Blog

  • ​Çlirim Haziri pas miratimit të ndryshimeve të Ligjit për Specialen: Fitorja është e madhe

    ​Çlirim Haziri pas miratimit të ndryshimeve të Ligjit për Specialen: Fitorja është e madhe

    ​Çlirim Haziri pas miratimit të ndryshimeve të Ligjit për Specialen: Fitorja është e madhe

    Organizatori i protestave në mbështetje të ish-krerëve të Ushtrisë Çlirimtare të Kosovës që po gjykohen në Hagë, Çlirim Haziri, e ka cilësuar votimin e Ligjit për Mbrojtjen e Vlerave të UÇK-së si një fitore të protestuesve që për 21 ditë kanë qëndruar në sheshet e Prishtinës.

    Në fjalimin e mbajtur pas votimit, Haziri tha se miratimi i ligjit nuk duhet parë si fundi i protestës dhe angazhimit qytetar, por si një hap në kauzën që protestuesit kanë mbështetur gjatë tri javëve të fundit.

    “Fitorja e sonte është e madhe, por ky është vetëm fillimi i angazhimit tonë të pandalshëm qytetar në mbrojtje të Republikës”, tha Haziri para protestuesve, raporton Kosovapress.

    Ai pretendoi se presioni i vazhdueshëm i qytetarëve ishte vendimtar për votimin e ligjit në Kuvend.

    “Ky ligj nuk na u fal. Ky ligj nuk kaloi nga dëshira e atyre aty brenda. Ky ligj u fitua këtu jashtë. U fitua nga ju”, deklaroi Haziri.

    Organizatori i protestave kritikoi mënyrën se si politika e trajtoi çështjen gjatë ditëve të fundit, duke thënë se protestuesit kishin parë “luhatje” dhe “kalkulime” përpara votimit.

    Sipas tij, qytetarët nuk do të duhej të protestonin për 21 ditë që institucionet të merrnin një vendim që ai e konsideron detyrim ndaj trashëgimisë së UÇK-së.

    Haziri megjithatë u kërkoi protestuesve që të mos e paraqesin votimin si një arritje përfundimtare.

    “Ky votim sonte nuk është asnjë mrekulli. Ai është thjesht një borxh i vonuar, një detyrim minimal që ky shtet e kishte ndaj atyre që i dhanë jetën”, tha ai.

    Në pjesën më emocionale të fjalimit, Haziri përmendi Adem dhe Hamëz Jasharin, Zahir Pajazitin dhe Fehmi Lladrovcin, duke thënë se miratimi i një ligji në Kuvend nuk e përfundon atë që protestuesit e konsiderojnë përgjegjësi institucionale ndaj luftës së UÇK-së.

    Ai e lidhi vazhdimin e protestave edhe me proceset gjyqësore në Hagë, ku po gjykohen ish drejtues të UÇK-së.

    “Mendja dhe zemra jonë mbeten atje, në Hagë”, tha Haziri.

    Ai paralajmëroi se organizatorët do të vazhdojnë angazhimin edhe për sigurimin e fondeve dhe zbatimin e plotë të ligjit nga institucionet e Kosovës.

    “Ne do të jemi këtu derisa pafajësia e krerëve tanë të vërtetohet plotësisht”, deklaroi Haziri, duke shtuar se protestuesit do të vazhdojnë të mblidhen në sheshet e Prishtinës.

    Fjalimin ai e përmbylli duke falënderuar qytetarët për pjesëmarrjen gjatë 21 ditëve të protestave dhe me thirrjen: “Rroftë Ushtria Çlirimtare e Kosovës”.

  • Kosova shpëton nga zgjedhjet

    Kosova shpëton nga zgjedhjet

    Kosova shpëton nga zgjedhjet

    Me zgjedhjen e presidentes Kosova i ka shpëtuar edhe një palë zgjedhjeve parlamentare.

    Në rast se nuk do të zgjidhej presidentja në momentet e fundit, Kosova do të shkonte në zgjedhjet e katërta parlamentare brenda katër vjetësh.

    Mirëpo, në fund u arrit pajtimi mes VV-së dhe PDK-së dhe Justina Shiroka Pula u zgjodh presidente e vendit.

  • Justina Shiroka-Pula zgjidhet presidente e Kosovës

    Justina Shiroka-Pula zgjidhet presidente e Kosovës

    Justina Shiroka-Pula është zgjedhur presidente e Republikës së Kosovës.

    Pro kanë votuar 81

    Shiroka-Pula është ekonomiste dhe akademike, ndërsa para zgjedhjes në krye të shtetit ka ushtruar edhe funksione të ndryshme institucionale dhe politike.

