Blog

  • Musliu: Mbrëmë u morën dy vendime të rëndësishme - sot fillon përgjegjësia

    Musliu: Mbrëmë u morën dy vendime të rëndësishme – sot fillon përgjegjësia

    Musliu: Mbrëmë u morën dy vendime të rëndësishme - sot fillon përgjegjësia

    Deputetja e PDK-së, Ganimete Musliu, ka reaguar pas votimit të Ligjit për Dhomat e Specializuara dhe zgjedhjes së Justina Shiroka-Pulës Presidente të Republikës së Kosovës.

    Përmes një postimi, Musliu ka falënderuar qytetarët që, sipas saj, për tri javë rresht qëndruan në shesh në mbështetje të kërkesave të tyre, transmeton Klankosova.tv.

    “Tri javë qëndresë nuk mund të fshihen me një votim”, ka shkruar Musliu, duke theksuar se gjatë kësaj periudhe janë parë “lot, mërzi, mallëngjim e zhgënjim”, por edhe qëndresë, dinjitet, krenari dhe mosdorëzim.

    Ajo ka vlerësuar edhe qëndrimin e deputetëve të PDK-së, duke thënë se ata u dëshmuan për një qëndrim të përbashkët dhe të palëkundur në mbështetje të Ushtrisë Çlirimtare të Kosovës dhe ish-krerëve të saj që po gjykohen në Hagë.

    Musliu ka falënderuar në veçanti kryetarin e PDK-së, Bedri Hamzën, për angazhimin dhe punën gjatë këtij procesi.

    “Bedri Hamza dëshmoi se lidershipi nuk matet me zhurmë, me populizëm e me patetizma, por me urtësi, maturi, përgjegjësi dhe qëndrueshmëri”, ka shkruar deputetja, njofton Klankosova.tv.

    Postimi i plotë:

  • Kryekuvendari shqiptar uron Shiroka-Pulën në misionin e saj si presidente e Kosovës

    Kryekuvendari shqiptar uron Shiroka-Pulën në misionin e saj si presidente e Kosovës

    Kryekuvendari shqiptar uron Shiroka-Pulën në misionin e saj si presidente e Kosovës

    Kryetari i Kuvendit të Shqipërisë, Niko Peleshi ka uruar Justina Shiroka-Pulën për marrjen e detyrës si presidente e Kosovës.

    Përmes një postimi të shkurtër në rrjetet sociale, kryekuvendari uroi akademiken Shiroka-Pula për misionin e saj të ri, transmeton Klankosova.tv.

    “Urime Presidentes së re të Kosovës, Justina Shiroka-Pula, për zgjedhjen në krye të shtetit!”, ka shkruar ai.

    Shiroka-Pula u zgjodh presidente e Kosovës me 81 vota për.

  • Oda Amerikane diskuton me Maqedoncin për zhvillimin e industrisë së mbrojtjes

    Oda Amerikane diskuton me Maqedoncin për zhvillimin e industrisë së mbrojtjes

    Oda Amerikane diskuton me Maqedoncin për zhvillimin e industrisë së mbrojtjes

    Kosova po bën hapa të shpejtë në zhvillimin e industrisë së mbrojtjes, derisa bashkëpunimi i mëtejmë ndërmjet sektorit publik dhe privat, me përkrahjen e partnerëve strategjikë, i bën këta hapa më të qëndrueshëm.

    Kjo u tha gjatë një takimi ndërmjet anëtarëve të Odës Ekonomike Amerikane me ministrin e Mbrojtjes të Kosovës, Ejup Maqedonci. Në takim morën pjesë edhe përfaqësues të Ambasadës së Shteteve të Bashkuara të Amerikës në Prishtinë.

    “Duke ndarë vizionin e tij për zhvillimin e aftësive industriale në fushën e mbrojtjes, Ministri Maqedonci foli për aktivitetet e ndërmarra për hartimin e legjislacionit për industrinë e mbrojtjes. Ai falënderoi Odën Ekonomike Amerikane për partneritetin me Ministrinë e Mbrojtjes përgjatë dy viteve të fundit, përfshirë edhe organizimin e garës së parë për drona ‘Sharkathon’, të mbajtur vitin e kaluar”.

    “Ai foli edhe për disa ndërmarrje të reja të krijuara të cilat po sjellin produktet e para të prodhuara në Kosovë, si dëshmi e përpjekjeve të viteve të fundit, por edhe potencialit për inovacion teknologjik në këtë fushë”, u tha në njoftimin e Odës.

