Blog

  • Vaud krijon listë të zezë për edukatorët e ndaluar të punojnë me fëmijët

    Vaud krijon listë të zezë për edukatorët e ndaluar të punojnë me fëmijët

    Kantoni Vaud në Zvicër do të krijojë një regjistër me personat të cilëve u ndalohet puna në institucionet e kujdesit për fëmijët. Nisma, e cila synon të forcojë mbrojtjen e fëmijëve dhe të parandalojë që personat me sjellje problematike të punësohen në institucione të tjera, u miratua unanimisht nga Këshilli i Madh.

    Kantoni Vaud do të krijojë një regjistër të personave të ndaluar të punojnë në institucionet e kujdesit për fëmijët. Propozimi i deputetit të Partisë së Gjelbër, Yannick Maury, për krijimin e një liste në nivel kantonal, apo edhe në gjithë Zvicrën frankofone, u miratua të martën.

    Anëtarët e Këshillit të Madh votuan unanimisht që propozimi të shqyrtohet menjëherë, pa iu referuar një komisioni për shqyrtim. Qeveria kantonale ka një vit kohë për të paraqitur një propozim konkret dhe për të përgatitur bazën ligjore.

    Nisma kishte mbledhur më herët rreth 60 nënshkrime nga përfaqësues të spektrit të gjerë politik, rapoton Swissinfo.

    Propozimi i kërkon qeverisë të veprojë me shpejtësi për krijimin e një regjistri në Vaud me personat të cilëve u ndalohet të punojnë në kujdesin për fëmijët e vegjël. Në të njëjtën kohë, kërkohet që të shqyrtohet mundësia e koordinimit me kantonet e tjera të Zvicrës frankofone, me synim krijimin e një regjistri ndërkantonal.

    Qëllimi është që një person i ndaluar të punojë me fëmijë të vegjël të mos mund ta anashkalojë ndalimin duke ndryshuar punëdhënësin ose duke u zhvendosur në një kanton tjetër.

    Rasti në St-Sulpice rikthen në vëmendje masat e kontrollit

    Debati për masat e mbrojtjes së fëmijëve u rikthye në qendër të vëmendjes pas arrestimit në St-Sulpice, në kantonin Vaud, të një kujdestari të dyshuar për prekje të papërshtatshme ndaj një fëmije të vogël, transmeton Telegrafi.

    Prindërit e fëmijës, të cilët kanë zgjedhur të mbeten anonimë, folën për rastin në emisionin informativ të RTS-së.

    Babai tha se ngjarja ka nxjerrë në pah kufizimet e sistemit aktual të kontrollit.

    “Është urgjente që t’i mbrojmë më mirë këta fëmijë. Ne përjetuam një situatë ku, në fund, një person arriti të kalojë nëpër të gjitha barrierat e kontrollit. Për ne, këto barriera duhet të forcohen”, tha ai.

    Nëna e fëmijës së dyshuar si viktimë tha se një sistem që regjistron personat me histori të sjelljeve problematike do të ndihmonte në mbrojtjen e fëmijëve.

    “Një listë e tillë është e domosdoshme. Kushdo që ka një histori të sjelljeve problematike duhet të raportohet. Në rastin tonë, nuk është vetëm trauma e një personi; është një familje e tërë që është traumatizuar. Çdo prind ka frikë se mund të gjendet në një situatë të tillë”, tha ajo.

    Një regjistër i tillë do të synonte veçanërisht të parandalonte që një person që konsiderohet rrezik të punësohej në një institucion tjetër ose në një kanton tjetër të Zvicrës frankofone.

    Regjistri nuk mjafton, kërkohet më shumë parandalim

    Laurie Willommet, kryetare e komunës së Vevey-t dhe presidente e organizatës që përfaqëson rrjetet e kujdesit ditor në kantonin Vaud, e ka përshëndetur vendimin, duke e konsideruar të nevojshëm.

