëtejshëm të bashkëpunimit me institucionet amerikane.

    Haxhiu theksoi rëndësinë e partneritetit me Shtetet e Bashkuara, duke e cilësuar atë si thelbësor për avancimin e Kosovës drejt integrimit euroatlantik.

    Ajo gjithashtu shprehu mirënjohje për mbështetjen e vazhdueshme që SHBA-ja i ka dhënë Kosovës ndër vite, duke nënvizuar rëndësinë e ruajtjes dhe thellimit të marrëdhënieve mes dy vendeve.

    Burimi: RTKLive

  • Haxhiu takohet me përfaqësuesen e SHBA-së, diskuton thellimin e bashkëpunimit

    Haxhiu takohet me përfaqësuesen e SHBA-së, diskuton thellimin e bashkëpunimit

    Kryetarja e Kuvendit të Kosovës, Albulena Haxhiu, ka pritur në takim të Ngarkuarën me Punë të Ambasadës së Shteteve të Bashkuara të Amerikës në Kosovë, Wylita Bell.

    Gjatë takimit u diskutuan prioritetet e Kuvendit në legjislaturën e njëmbëdhjetë dhe mundësitë për thellimin e bashkëpunimit me institucionet amerikane.

    “SHBA-ja mbetet aleati ynë strategjik, ndërsa partneriteti ynë me të është thelbësor për avancimin e rrugës euroatlantike të Kosovës”, ka deklaruar Haxhiu.

    Ajo u shpreh falënderuese për mbështetjen që ShBA-ja i ka dhënë Kosovës ndër vite.

    Burimi: Dukagjini

  • Ngritet aktakuzë ndaj 12 personave për krim të organizuar në vlerë 4.6 milionë€

    Ngritet aktakuzë ndaj 12 personave për krim të organizuar në vlerë 4.6 milionë€

    “Sipas aktakuzës, të pandehurit F.M., F.M., K.V., F.V., S.K., N.B., D.M., A.M., M.M., N.M., G.Q. dhe S.M. kanë vepruar në bashkëpunim gjatë periudhës nga janari i vitit 2021 deri në dhjetor të vitit 2025, përmes një skeme mashtrimi që përfshinte importimin e derivateve të naftës, përdorimin e autoboteve të modifikuara, faturimin e transaksioneve të dyshuara fiktive, si dhe deklarimin e pasaktë të qarkullimit dhe të detyrimeve tatimore, duke i ka shkaktuar buxhetit të shtetit dëm në vlerë prej 4,637,893.69 eurosh”, thuhet në komunikatën për media.

    Veprat penale për të cilat akuzohen janë “Pjesëmarrja ose organizimi i grupit kriminal të organizuar, lidhur me veprat penale “Mashtrimi” dhe “Shmangia nga tatimi”, “Mbajtja në pronësi, kontroll ose posedim të paautorizuar të armëve”, “Falsifikimi i parasë”, “Përdorimi i armës apo mjetit të rrezikshëm” dhe “Shpëlarja e parave”.

    Burimi: RTKLive

  • OVL e UÇK-së kritikon Trendafilovën: Është arrogancë t’i mbash leksione Kuvendit për sundimin e ligjit

    OVL e UÇK-së kritikon Trendafilovën: Është arrogancë t’i mbash leksione Kuvendit për sundimin e ligjit

    Organizata e Veteranëve të Luftës së Ushtrisë Çlirimtare të Kosovës (OVL-UÇK) ka reaguar ndaj deklarimeve të kryetares së Dhomave të Specializuara të Kosovës në Hagë, Ekaterina Trendafilova, duke kritikuar qasjen e saj ndaj ligjeve dhe institucioneve të Kosovës.

    Në reagimin e publikuar, OVL-UÇK ka kundërshtuar pretendimet e paraqitura në komunikatën e Trendafilovës lidhur me ligjin që rregullon veprimtarinë e kësaj gjykate.

    Sipas organizatës, ligjet në Kosovë miratohen nga Kuvendi, ndërsa Dhomat e Specializuara janë krijuar po nga ky institucion.

    “Të pretendosh se një gjykatë ka të drejtën e zgjedhjes së ligjit që rregullon veprimtarinë e saj, është jo vetëm e çuditshme, por edhe qesharake. Këto pretendime i lexuam në komunikatën e znj. Trendafilova.

    Zonja në fjalë, duhet të dijë se në Kosovë, ligjet i miraton Kuvendi. Vet Dhomat e Specializuara ekzistojnë sepse u krijuan nga Kuvendi, andaj ato nuk kanë pushtet mbi institucionin që i themeloi.