    Maqedonci në këtë takim foli edhe për rëndësinë e përpjekjeve të strukturuara me institucione të tjera, si Ministrinë e Arsimit dhe ofruesit e shërbimeve arsimore, për zhvillimin e kuadrove të punës, të cilat janë të nevojshme për zhvillimin e industrisë së mbrojtjes në vend. /Klankosova.tv

  • Policia sekuestron rreth 11 kilogramë kokainë në Austri: Tre shqiptarë në mesin e gjashtë të arrestuarve

    Policia sekuestron rreth 11 kilogramë kokainë në Austri: Tre shqiptarë në mesin e gjashtë të arrestuarve

    Policia austriake ka arrestuar gjashtë persona të dyshuar për trafikim të lëndëve narkotike, gjatë një operacioni të zhvilluar pranë Schwechat, në Austrinë e Poshtme.

    Në mesin e të arrestuarve janë tre shtetas shqiptarë, të moshave 46, 42 dhe 38 vjeç, si dhe tre shtetas italianë, të moshave 72, 53 dhe 23 vjeç, transmeton Telegrafi.

    Sipas njoftimit të policisë austriake, Zyra e Policisë Kriminale Shtetërore të Vjenës, Dega Qendrore/Lindore, kishte nisur hetimet ndaj një grupi të dyshuar për trafik droge që nga fillimi i qershorit 2026.

    Më 1 tetor 2026, pas punës hetimore, zyrtarët arritën të përcaktonin vendndodhjen e dyshuar të personave. Me mbështetjen e WEGA-s, Grupit të Operacioneve Speciale të Vjenës, një objektiv u identifikua dhe më pas u vu nën vëzhgim.

    Gjatë operacionit, zyrtarët e Zyrës së Policisë Kriminale Shtetërore, së bashku me pjesëtarët e WEGA-s, arrestuan gjithsej gjashtë persona.

    Hetuesit kishin siguruar gjithashtu një kartë çelësi për një dhomë hoteli në Austrinë e Poshtme. Pas përdorimit të saj për të gjetur dhomën, policia kreu një kontroll, gjatë të cilit zbuloi një sasi të madhe kokaine, para të gatshme dhe disa telefona celularë.

    Në total, u sekuestruan rreth 11 kilogramë kokainë, thuhet në njoftimin e Policisë austriake.

    Operacioni është zhvilluar pranë Schwechat, qytet që ndodhet në afërsi të Vjenës dhe i përket distriktit Bruck an der Leitha.

    Lajmin për arrestimet e ka konfirmuar edhe zëdhënësja e policisë austriake, Irina Steirer.

    Tre shtetasit shqiptarë dhe tre shtetasit italianë u morën në paraburgim. Deri tani, autoritetet nuk kanë bërë të ditura detaje të tjera lidhur me identitetin e të arrestuarve apo rolin e tyre të dyshuar në rast./Telegrafi/

  • Ambasadori i BE-së uron presidenten e re të Kosovës, Justina Shiroka Pula

    Ambasadori i BE-së uron presidenten e re të Kosovës, Justina Shiroka Pula

    Ambasadori i Bashkimit Evropian në Kosovë, Dirk Schuebel, ka uruar presidenten e re të Kosovës, Justina Shiroka Pula.

    Schuebel tha se shpreson në një stabilitet të ripërtërirë politik dhe institucional, duke theksuar se pret të bashkëpunojë me presidenten Shiroka Pula, institucionet e Kosovës dhe spektrin e gjerë politik.

    “Me shpresën për një stabilitet të ripërtërirë politik dhe institucional, mezi pres të punoj me presidenten Shiroka Pula, institucionet e Kosovës dhe spektrin e gjerë politik për ta afruar vendin më shumë me Bashkimin Evropian. Mbështetja e BE-së do të mbetet e palëkundur”, tha Schuebel. /Telegrafi/

  • Zgjedhja e Presidentes shmang krizën e re - odat ekonomike kërkojnë reforma, investime dhe vendimmarrje të shpejtë

    Zgjedhja e Presidentes shmang krizën e re – odat ekonomike kërkojnë reforma, investime dhe vendimmarrje të shpejtë

    Mesnatën mes 6 dhe 7 tetorit 2026, me 81 vota të deputetëve të Kuvendit, Justina Shiroka-Pula u zgjodh Presidente e Republikës së Kosovës, duke i dhënë fund një periudhe të zgjatur të pasigurisë institucionale dhe politike në vend.