    Megjithatë, sipas saj, një regjistër i tillë nuk do të mjaftojë i vetëm për të garantuar sigurinë e fëmijëve.

    Ajo kërkon më shumë trajnime për stafin, masa parandaluese dhe ndërgjegjësim të fëmijëve. Sipas saj, duhet të përmirësohen dhe të harmonizohen edhe procedurat për raportimin e rasteve të dyshimta.

    Debati për një regjistër në nivel federal

    Çështja është ngritur edhe në nivel federal të Zvicrës.

    Në qershor është paraqitur një mocion që kërkon krijimin e një “liste të zezë” kombëtare për personat e përfshirë në raste abuzimi seksual në institucionet e kujdesit jashtë familjes.

    Megjithatë, Këshilli Federal rekomandon që mocioni të refuzohet, duke argumentuar se duhet të pritet një raport më i gjerë për abuzimet seksuale ndaj të miturve, i cili pritet të publikohet deri në fund të vitit 2027.

    Deputetja e së majtës radikale, Joëlle Minacci, i ka propozuar qeverisë që ta zgjerojë nismën përtej kujdesit ditor, në mënyrë që mbrojtja të përfshijë të gjitha institucionet e kujdesit jashtë familjes.

    Këshilltarja e Shtetit, Nuria Gorrite, ka deklaruar se qeveria e mbështet mocionin dhe ka falënderuar deputetët që e kanë nënshkruar atë.

    Ajo është shprehur gjithashtu në favor të zgjerimit të masave për mbrojtjen e të gjithë fëmijëve, dhe jo vetëm atyre që qëndrojnë në institucionet e kujdesit ditor.

    “Një platformë kantonale është mirë, por një platformë federale do të ishte edhe më mirë, sepse abuzimi seksual ndaj fëmijëve nuk ndalet në kufijtë kantonalë”, ka theksuar ajo./Telegrafi/

  • Kryebashkiaku i Izmirit i bashkohet partisë së Erdoganit, tronditet opozita turke

    Kryebashkiaku i Izmirit i bashkohet partisë së Erdoganit, tronditet opozita turke

    Kryebashkiaku i Izmirit, Cemil Tugay, është larguar nga kampi opozitar dhe i është bashkuar të mërkurën Partisë për Drejtësi dhe Zhvillim (AK Parti) të presidentit Recep Tayyip Erdoğan, në një lëvizje që ka shkaktuar reagime të forta në opozitën turke.

    Tugay, i cili në zgjedhjet lokale të vitit 2024 fitoi Izmirin si kandidat i Partisë Republikane Popullore (CHP) me një diferencë prej rreth 314 mijë votash, mori simbolin e AK Partisë nga presidenti Erdoğan gjatë një ceremonie në selinë e partisë në Ankara.

    Me këtë lëvizje, partia në pushtet siguroi kryetarin e bashkisë së një qyteti që nuk ka arritur ta fitojë në zgjedhje në tre raste radhazi. Izmiri, qyteti i tretë më i madh i Turqisë, është qeverisur nga kryebashkiakë të qendrës së majtë ose të majtë që nga viti 1999.

    Në zgjedhjet lokale të marsit 2024, Tugay fitoi 48.97 për qind të votave, ndërsa kandidati i AK Partisë, Hamza Dağ, mori 37.06 për qind. Diferenca mes tyre ishte rreth 314 mijë vota.

    Erdoğan e mirëpriti Tugayn edhe gjatë fjalimit të tij para deputetëve, në hapjen e vitit të ri parlamentar.

    “Izmiri është ndryshe sot. Shumë entuziast”, tha Erdoğan, transmeton Telegrafi.

    Ndërsa Tugay u tha gazetarëve: “Gjërat e mira e presin Izmirin”.