    Në vitin 2025, ajo ishte zgjedhur kryetare e Akademisë së Shkencave dhe Arteve të Kosovës (ASHAK), duke u bërë gruaja e parë që drejton këtë institucion të themeluar në vitin 1975. Në këtë pozitë ajo pasoi akademikun Mehmet Kraja.

    Shiroka-Pula shkollimin fillor dhe të mesëm e ka përfunduar në Prishtinë, ndërsa në vitin 1976 ka diplomuar në Fakultetin Ekonomik të Universitetit të Prishtinës.

    Studimet pasuniversitare në fushën e teorisë dhe politikës së zhvillimit ekonomik i ka përfunduar në vitin 1984 në Fakultetin e Shkencave Ekonomike të Universitetit të Zagrebit.

    Ajo është doktoruar në Universitetin e Prishtinës me tezën “Investimet demografike dhe zhvillimi ekonomik i Kosovës”.

    Karrierën profesionale Shiroka-Pula e ka nisur në Bankën Popullore të Kosovës, ndërsa në vitin 1978 ka filluar punën si ligjëruese në Fakultetin Ekonomik të Universitetit të Prishtinës.

    Sipas biografisë së publikuar nga ASHAK, ajo ka ndjekur edhe studime pasdoktorale në Universitetin e Linzit në Austri dhe në Universitetin e Arizonës në Shtetet e Bashkuara të Amerikës, si dhe trajnime të ndryshme profesionale në universitete ndërkombëtare.

    Pas përfundimit të luftës në Kosovë, Shiroka-Pula është angazhuar edhe në shoqërinë civile, me fokus në fuqizimin e grave, barazinë gjinore, zhvillimin e bizneseve dhe ndërmarrësinë.

    Ajo ka pasur edhe një karrierë politike. Nga viti 2008 deri më 2011 ka shërbyer si ministre e Energjisë dhe Minierave të Kosovës, ndërsa nga viti 2011 deri më 2014 ka qenë deputete e Kuvendit të Kosovës.

    Me zgjedhjen e saj në postin e presidentes, Shiroka-Pula merr përgjegjësinë e kreut të shtetit në një periudhë të rëndësishme politike për Kosovën.

    Ajo bëhet presidentja e re e Republikës së Kosovës, duke pasuar në këtë detyrë presidenten Vjosa Osmani./Telegrafi.

  • Juristët: Kuvendi shpërndahet automatikisht nëse s’zgjidhet presidenti deri në mesnatë

    Juristët: Kuvendi shpërndahet automatikisht nëse s’zgjidhet presidenti deri në mesnatë

    Nëse deri në orën 00:00 të datës 6 tetor 2026 nuk zgjidhet njëra nga dy kandidatet për presidente, Kuvendi konsiderohet i shpërndarë, sipas ekspertëve.

    Ehat Miftaraj nga Instituti i Kosovës për Drejtësi [IKD] tha për Radion Evropa e Lirë se nuk është e rëndësishme se kur ka nisur procedura, por ajo duhet të përfundojë brenda afatit të përcaktuar nga Kushtetuta.

    “Çdo emërim pas datës 6 tetor është kundërkushtetues. Pasoja që Gjykata Kushtetuese e lidh me dështimin për ta zgjedhur presidentin deri më 6 tetor, është shpërndarja e Kuvendit sipas nenit 82 të Kushtetutës”, tha Miftaraj.

    Sipas tij, Gjykata Kushtetuese vlerëson kushtetutshmërinë e zgjedhjes së presidentes pas afatit kohor nëse dikush inicion rast në këtë institucion.

    Edhe Vullnet Bugaqku nga Instituti Demokratik i Kosovës (KDI) tha se Kuvendi shpërndahet automatikisht pas përfundimit të afatit 60-ditor.

    “Deri në orën 00:00 ka afat. Pastaj, Kuvendi konsiderohet i shpërndarë, sepse përfundon afati 60-ditor”, tha Bugaqku.

  • Detaje të reja rreth ish-shefit të inteligjencës gjermane, i arrestuar nën dyshimet për spiunazh

    Detaje të reja rreth ish-shefit të inteligjencës gjermane, i arrestuar nën dyshimet për spiunazh

    Një ish-shef i shërbimit sekret gjerman u arrestua të martën nën dyshimet për spiunazh dhe tradhti, në një rast skandaloz për vendin në një kohë kur Gjermania po kërkon të zgjerojë kompetencat e agjencive të saj të inteligjencës.

    August Hanning, i cili drejtoi Shërbimin Federal të Inteligjencës së Gjermanisë (BND) nga viti 1998 deri më 2005, akuzohet për spiunazh, tradhti dhe bashkëpunim me shërbime të huaja të inteligjencës, njoftuan prokurorët federalë. Ata nuk treguan se për cilat shtete bëhet fjalë.