    Zgjedhja e presidentes së re është mirëpritur nga përfaqësues të komunitetit të biznesit, të cilët kanë kërkuar që përfundimi i krizës institucionale të pasohet me vendimmarrje konkrete për ekonominë, investimet, sundimin e ligjit dhe integrimin euroatlantik.

    Kryetari i Odës Ekonomike të Kosovës, Lulzim Rafuna ka uruar Presidenten e Republikës së Kosovës, Justina Shiroka-Pula për detyrën e re.

    “Urimet më të përzemërta për një zonjë të nderuar, me bagazh të çmuar intelektual. Me Presidenten Shiroka-Pula kemi pasur një bashkëpunim shumë të mirë edhe gjatë kohës sa ajo drejtonte Akademinë e Shkencave dhe të Arteve të Kosovës. Uroj që ky bashkëpunim të vazhdojë edhe në të ardhmen, në funksion të zhvillimit dhe interesit të vendit. Ju priftë e mbara, Presidente”, ka thënë Rafuna.

    Edhe nga Oda Ekonomike Amerikane në Kosovë mirëpresin kompletimin e arkitekturës institucionale të Republikës së Kosovës, përmes zgjedhjes së Justina Shiroka Pulës Presidente të Republikës.

    Sipas një njoftimi për media thuhet se me institucionet e Kosovës tashmë plotësisht të konstituuara, fokusi duhet të drejtohet fuqishëm drejt prioriteteve ekonomike dhe strategjike të vendit.

    “Oda Amerikane bën thirrje për një dinamikë të re në reformat e qeverisjes ekonomike, përmirësimin e mjedisit të të bërit biznes dhe investimeve, fuqizimin e sundimit të ligjit, si dhe ndërmarrjen e masave që rrisin konkurrueshmërinë dhe mundësojnë rritje të qëndrueshme ekonomike”, thuhet në njoftim.

    Po ashtu siç bëhet e ditur në njoftim funksionaliteti i plotë institucional duhet gjithashtu t’i japë shtysë të re përshpejtimit të integrimit euroatlantik të Kosovës dhe thellimit të bashkëpunimit me Shtetet e Bashkuara të Amerikës dhe partnerët e tjerë strategjikë.

    “Oda Amerikane mbetet e gatshme të bashkëpunojë me institucionet e vendit në avancimin e reformave, fuqizimin e sektorit privat dhe kontributin për prosperitetin ekonomik dhe të ardhmen euroatlantike të Kosovës”.

    Ndërkaq, edhe nga Dhoma e Tregtisë dhe Industrisë Kosovë mirëpret tejkalimin e krizës institucionale dhe zgjedhjen e Justina Shiroka-Pula në pozitën e Presidentes së Republikës së Kosovës.

    Në njoftim bëhet e ditur se DHTIK i uron Presidentes së re të Republikës së Kosovës, duke i dëshiruar që gjatë mandatit të saj të kontribuojë në forcimin e institucioneve, stabilitetin e vendit dhe zhvillimin e mëtejshëm ekonomik e social të Kosovës.

    “Dhoma kishte bërë thirrje të vazhdueshme ndaj të gjithë spektrit politik që të angazhohej për tejkalimin e situatës së krijuar dhe shmangien e një cikli të ri zgjedhor, i cili do të mund të sillte pasiguri të mëtejshme dhe të ndikonte në gjendjen ekonomike e sociale të vendit”.

    Me tejkalimin e kësaj situate, siç thuhet në njoftim DHTIK kërkon nga të gjitha institucionet e Republikës së Kosovës që të angazhohen maksimalisht në adresimin e problemeve të akumuluara për një kohë të gjatë, veçanërisht atyre që ndikojnë drejtpërdrejt në zhvillimin ekonomik, klimën e të bërit biznes dhe mirëqenien e qytetarëve.