    Kalimi i Tugayt në AK Parti është veçanërisht i bujshëm për shkak të deklaratave të tij të mëparshme. Në gusht të vitit 2025, ai kishte thënë se nuk kishte “as edhe një mundësi në një milion” që t’i bashkohej partisë së Erdoganit, duke shtuar se një kryebashkiak i zgjedhur nga CHP nuk kishte të drejtë të ndryshonte parti.

    “E gjej këtë shumë të turpshme. Unë nuk jam ai lloj personi”, kishte deklaruar ai.

    Në janar, Tugay i kishte thënë medias T24 se nëna e tij i kishte thënë se do ta hiqte nga trashëgimia familjare, ndërsa bashkëshortja do të divorcohej prej tij nëse ai do t’i bashkohej AK Partisë.

    Tugay u largua nga CHP-ja në qershor, pas një vendimi gjyqësor që riktheu Kemal Kılıçdaroğlun në krye të partisë, dhe për rreth tre muaj vazhdoi të shërbente si kryebashkiak i pavarur.

    Në atë periudhë, shumë vëzhgues prisnin që ai t’i bashkohej Partisë së Re (YENİ), të themeluar nga ish-kreu i CHP-së, Özgür Özel. Por kjo nuk ndodhi.

    Në gusht, Tugay deklaroi se bashkimi me cilëndo parti ishte “jashtë diskutimit”.

    “Do të mbetem i pavarur. E kam thënë shumë herë se do të qëndroj i pavarur, por në të vërtetë jam i shqetësuar që kjo vazhdon të diskutohet çdo ditë”, kishte thënë ai.

    Megjithatë, më 30 shtator, Tugay u takua me presidentin Erdoğan në kompleksin presidencial në Ankara. Dy ditë më vonë, ai dha dorëheqjen nga Shoqata e Mendimit Ataturkist dhe Shoqata e Demokracisë Sociale.

    Një ditë para njoftimit zyrtar, AK Parti publikoi një video ku një rrugë e mbushur me mbeturina shfaqej duke u pastruar dhe më pas mbuluar me lule. Në sfond dëgjohej një këngë patriotike turke për Izmirin, ndërsa në fund të videos shfaqej data 7 tetor 2026, pa u përmendur drejtpërdrejt emri i Tugayt.

    Kalimi i tij ka shkaktuar reagime të ashpra në opozitë. Kreu i Partisë së Re, Özgür Özel, tha se Tugay ishte përballur me “kërcënime, shantazh dhe presion”, ndërsa deklaroi se AK Parti “nuk e ka fituar kurrë Izmirin në zgjedhje dhe nuk do ta fitojë”.

    “Kjo nuk është diçka që mund ta arrini me taktika të marrjes dhe ikjes”, i tha Özel presidentit Erdoğan.

    Zëdhënësi i Partisë së Re, Zeynel Emre, tha se kalimet e politikanëve nga një parti në tjetrën nuk mund të shqyrtohen të shkëputura nga procedurat gjyqësore ndaj kryebashkiakëve të opozitës.

    Megjithatë, kalimi i Tugayt në AK Parti nuk i jep kësaj partie kontrollin mbi këshillin bashkiak të Izmirit. Partia e Re mbetet grupi më i madh me 91 anëtarë, ndërsa AK Parti ka 39 vende dhe të pavarurit 11.

    Tugay iu bashkua CHP-së në vitin 2010, ndërsa në vitin 2019 u zgjodh kryebashkiak i distriktit Karşıyaka. Në vitin 2024, ai u zgjodh kryebashkiak i Bashkisë Metropolitane të Izmirit.

    Me kalimin në AK Parti, Tugay bëhet kryebashkiaku i parë i krahut të djathtë në Izmir pas 27 vitesh, duke i dhënë partisë së Erdoganit një fitore politike përmes një kalimi partiak, në një qytet ku nuk ka arritur ta marrë pushtetin përmes zgjedhjeve. /Telegrafi/

  • Gazetari i njohur zbulon ndëshkimin e mundshëm drastik me të cilin përballet Man City

    Gazetari i njohur zbulon ndëshkimin e mundshëm drastik me të cilin përballet Man City

    Manchester City mund të perballet me një ndëshkim të madh, i cili mund ta shkund përfundimisht të ardhmen e klubit anglez.