    Revista gjermane “Spiegel”, duke iu referuar burimeve të paidentifikuara, raportoi se Hanning kishte qenë në kontakt me një operativ të inteligjencës së Azerbajxhanit.

    Edhe ish-shefi i stafit të Hanningut, i identifikuar pjesërisht si Manfred D., i cili vazhdoi të punonte për shërbimin sekret deri në mars të vitit 2026, u arrestua.

    Ai akuzohet se, gjatë punës për pasuesit e Hanningut, kishte siguruar informacione të klasifikuara dhe ia kishte shitur ish-shefit të tij, i cili punonte si konsulent në sektorin privat.

    Më pas, Hanning dyshohet se i ka përdorur këto informacione në punën e tij si konsulent privat, e cila përfshinte përgatitjen e një informimi për një spiun të huaj dhe përcjelljen e informacioneve te një agjent i një shërbimi tjetër të huaj të inteligjencës, thanë prokurorët.

    Sipas raportimit të “Spiegel”, informimi ishte përgatitur për spiunin azerbajxhanas.

    Hanning akuzohet gjithashtu se ka qenë “në kontakt të ngushtë me një përfaqësues të një shërbimi tjetër të huaj të inteligjencës”, të cilit për disa vite i kishte përcjellë informacione politike, pjesërisht të bazuara në materiale të siguruara nga Manfred D.

    Sipas transmetuesit gjerman ARD, informacionet që Manfred D. i kishte përcjellë përfshinin materiale për programin bërthamor të Iranit dhe ushtrinë ruse. ARD citoi burime të sigurisë të kenë thënë se një pjesë e këtyre informacioneve kishte ardhur nga agjenci partnere të inteligjencës jashtë vendit.

    Konstantin von Notz, deputet i opozitës nga Partia e të Gjelbërve, i tha AFP-së se akuzat ishin “të rënda dhe thellësisht shqetësuese” dhe kërkoi hetim për “dëmin e mundshëm”.

    Deputeti, i cili është gjithashtu anëtar i komitetit parlamentar për mbikëqyrjen e shërbimeve të inteligjencës, tha se kishte kritikuar vazhdimisht “aktivitetet e dyshimta dhe të gjera lobuese të ish-zyrtarëve të lartë”.

    “Ato janë padyshim edhe një pikë hyrëse për shërbimet armiqësore të inteligjencës”, tha ai.

    Akuzat dolën në dritë gjatë përfshirjes së Hanningut në rastin e Christina Block, trashëgimtares së një zinxhiri restorantesh, e cila po gjykohet për urdhërimin e rrëmbimit të dy fëmijëve të saj.

    Në atë rast, Hanning dhe një ish-polic në pension u akuzuan se kishin pranuar një pagesë prej më shumë se 100 mijë eurosh nga Blocku, në këmbim të kthimit të fëmijëve nga Danimarka, ku ata jetonin me ish-bashkëshortin e saj.

    Prona e Hanningut u kontrollua në shtator të vitit 2025, gjë që çoi në hetimin aktual.

    Gjermania “nuk do ta tolerojë tradhtinë e sekreteve”, deklaroi Marc Henrichmann, kryetar i komitetit parlamentar për mbikëqyrjen e inteligjencës.

    “Kushdo që bashkohet me armiqtë e demokracisë sonë liberale do të zbulohet”, tha ai, duke shtuar se sjellja e pretenduar e Hanningut do të përbënte “shkelje të rëndë të detyrave të tij zyrtare”.

    Tradhtia mund të dënohet me burgim të përjetshëm në Gjermani.

    Skandali vjen pasi qeveria gjermane muajin e kaluar miratoi një reformë të gjerë të agjencive të inteligjencës, duke u dhënë atyre kompetenca më të mëdha për operacione të fshehta.

    BND-ja dhe Shërbimi Federal për Mbrojtjen e Kushtetutës (BfV), që merret me inteligjencën e brendshme, kanë pasur kompetenca më të kufizuara se homologët e tyre të huaj. Megjithatë, autoritetet po kërkojnë t’i forcojnë ato për t’u përballur me kërcënimet në rritje, veçanërisht nga Rusia.

    Reformat pritet të miratohen nga parlamenti në fillim të vitit të ardhshëm.

    Shefi aktual i BND-së, Martin Jaeger, tha se agjencia kishte “kryer shpejt hetime të gjera të brendshme” ndaj Hanningut, përpara se çështjen ta merrnin në dorë prokurorët federalë.

    “Për BND-në dhe për mua, nuk ka kompromis kur bëhet fjalë për sigurinë e brendshme”, tha Jaeger për gazetën “Rheinische Post”, duke shtuar se incidenti “nuk ka vënë në pikëpyetje asnjë nga qëllimet apo prioritetet e mia”.