    “Stabiliteti institucional duhet të shoqërohet me vendimmarrje të shpejtë dhe konkrete për çështjet që presin zgjidhje, duke krijuar një mjedis më të qëndrueshëm dhe më të favorshëm për investime, punësim dhe zhvillim ekonomik. Dhoma e Tregtisë dhe Industrisë Kosovë do të vazhdojë të japë kontributin e saj në funksion të zhvillimit ekonomik të vendit, përfaqësimit të interesave të komunitetit të biznesit dhe ndërtimit të një klime më të favorshme për bizneset dhe investitorët”.

    Kosova kaloi njërën nga sfidat më të rëndësishme të krizës politike të viteve të fundit. Vendi ishte afër një situate të paqartë, me tensione të brendshme, pasiguri për të ardhmen politike dhe, mbi të gjitha, me një gjuhë polarizuese dhe të rrezikshme, në rast se vendi do të shkonte në zgjedhje të reja.

    Çfarë rrezikonte Kosova nëse do të shkonte në zgjedhje?

    Përtej aspektit politik, kriza institucionale kishte edhe një dimension të drejtpërdrejtë ekonomik.

    Nëse vendi do të shkonte sërish në zgjedhje, në rrezik do të viheshin edhe fondet e rëndësishme nga Plani i Rritjes. Plot 131.4 milionë euro, të lidhura me 22 hapa të këtij plani, kanë afat përfundimtar 31 dhjetorin e këtij viti. Pa një Kuvend funksional dhe pa një Qeveri me kapacitet të plotë, Kosova rrezikonte të humbiste afro 90 milionë euro.

    Për këtë arsye, moszgjedhja e presidentit mund ta vinte në rrezik zbatimin e një pjese të madhe të reformave që lidhen me Planin e Rritjes.

    Vendi do të përballej edhe me mungesë të projekteve madhore, rrezikim të buxhetit dhe vonesa në projekte të mëdha që nuk do të mund të zbatoheshin. Po ashtu, në një periudhë me tensione, trazira dhe pasiguri politike, do të ishte vështirë të pritej ndonjë investim i madh.

    Në anën tjetër, e rëndësishme ishte edhe fakti që partitë politike, në këtë rast LVV-ja dhe PDK-ja, arritën marrëveshje pa ndonjë këshillë apo ndërhyrje ndërkombëtare.

    Kjo tregon se Kosova mundet, por duhet të jetë më e qartë dhe më e përgjegjshme në vendimmarrjen politike. /Telegrafi/

  • Obeziteti te fëmijët dhe adoleshentët është katërfishuar që nga viti 1990, prek 170 milionë prej tyre – thotë OBSH

    Obeziteti te fëmijët dhe adoleshentët është katërfishuar që nga viti 1990, prek 170 milionë prej tyre – thotë OBSH

    Organizata Botërore e Shëndetësisë (OBSH) ka bërë të ditur se obeziteti te fëmijët dhe adoleshentët e moshës 5-19 vjeç është katërfishuar në nivel global që nga viti 1990, pasi në vitin 2024 rreth 170 milionë prej tyre jetonin me këtë sëmundje kronike.

    Sipas OBSH-së, prevalenca në këtë grupmoshë u rrit nga 2 për qind në vitin 1990 në 8 për qind në vitin 2024. Nga të prekurit, 70 milionë ishin fëmijë të moshës 5-9 vjeç dhe 100 milionë adoleshentë të moshës 10-19 vjeç.

    Shifrat u publikuan pasi OBSH-ja nxori udhëzimet e para për trajtimin e obezitetit te fëmijët dhe adoleshentët, duke rekomanduar ndërhyrje të strukturuara të fokusuara në ushqyerje, aktivitet fizik dhe ndryshime të sjelljes.

    Agjencia tha se ilaçet për humbje peshe, kirurgjia bariatrike dhe pajisjet për humbje peshe nuk duhet të përdoren për trajtimin e fëmijëve të moshës 0-9 vjeç.

    Për adoleshentët e moshës 10-19 vjeç, ilaçet e miratuara “mund të merren në konsideratë” vetëm kur një program i mbikëqyrur dhe shumëdimensional për ndryshimin e stilit të jetesës nuk ka arritur rezultatet e dëshiruara, ndërsa kirurgjia bariatrike mund të merret në konsideratë në kushte të rrepta për rastet e obezitetit të rëndë.

    OBSH-ja paralajmëroi se obeziteti mund të rrisë që në moshë të hershme rrezikun e sëmundjeve, përfshirë diabetin e tipit 2 dhe sëmundjet kardiovaskulare.