    Sipas gazetarit Duncan Castles, Manchester City mund të përballet me përjashtim nga Liga Premier dhe madje edhe me heqjen e pronësisë së Abu Dhabit nëse mosmarrëveshja e tyre me ligën përshkallëzohet më tej.

    Duke folur në podkastin The Transfers, Castles raporton se sanksionet e mundshme mund të përfshijnë refuzimin e EFL-së për të pranuar Cityn në asnjë nga divizionet e saj, gjë që do ta linte klubin jashtë ligave profesionale të Anglisë.

    Ai gjithashtu pretendon se largimi i pronarëve, drejtorëve dhe drejtuesve të klubit mund të konsiderohet si pjesë e ndëshkimit.

    Pretendimet vijnë pasi një komision i pavarur e shpalli Cityn fajtor për 114 nga 115 shkelje të rregullave financiare midis viteve 2009 dhe 2018.

    City ka mohuar shkeljet dhe ka apeluar vendimin, ndërsa ende nuk janë njoftuar sanksione përfundimtare. /Telegrafi/

  • Justina Shiroka-Pula zgjidhet presidente e Kosovës, si raportuan mediat e rajonit dhe ato ndërkombëtare?

    Justina Shiroka-Pula zgjidhet presidente e Kosovës, si raportuan mediat e rajonit dhe ato ndërkombëtare?

    Kuvendi i Kosovës ka zgjedhur ekonomisten dhe akademiken Justina Shiroka-Pula presidente të Republikës, në një votim të zhvilluar në orët e para të së mërkurës, vetëm pak para skadimit të afatit kushtetues. Me zgjedhjen e saj, Kosova shmangu shpërndarjen e Kuvendit dhe organizimin e zgjedhjeve të reja parlamentare, shkruajnë Reuters dhe Associated Press

    Shiroka-Pula mori 81 vota nga 120 deputetë, vetëm një votë më shumë se minimumi i nevojshëm prej 80 votash. Sipas RFE/RL, votimi i fshehtë nisi vetëm gjashtë minuta para mesnatës, ndërsa procesi përfundoi 12 minuta pas mesnate. Megjithatë, zgjedhja e saj e shmangu shpërndarjen automatike të Kuvendit dhe një tjetër palë zgjedhjesh të parakohshme, transmeton Telegrafi.

    Zgjedhja e presidentes ishte rezultat i një marrëveshjeje të minutës së fundit mes Lëvizjes Vetëvendosje të kryeministrit Albin Kurti dhe Partisë Demokratike të Kosovës (PDK). Marrëveshja u lidh me miratimin e ndryshimeve ligjore që kufizojnë kompetencat e Dhomave të Specializuara në Hagë, shkruan Reuters.

    Një nga detajet më të pazakonta të procesit ishte se Justina Shiroka-Pula e kishte mësuar se ishte kandidate për presidente gjatë një lidhjeje të drejtpërdrejtë në TV Dukagjini, sipas materialit të Al Jazeera Balkans. Pak kohë më pas, Kuvendi e zgjodhi atë në krye të shtetit.

    Emri i saj u propozua nga Kurti në orët e vona të së martës, ndërsa kryetari i PDK-së, Bedri Hamza, e pranoi kandidaturën dhe propozoi Eliza Hoxhën si kandidate kundërshtare. Sipas RFE/RL, Shiroka-Pula ishte më herët anëtare e PDK-së, ndërsa Hamza pranoi kandidaturën e saj në kuadër të marrëveshjes që zhbllokoi procesin, shkruan RFE/RL