    Të rënda dhe thellësisht shqetësuese

    Sipas prokurorëve, Manfred D. i kishte siguruar Hanningut rreth 2 mijë dokumente, shumë prej të cilave përmbanin informacione të klasifikuara.

    Hanningu, i cili shërbeu si zyrtari më i lartë civil në Ministrinë e Brendshme nga viti 2005 deri më 2009, përdori informacione të klasifikuara të inteligjencës “për të hartuar një analizë për një zyrtar të një shërbimi të huaj të inteligjencës”.

    Megjithatë, nuk është e qartë nëse “materiali ka arritur te marrësi i synuar”. /Telegrafi/

  • Nis procesi i votimit për presidente të Kosovës

    Nis procesi i votimit për presidente të Kosovës

    Nis procesi i votimit për presidente të Kosovës

    Kuvendi i Kosovës ka nisur procesin e votimit për zgjedhjen e presidentes së vendit.

    Kandidate për këtë pozitë janë Justina Shiroka Pula dhe Eliza Hoxha.

    Deputët po thirren një nga një për të votuar, kur kanë mbetur pak minuta deri te përfundimi i afatit kushtetues për zgjedhjen e presidentit tëvendit. /Klankosova.tv

  • Nis procesi i votimit për presidente të Kosovës

    Edhe 7 minuta kohë për zgjedhjen e presidentes

    Nis procesi i votimit për presidente të Kosovës

    Deputetët po votojnë në shpejtësi pasi ka shumë pak kohë për të zgjedhur presidenten e Kosovës.

    Kanë mbetur vetëm edhe shtatë minuta kohë para se të kalojë afati.

  • Aleanca lëshon sallën, del në shesh

    Aleanca lëshon sallën, del në shesh

    Aleanca lëshon sallën, del në shesh

    Deputetët e Aleancës, pasi kanë marrë pjesë në seancën e jashtëzakonshme ku u votuan ndryshimet në ligjin për Gjykatën Speciale, e kanë liruar sallën.

    Ata kanë dalë në shesh, por nuk dihet nëse u janë bashkuar qytetarëve të mbledhur aty.

  • "UÇK, UÇK" - Turma e protestuesve shpërthen në festë pasi miratohet projektligji për Specialen

    “UÇK, UÇK” – Turma e protestuesve shpërthen në festë pasi miratohet projektligji për Specialen

    "UÇK, UÇK" - Turma e protestuesve shpërthen në festë pasi miratohet projektligji për Specialen

    Kuvendi i Kosovës ka miratuar në lexim të dytë projektligjin për ndryshimin dhe plotësimin e Ligjit për Dhomat e Specializuar.

    Me të marrë vesh lajmin, turma e protestuesve pranë Kuvendit kanë shpërthyer në brohorima.

  • Mbi 10 sulme fizike në ditë, punonjësit e transportit publik në Zvicër po nënçmohen nga udhëtarët

    Mbi 10 sulme fizike në ditë, punonjësit e transportit publik në Zvicër po nënçmohen nga udhëtarët

    Punonjësit e transportit publik në Zvicër po përballen gjithnjë e më shpesh me fyerje, kërcënime dhe sulme fizike.

    Sipas të dhënave të publikuara nga Hekurudhat Federale Zvicerane (SBB), ndaj stafit të saj raportohen mesatarisht rreth 10 raste agresioni në ditë.

    Problemi duket se është përkeqësuar pas pandemisë së COVID-19. Përveç sulmeve fizike, punonjësit përballen shpesh me ofendime dhe kërcënime. Megjithatë, jo të gjitha incidentet raportohen, pasi disa punonjës hezitojnë të nisin procedura zyrtare.

    Në vitin 2025, në Zvicër janë regjistruar 718 kallëzime për dhunë ose kërcënime ndaj personelit të transportit publik. Autoritetet vlerësojnë se numri real mund të jetë më i lartë, shkruan Blick, transmeton Telegrafi.

    Edhe PostAuto ka raportuar rritje të rasteve. Gjatë vitit 2025 janë regjistruar 65 sulme ndaj stafit të drejtimit dhe kontrollit, ndërsa deri në fund të korrikut 2026 numri kishte arritur në 145 raste.

    Incidentet variojnë nga fyerjet dhe kërcënimet deri te sulmet fizike. Në disa raste, punonjësit janë shtyrë, goditur apo kërcënuar gjatë kryerjes së detyrës.

    SBB ka shtuar masat e sigurisë, përfshirë patrullimet dhe praninë e personelit të sigurisë në trenat dhe linjat ku rreziku konsiderohet më i lartë.

    Punonjësit dhe sindikatat kërkojnë masa më të forta për mbrojtjen e stafit, si dhe më shumë mbështetje për punonjësit që përballen me situata të dhunshme gjatë punës./Telegrafi/