    Trendafilova duhet ta dijë se t’i mbash leksione Kuvendit për sundimin e ligjit, përderisa e trajton interpretimin personal si të padiskutueshëm, është arrogancë. Kritika ndaj vendimeve gjyqësore është e drejtë legjitime dhe nuk do të heqim dorë prej saj. Asnjë vendim gjyqësor nuk mund ta fshijë të vërtetën se Lufta Çlirimtare ishte e drejtë.

    Lirinë e Kosovës e fituan ata që u ngritën kundër gjenocidit, dhe shtetësia e Kosovës qëndron mbi sakrificën e tyre. Andaj, gjykatat asnjëherë nuk duhet të shndërrohen në institute historie, por duhet që me dinjitet e profesionalizëm ta kryejnë punën për të cilën janë mandatuar. Fatkeqësisht, në rastin e Dhomave të Specializuara kanë munguar që të dyja, edhe dinjiteti, edhe profesionalizmi”, thuhet në reagim.

    Burimi: Dukagjini

  • UBT organizon Konferencën më të madhe shkencore për Mjekësinë Sportive, me pjesëmarrjen e profesionistëve botërorë

    UBT organizon Konferencën më të madhe shkencore për Mjekësinë Sportive, me pjesëmarrjen e profesionistëve botërorë

    UBT do të mirëpresë më 21 tetor, Konferencën e Dytë Ndërkombëtare për Mjekësinë Sportive – ICSM 2026, e cila do të bëjë bashkë profesionistë shëndetësorë, hulumtues, akademikë dhe ekspertë të sportit për të diskutuar zhvillimet e reja në mjekësinë sportive, inovacionin dhe qëndrueshmërinë në praktikën klinike dhe sportive.

    Konferenca, e organizuar nga Instituti për Mjekësi Sportive i UBT-së, në bashkëpunim me International Federation of Sports Medicine (FIMS), SHAPE Project – Sport, Health, and the People dhe Kosovo Association of Sports and Exercise Medicine (KASEM), në Parkun Shkencor, Inovativ dhe Teknologjik të UBT-së, do të zhvillohet nën temën “Innovation and Resilience in Sport Medicine”, duke krijuar një platformë për shkëmbimin e njohurive shkencore, përvojave profesionale dhe praktikave bashkëkohore në këtë fushë.

    Në kuadër të konferencës do të trajtohen tema me rëndësi për zhvillimin e mjekësisë sportive, përfshirë shëndetin funksional, radiologjinë, ortopedinë, teknologjitë e veshshme (wearable technologies), inteligjencën artificiale dhe mundësitë që sjell inovacioni teknologjik në përmirësimin e kujdesit shëndetësor dhe performancës sportive.

    Konferenca synon të forcojë bashkëpunimin ndërmjet komunitetit akademik, profesionistëve shëndetësorë dhe sektorit sportiv, duke nxitur diskutimin mbi qasjet e reja shkencore dhe zbatimin e tyre në praktikë.

    Konferenca është e akredituar nga Oda e Mjekëve të Kosovës (OMK), në kuadër të Edukimit të Vazhdueshëm Profesional (EVP).

    Për më shumë informata rreth programit, të interesuarit mund të vizitojnë: LINKU.

    Burimi: Dukagjini

  • Juve në krizë rezultatesh, Spalletti nën presion para sfidave vendimtare

    Juve në krizë rezultatesh, Spalletti nën presion para sfidave vendimtare

    Pas shtatë javësh, bardhezinjtë kanë grumbulluar vetëm 11 pikë, një më pak sesa në të njëjtën periudhë të sezonit të kaluar.

    Skuadra torineze ka regjistruar dy humbje, ndaj Lazios dhe Sassuolos, ndërsa tashmë ndodhet tetë pikë prapa dyshes kryesuese, Interit dhe Lazios. Këto rezultate kanë shtuar presionin mbi stafin teknik, pasi pritshmëritë për një skuadër me ambicie të mëdha mbeten dukshëm më të larta.

    Krahasimi me sezonin e kaluar është edhe më domethënës, pasi në atë periudhë Juventusi drejtohej nga Igor Tudor. Nën drejtimin e trajnerit kroat, bardhezinjtë kishin grumbulluar 12 pikë në shtatë javët e para dhe ndodheshin vetëm katër pikë larg kreut, që në atë kohë mbahej nga Milani.