    Para votimit për presidenten, Kuvendi miratoi me 88 vota ndryshimet në ligjin për Dhomat e Specializuara të Kosovës. Sipas RFE/RL, ndryshimet kufizojnë juridiksionin e gjykatës, vendosin një tavan prej 15 vitesh për dënimet me burgim, parashohin që dënimet të vuhet në Kosovë dhe u hapin mundësinë personave me aktgjykime të formës së prerë që të jenë subjekt i faljeve presidenciale. RFE/RL

    Ndryshimet parashohin gjithashtu ngushtimin e periudhës kohore të mbuluar nga gjykata në periudhën nga 1 korriku 1999 deri më 31 dhjetor 2000, si dhe kufizimin e juridiksionit për vepra të lidhura drejtpërdrejt me pretendimet për trafikim organesh në disa qendra paraburgimi të identifikuara në raportin e Këshillit të Evropës të vitit 2011. Ekspertët juridikë kanë paralajmëruar se ndryshimet mund të përballen me shqyrtim kushtetues dhe se Kosova duhet të respektojë detyrimet e saj ndërkombëtare, shkruan RFE/RL

    Marrëveshja politike erdhi pas një dite të gjatë përplasjesh mes Vetëvendosjes dhe PDK-së. Sipas RFE/RL, përparimi u arrit pas ofertës së tretë të Kurtit, e cila përfshinte kandidaturën e Shiroka-Pulës dhe votimin e ndryshimeve për Dhomat e Specializuara para zgjedhjes së presidentes, u tha ndër tjera nga RFE/RL

    Zgjedhja e Shiroka-Pulës u zhvillua në një atmosferë të tensionuar, pas protestave të zhvilluara kundër ndryshimeve në ligjin për Dhomat e Specializuara. Më 5 tetor, policia përdori gaz lotsjellës dhe ujëhedhës për të shpërndarë protestuesit jashtë Kuvendit. Sipas Reuters, të paktën 17 persona u lënduan, përfshirë gjashtë pjesëtarë të policisë, ndërsa tre protestues u ndaluan, transmeton Telegrafi.

    Tensionet u përshkallëzuan pas vendimit të Dhomave të Specializuara më 16 shtator, me të cilin ish-presidenti Hashim Thaçi dhe tre ish-krerë të tjerë të UÇK-së u dënuan. Sipas RFE/RL, Thaçi dhe Jakup Krasniqi u dënuan me nga 25 vjet burgim, Kadri Veseli me 18 vjet, ndërsa Rexhep Selimi me 13 vjet. Të katër të dënuarit janë duke e apeluar vendimin.

    Shiroka-Pula, e lindur në vitin 1953, është ekonomiste dhe akademike. Ajo ka shërbyer si ministre e Ekonomisë nga viti 2008 deri më 2011, ndërsa më vonë ka qenë deputete e PDK-së. Para zgjedhjes presidente, ajo drejtonte Akademinë e Shkencave dhe të Arteve të Kosovës, shkruajnë Reuters dhe RFE/RL

    Me zgjedhjen e saj, Shiroka-Pula bëhet presidentja e tretë grua e Kosovës që nga pavarësia e vendit. Sipas Associated Press, kandidatura e saj ishte një kompromis i minutës së fundit mes partisë në pushtet dhe PDK-së.

    Posti i presidentes në Kosovë është kryesisht ceremonial, por përfshin kompetenca të rëndësishme në politikën e jashtme dhe rolin e komandantes së përgjithshme të forcave të armatosura. Për më tepër, Shiroka-Pula duhet ta miratojë ligjin që kufizon kompetencat e Dhomave të Specializuara në mënyrë që ai të hyjë në fuqi, shkruan Associated Press

    Pas betimit, Shiroka-Pula deklaroi se e pranonte detyrën “me nder të madh dhe përgjegjësi të plotë”, ndërsa theksoi se mandati i saj nuk i përket vetëm një personi, por qytetarëve, institucioneve dhe shtetit, shkruan Associated Press