    Ajo theksoi gjithashtu pasojat e obezitetit në shëndetin mendor, përfshirë stigmatizimin, bullizmin, ankthin, depresionin dhe vetëvlerësimin e ulët, duke bërë thirrje që problemet e shëndetit fizik dhe mendor të trajtohen së bashku.

    “Baza e trajtimit të obezitetit te fëmijët dhe adoleshentët nuk janë ilaçet apo kirurgjia, por qasja në mbështetje gjithëpërfshirëse që mundëson ushqyerje të shëndetshme, aktivitet fizik dhe ndryshim të qëndrueshëm të sjelljes”, tha Dr. Luz Maria De Regil, drejtoreshë e Departamentit të Ushqyerjes dhe Sigurisë Ushqimore në OBSH.

    Ajo theksoi se prioriteti duhet të jetë që çdo fëmijë dhe adoleshent të ketë qasje në “kujdes cilësor dhe mjedise mbështetëse që në moshë të hershme, duke i ndihmuar të arrijnë dhe të ruajnë një peshë të shëndetshme dhe duke hedhur bazat për shëndet dhe mirëqenie gjatë gjithë jetës”.

    OBSH-ja theksoi se trajtimi i obezitetit duhet të shkojë përtej humbjes së peshës, duke u fokusuar në shëndetin e përgjithshëm, funksionimin dhe mirëqenien, përmes kujdesit afatgjatë dhe të përshtatur sipas moshës për fëmijët dhe familjet e tyre.

    Ajo paralajmëroi gjithashtu se vetëm trajtimi nuk mund të përmbysë rritjen e normave të obezitetit, duke bërë thirrje për masa që e bëjnë ushqyerjen e shëndetshme dhe aktivitetin fizik më të qasshëm dhe më të përballueshëm. /AA/

  • Çitaku: Kuvendi i Kosovës nderoi UÇK-në, vetveten dhe shtetin

    Çitaku: Kuvendi i Kosovës nderoi UÇK-në, vetveten dhe shtetin

    Nënkryetarja e Kuvendit, njëherësh deputetja nga radhët e PDK-së, Vlora Çitaku ka thënë se pas zgjedhjes së presidentes dhe miratimit të plotësim-ndryshi të Ligjit për Sepcialen, Kuvendi i Kosovës nderoi UÇK-në dhe shtetin.

    Çitaku përmes një postimi në rrjetin social në Facebook ka shkruar se sot, Kosova ka një ligj që mbron Ushtrinë Çlirimtare të Kosovës dhe një Presidente të re, Justina Pula-Shirokën – një zonjë të dashur e të nderuar.

    “Mbrëmë, me dy vendime, Kuvendi i Kosovës nderoi UÇK-në, vetveten dhe shtetin. Sot, Kosova ka një ligj që mbron Ushtrinë Çlirimtare të Kosovës dhe një Presidente të re, Justina Pula-Shirokën – një zonjë të dashur e të nderuar, me të cilën na lidhin shumë vite bashkëpunimi dhe miqësie. Mbrëmë fitoi edhe zëri i qytetarëve. Zëri që nuk u ndal dhe që u bë obligim për institucionet. UÇK-ja na bashkoi sërish. Le të na mbajë të bashkuar rreth historisë së lavdishme të vendit tonë, deri në drejtësi dhe liri për çlirimtarët”, ka shkruar ajo.

    Tutje ajo shtoi se kjo është një kthesë e rëndësishme, e shumëpritur dhe e nevojshme.

    “Tani, angazhimi ynë duhet të vazhdojë me të gjitha kapacitetet e shtetit, në mbështetje të betejës për drejtësi në apel. Kjo fitore e shtetit të Kosovës u dedikohet Hashim Thaçit, Kadri Veselit, Jakup Krasniqit dhe Rexhep Selimit. Një mesazh për ta: Kosova është pranë jush. Urime, Kosovë! Me UÇK-në në zemër”, ka shkruar Çitaku. /Telegrafi/


  • Përgatitni rollatën perfekte me kokos pa pjekje - një ëmbëlsirë e shijshme për vetëm 20 minuta

    Përgatitni rollatën perfekte me kokos pa pjekje – një ëmbëlsirë e shijshme për vetëm 20 minuta

    Nëse po kërkoni një recetë të thjeshtë për tortë që nuk kërkon pjekje, roleja me kokos mund të jetë një zgjedhje e mirë.