    Pikërisht në javën e tetë, Tudor u shkarkua nga drejtuesit e klubit, një ditë pas humbjes 1-0 ndaj Lazios në stadiumin “Olimpico”. Në vend të tij erdhi Luciano Spalletti, i cili tani përballet me një situatë të vështirë, teksa rezultatet e skuadrës nuk po përmbushin pritshmëritë.

    Për momentin, drejtuesit e Juventusit kanë vendosur të vazhdojnë bashkëpunimin me Spallettin. Megjithatë, kjo nuk nënkupton se trajneri gëzon besim të pakushtëzuar. Klubi pret që ai të gjejë zgjidhjet e duhura për të rikthyer skuadrën në rrugën e fitoreve dhe për të përmirësuar paraqitjet në fushë.

    Ndeshjet e ardhshme ndaj Rennes, Lecces dhe Genoas pritet të jenë veçanërisht të rëndësishme për trajnerin italian. Përtej rezultateve dhe ndikimit të tyre në klasifikim, këto përballje do të shërbejnë edhe për të vlerësuar aftësinë e Spallettit për të nxjerrë maksimumin nga grupi i lojtarëve që ka në dispozicion.

    Juventusi vazhdon të ketë objektiva të rëndësishëm si në arenën evropiane, ashtu edhe në Serie A, ku synon të sigurojë një vend në zonën e Ligës së Kampionëve. Për këtë arsye, përmirësimi i rezultateve është i domosdoshëm, në mënyrë që skuadra të mos e vështirësojë më tej rrugën drejt objektivave sezonale.

    Tashmë, sfida kryesore për Spallettin është të dëshmojë se mund ta rikthejë Juventusin në nivelin e kërkuar. Ndeshjet e radhës mund të jenë përcaktuese për ecurinë e skuadrës dhe për besimin që drejtuesit kanë te projekti i tij.

    Burimi: RTKLive

  • Çitaku-Trendafilovës: Nën drejtimin tuaj, Specialja e ka cenuar rëndë besimin në drejtësi

    Çitaku-Trendafilovës: Nën drejtimin tuaj, Specialja e ka cenuar rëndë besimin në drejtësi

    Sekretarja e Përgjithshme e Partisë Demokratike të Kosovës, Vlora Çitaku, ka reaguar ndaj kryetares së Dhomave të Specializuara të Kosovës në Hagë, Ekaterina Trendafilova, duke kritikuar mënyrën e drejtimit të kësaj gjykate dhe duke kërkuar më shumë transparencë dhe llogaridhënie.

    Përmes një reagimi publik, Çitaku ka vlerësuar se një video-adresim pa mundësi për pyetje nga gazetarët nuk u jep përgjigje shqetësimeve të ngritura ndër vite lidhur me punën e Gjykatës Speciale.

    “Nën drejtimin tuaj, Specialja e ka cenuar rëndë besimin në drejtësi. Një proces i padrejtë, mungesë transparence, llogaridhënie e pamjaftueshme dhe mangësi serioze në mbikëqyrje. Shqetësimet e ekspertëve ndërkombëtarë për barazinë e palëve, shkeljen e të drejtave të njeriut dhe monitorimin e pavarur kërkojnë përgjigje konkrete. Ju na ofroni deklarata vetëlavdëruese”, ka shkruar nënkryetarja e Kuvendit.

    “Pavarësia nuk ju vendos mbi ligjin. Prejardhja ndërkombëtare e gjyqtarëve nuk është certifikatë pagabueshmërie”, ka shkruar Çitaku, duke kërkuar që Trendafilova të përballet me gazetarët dhe t’u përgjigjet pyetjeve të vështira.

    Sipas saj, kritikat ndaj Gjykatës Speciale nuk mund të cilësohen thjesht si dezinformim, por duhet të marrin përgjigje konkrete dhe të trajtohen me seriozitet.

    Çitaku ka theksuar gjithashtu se përgjegjësia për mënyrën e drejtimit të gjykatës bie edhe mbi kryetaren e saj, duke kërkuar llogaridhënie për vendimet dhe funksionimin e institucionit.

    Deputetja ka bërë të ditur se Kosova do të vazhdojë të mbështesë mbrojtjen e ish-krerëve të UÇK-së në procesin e apelit dhe do të kundërshtojë, sipas saj, çdo padrejtësi përmes mjeteve ligjore dhe institucionale.

    “Kërkojmë drejtësi për çlirimtarët! Sepse padrejtësia nuk bëhet drejtësi vetëm pse shqiptohet në Hagë”, ka shkruar ajo.

    Burimi: Dukagjini