    Zgjedhja e saj për momentin e mbyll krizën e gjatë institucionale në Kosovë dhe shmang një proces të ri zgjedhor, ndërsa vëmendja tani pritet të përqendrohet te zbatimi i marrëveshjes politike dhe ndryshimet në ligjin për Dhomat e Specializuara. /Telegrafi/

  • “Gruaja ime e bukur pranë meje”, Travis Barker ndan pamje nga spitali

    “Gruaja ime e bukur pranë meje”, Travis Barker ndan pamje nga spitali

    “Gruaja ime e bukur pranë meje”, Travis Barker ndan pamje nga spitali

    Bateristi i Blink-182, Travis Barker, ka ndarë disa pamje nga spitali, ku shihet i shoqëruar nga vajza e tij, Alabama Barker, dhe bashkëshortja Kourtney Kardashian Barker.

    50-vjeçari publikoi në Instagram Stories një selfie nga shtrati i spitalit me vajzën e tij 20-vjeçare, të cilën e shoqëroi me mesazhin: “Vajza ime erdhi me mua ”.

    Në fotografi, Barker shihet i veshur me rrobën e spitalit dhe kapelën kirurgjikale, ndërsa në krah ka një pajisje për matjen e tensionit. Pamjet sugjerojnë se ai po përgatitej për një ndërhyrje kirurgjikale, shkruan People, transmeton Klankosova.tv.

    Më pas, muzikanti publikoi një tjetër fotografi ku shihet duke shkëmbyer një puthje me Kourtney Kardashian, duke shkruar: “Dhe gruaja ime e bukur pranë meje ”.

    Barker nuk ka bërë të ditur arsyen e saktë të vizitës në spital apo llojin e ndërhyrjes që pritet t’i nënshtrohet.

  • Ia mohoi Kosovës ëndrrën e botërorit, raportohet shkarkimi i Montellas

    Ia mohoi Kosovës ëndrrën e botërorit, raportohet shkarkimi i Montellas

    Ia mohoi Kosovës ëndrrën e botërorit, raportohet shkarkimi i Montellas

    E ardhmja e Vincenzo Montellës në krye të Kombëtares së Turqisë duket e pasigurt, pasi mediat turke kanë raportuar se Federata Turke e Futbollit ka vendosur t’i japë fund bashkëpunimit me trajnerin italian.

    Sipas mediave turke, vendimi për shkarkimin e Montellës tashmë është marrë, ndërsa federata pritet t’i paguajë atij një kompensim në vlerë të pesë pagave mujore.

    Trajneri italian, i cili raportohet se përfiton rreth 183 mijë euro në muaj, pritet kështu të largohet nga posti që e mori në vitin 2023. Megjithatë, deri më tani nuk ka pasur ndonjë konfirmim zyrtar nga Federata Turke e Futbollit.

    Rezultatet e fundit të Kombëtares turke thuhet se kanë ndikuar në këtë vendim. Në shtatë ndeshjet e fundit, duke përfshirë ato në Kupën e Botës dhe në Ligën e Kombeve, Turqia ka regjistruar vetëm një fitore dhe gjashtë humbje.

    Montella do të mbahet mend edhe nga tifozët kosovarë për eliminimin “Dardanëve”, në kualifikimet për Kupën e Botës. Ishte pikërisht Kombëtarja e Turqisë, nën drejtimin e italianit, që e mposhti Kosovën me rezultat 0:1 në stadiumin “Fadil Vokrri”.

    Që nga emërimi i tij në vitin 2023, Montella e ka drejtuar Turqinë në gjithsej 40 ndeshje, përfshirë takimet zyrtare dhe ato miqësore. Gjatë kësaj periudhe, ai ka regjistruar 21 fitore, 14 humbje dhe pesë barazime.

    Pavarësisht rezultateve të arritura gjatë mandatit të tij, seria e dobët e ndeshjeve të fundit duket se ka vënë në pikëpyetje vazhdimësinë e italianit në stolin e Kombëtares turke.