    Përveçse përgatitet pa furrë, kjo tortë nuk kërkon shumë përbërës ose kohë.

    Baza e çokollatës dhe mbushja kremoze me kokos i japin një pamje dhe shije të veçantë, ndërsa roleja mund të përgatitet paraprakisht dhe të ruhet në frigorifer.

    Foto ilustruese

    Përbërësit për pjesën e errët:

    – 200 g biskota të vogla të bluara

    – 2 lugë gjelle pluhur kakaoje

    – 100 g sheqer pluhur

    – 1 sheqer vanilje

    – 100 ml qumësht i ngrohtë

    – 100 g gjalpë

    – 1 lugë gjelle rum, sipas dëshirës

    Përbërësit për pjesën e bardhë:

    – 150 g kokos

    – 100 g sheqer pluhur

    – 100 g gjalpë në temperaturë ambienti

    – 3 lugë gjelle qumësht

    Përgatitja:

    Në një tas të madh, përzieni së bashku biskotat e shtypura, kakaon, sheqerin pluhur dhe sheqerin e vaniljes.

    Shtoni gjalpin e zbutur dhe qumështin e ngrohtë dhe përzieni mirë derisa të përftoni një përzierje kompakte.

    Shtoni një lugë gjelle rum nëse dëshironi.Vendoseni përzierjen në letër pjekjeje dhe hapeni në një drejtkëndësh me trashësi rreth gjysmë centimetri.

    Për ta bërë më të lehtë formësimin, mund ta mbuloni me një fletë tjetër letre pjekjeje dhe ta hapni në mënyrë të barabartë.

    Për të përgatitur mbushjen me kokos, përzieni kokosin, sheqerin pluhur dhe gjalpin në temperaturë ambienti.

    Shtoni qumështin dhe përzieni derisa të përftoni një përzierje kremoze që mund të lyhet me ujë.

    Shpërndajeni kremin e kokosit në mënyrë të barabartë mbi bazën e errët.

    Pastaj, duke përdorur letër pjekjeje, rrotullojeni me kujdes përzierjen për të krijuar një rrotull të ngushtë.

    Mbështilleni me qese plastike dhe vendoseni në frigorifer për të paktën një orë që të ngurtësohet.

    Pasi të ftohet, priteni në feta dhe shërbejeni. /Telegrafi/

  • Prokuroria jep detaje të reja për ndalimin e një prokurori në Manastir

    Prokuroria jep detaje të reja për ndalimin e një prokurori në Manastir

    Prokuroria Themelore Publike për Ndjekjen e Krimit të Organizuar dhe Korrupsionit nisi procedurë kundër një prokurori të lartë publik në Prokurorinë Themelore Publike të Manastirit, për shkak të ekzistencës së bazave të dyshimit se ai ka kryer vepër penale “Marrje shpërblimi për ndikim të paligjshëm” sipas nenit 359, paragrafi 3, në lidhje me paragrafin 2 të Kodit Penal, thuhet në njoftimin e PTHP-së.

    “Në periudhën e kaluar, përmes disa veprimeve dhe zbatimit të masave të posaçme hetimore, janë siguruar prova që tregojnë për dyshim të arsyeshëm se ai ka përdorur ndikimin e tij real dhe pozicionin zyrtar që mbante për të ndikuar në mënyrë të paligjshme në vendimmarrjen e kolegëve prokurorë publikë dhe gjyqtarë në të paktën 4 raste individuale, në fushën në të cilën ai kryente funksionin e tij.

    Duke vepruar kështu, ai kërkoi dënime më të ulëta ose për të siguruar një pozicion më të favorshëm për të dyshuarit ose të pandehurit në procedurat penale. Gjatë ditës së djeshme, bazuar në një urdhër gjykate, u kryen bastisje në shtëpinë e të dyshuarit dhe në ambientet e Prokurorisë Themelore Publike të Manastirit me qëllim sigurimin e provave shtesë.

    Prokurori publik kompetent vazhdon hetimin e rastit dhe i ka paraqitur propozim gjyqtarit të procedurës paraprake për përcaktimin e masave paraprake – konfiskimin e dokumentit të udhëtimit dhe ndalimin e kryerjes së aktiviteteve të caktuara pune, përkatësisht largimin e të dyshuarit nga vendi i tij i punës”, thonë nga PTHP./Telegrafi/