  • Arta Bajrami me kërkesë për institucionet e Kosovës: Projekti për fëmijët me autizëm të jetë ndër të parët në Kuvend

    Arta Bajrami me kërkesë për institucionet e Kosovës: Projekti për fëmijët me autizëm të jetë ndër të parët në Kuvend

    Këngëtarja Arta Bajrami ka ngritur një çështje të rëndësishme përmes një postimi në InstaStory, duke iu drejtuar tashmë presidentes së re Justina Shiroka – Pula dhe institucioneve të Kosovës me një kërkesë që lidhet me fëmijët me nevoja të veçanta.

    Në postimin e saj, Bajrami thekson se tashmë Kosova ka presidente dhe institucionet kanë nisur të funksionalizohen, ndaj sipas saj duhet të ketë hapa konkretë edhe për çështjet që prekin drejtpërdrejt këta fëmijë dhe familjet e tyre.

    “Projekti për fëmijët me nevoja të veçanta (autizmin) të jetë ndër pikat e para të rendit të ditës në Kuvend”, shkruan këngëtarja në mesazhin e publikuar në rrjetet sociale.

    Foto: Instagram

    Ajo kërkon që ky projekt të marrë vëmendje dhe të trajtohet sa më shpejt në institucionin ligjvënës, duke e cilësuar këtë si një çështje që nuk duhet të shtyhet.

    Në fund të postimit, Arta Bajrami ka zgjedhur një mesazh të shkurtër, por të drejtpërdrejtë: “Fëmijët nuk presin”.

    Me këtë reagim, këngëtarja rikthen në vëmendje nevojat e fëmijëve me autizëm dhe nevojat e veçanta, si dhe rëndësinë e mbështetjes institucionale për ta dhe familjet e tyre.

    Kërkesa e saj vjen edhe nga një përvojë personale pasi është nënë e dy fëmijëve me autizëm. /Telegrafi/

  • Piloti rus humb jetën pas rrëzimit me parashutë në Zvicër

    Piloti rus humb jetën pas rrëzimit me parashutë në Zvicër

    Një pilot 53-vjeçar me shtetësi ruse ka humbur jetën të martën në mëngjes, pasi u rrëzua gjatë një fluturimi me parashutë në Unterseen, në kantonin e Bernës.

    Ngjarja ka ndodhur pak para orës 10:00, në zonën e shpatit të synuar të poligonit të qitjes Lehn.

    Sipas të dhënave fillestare të policisë, piloti ka hasur vështirësi gjatë fluturimit, për shkaqe që ende nuk dihen, dhe më pas është rrëzuar, raporton Blick.

    Pavarësisht përpjekjeve për ringjallje nga kalimtarët dhe punonjësit e shpëtimit, shtetasi rus 53-vjeçar ndërroi jetë në vendin e aksidentit për shkak të plagëve të rënda.

    Viktima, i cili banonte në kantonin e Bernës, ishte shtetas rus, sipas një deklarate nga policia kantonale transmeton Telegrafi.

    Në vendngjarje kanë intervenuar njësi të ndryshme të Policisë Kantonale të Bernës, si dhe një ekip i Rega-s (Swiss Air-Rescue).

    Policia kantonale ka nisur hetimet për zbardhjen e rrethanave të aksidentit, nën drejtimin e Zyrës së Prokurorit Federal./Telegrafi/

  • Merino rikthehet në radarin e Real Madridit pas paraqitjes së madhe me Spanjën

    Merino rikthehet në radarin e Real Madridit pas paraqitjes së madhe me Spanjën

    Mikel Merino po rikthehet në qendër të vëmendjes dhe paraqitjet e tij me Spanjën kanë bërë që mesfushori i Arsenalit të shihet si një alternativë interesante për Real Madridin në afatin kalimtar.

    Edhe pse aktualisht nuk ka ndonjë negociatë të njohur mes palëve, situata e tij në Londër, përvoja dhe polivalenca mund ta bëjnë atë një opsion për skuadrën e drejtuar nga Jose Mourinho.

    Merino, 30-vjeçar, ka kontratë me Arsenalin deri më 30 qershor 2028 dhe vlera e tij në treg, sipas Transfermarkt, është rreth 25 milionë euro.

    Arsenali pagoi rreth 32 milionë euro plus bonuse për ta transferuar nga Real Sociedad në vitin 2024, ndaj çdo marrëveshje e mundshme do të duhej të negociohej drejtpërdrejt me klubin londinez.

    Spanjolli së fundmi dha një tjetër dëshmi të aftësive të tij me kombëtaren. Ai u inkuadrua në pjesën e dytë ndaj Kroacisë, kur Spanja ishte në disavantazh 1-0, dhe shënoi të dy golat në përmbysjen 1-2, duke siguruar kualifikimin në çerekfinale të Ligës së Kombeve.

    Merino ka shënuar 13 gola në 24 paraqitjet e fundit me Spanjën dhe në total ka arritur në 15 gola.

    Në kontrast me rolin e tij te Spanja, situata te Arsenali është dukshëm më e vështirë. Në pesë javët e para të Ligës Premier 2026/27, Merino është aktivizuar në të gjitha ndeshjet, por gjithmonë ka hyrë nga stoli, duke grumbulluar vetëm 81 minuta.

    Golin e vetëm për Arsenalin këtë sezon e ka shënuar në Kupën e Ligës.

    Kjo mungesë e vazhdimësisë mund ta bëjë situatën e tij interesante për Real Madridin. Merino mund të luajë si mesfushor qendror apo interior, është fizikisht i fortë dhe ka aftësi për të depërtuar në zonë nga linja e dytë.

    Arteta e ka përdorur edhe si sulmues qendre, ndërsa gjatë kohës te Borussia Dortmundi është aktivizuar edhe si qendërmbrojtës nën drejtimin e Thomas Tuchel.

    Vlera e tij e tregut është rreth 25 milionë euro, ndërsa një operacion prej 30-40 milionë eurosh mund të jetë një vlerësim i mundshëm i transferimit, megjithëse Arsenali nuk ka përcaktuar publikisht një çmim.

    Për momentin nuk ka kontakte të konfirmuara me Real Madridin, por nëse minutazhi i Merinos vazhdon të jetë i ulët, klubi madrilen mund ta monitorojë nga afër situatën e tij. /Telegrafi/

  • Sulmoi gazetarin gjatë protestës, ndalohet për 48 orë i dyshuari L.G

    Sulmoi gazetarin gjatë protestës, ndalohet për 48 orë i dyshuari L.G

    Prokuroria Themelore e Prishtinës ka njoftuar se ka ndaluar për 48 orë të dyshuarin, L.G për sulm gjatë protestave, gjegjësisht për sulm ndaj gazetarit Jeton Sopa.

    Zëdhënësja e Prokurorisë Themelore të Prishtinës, Kaltrina Shala ka bërë të ditur për Telegrafin se prokurori i çështjes po ndërmerr të gjitha masat dhe veprimet e nevojshme hetimore, për ndriçimin e plotë të rrethanave të këtij rasti.

    “Referuar kërkesës suaj, ju njoftojmë se në bazë të urdhrit të Prokurorit të Shtetit është ndaluar një (1) person me inicialet L.G., në kohëzgjatje prej 48 orësh, nën dyshimin e kryerjes se veprës penale ‘Sulmi’, nga neni 184 i Kodit Penal të Republikës së Kosovës”, tha ajo.

    Lidhur me këtë rast, Prokurori i çështjes, po ndërmerr të gjitha masat dhe veprimet e nevojshme hetimore, për ndriçimin e plotë të rrethanave të këtij rasti.

    Ndryshe, Telegrafi mëson se rasti ka të bëjë me sulmin ndaj gazetarit Jeton Sopa gjatë mbulimit të protestës para Qeverisë. /Telegrafi/