Nga beli i theksuar te mëngët voluminoze, këto modele mund ta shndërrojnë edhe kombinimin më të thjeshtë në një pamje plot stil
Palltoja është ndër veshjet më të gjithanshme për vjeshtë dhe pranverë. Mund të vishet me xhinse e atlete për një pamje të përditshme, me pantallona elegante për punë apo mbi një fustan për mbrëmje.
Këtë herë, vëmendja zhvendoset te prerjet me karakter, teksturat e dallueshme dhe ngjyrat që i japin gjallëri garderobës. Ja modelet që ia vlen t’i keni parasysh për sezonin e ftohtë dhe ditët e freskëta të pranverës.
Bel i theksuar dhe supe voluminoze
Palltot e ngushtuara në bel rikthehen me një siluetë më të theksuar. Ndryshe nga modelet e një dekade më parë, ato ndërthurin belin e formësuar me supe të gjera e voluminoze.
Ky efekt mund të krijohet nga vetë prerja e palltos ose me ndihmën e një rripi. Rezultati është një siluetë që nxjerr në pah belin dhe i jep strukturë të gjithë veshjes.
Profimedia
Gëzof artificial dhe materiale me teksturë
Palltot prej gëzofi artificial vijnë në variante të shumta, nga modelet njëngjyrëshe te ato me motive kafshësh.
Përveç tyre, bien në sy edhe materialet bukle, zhakard dhe pëlhurat e tjera me teksturë të theksuar. Ato i shtojnë thellësi kombinimit dhe e bëjnë pallton të dallueshme edhe kur ngjyra është neutrale.
Profimedia
Motive që e vendosin pallton në qendër të vëmendjes
Palltoja mund të jetë elementi kryesor i të gjithë kombinimit. Modelet me kuadrate, motive abstrakte apo stampa të tjera e arrijnë lehtësisht këtë efekt.
Zgjidhni një motiv që përputhet me stilin tuaj. Për ta kombinuar më thjesht, përsëritni te pjesa tjetër e veshjes njërën nga ngjyrat e palltos.
Profimedia
Blu, kaki, çokollatë dhe bordo
Nëse dëshironi një alternativë ndaj së zezës, provoni blunë e errët, ngjyrën kaki, kafen çokollatë ose bordonë.
Këto nuanca kombinohen lehtësisht me shumë nga veshjet e garderobës dhe sjellin ndryshim pa kërkuar domosdoshmërisht një pamje të guximshme. Veçanërisht kafja çokollatë dhe bordo i japin ngrohtësi kombinimeve të stinës.
Profimedia
Jakë shumë e lartë
Palltot me jakë të lartë bashkojnë anën praktike me pamjen elegante. Jaka ndihmon në mbrojtjen e qafës nga era dhe i jep pjesës së sipërme një formë të dallueshme.
Ky detaj bie më shumë në sy te modelet me prerje të pastër dhe pak zbukurime.
Shall nga i njëjti material
Një tjetër zgjedhje është palltoja e shoqëruar me shall nga i njëjti material dhe në të njëjtën ngjyrë.
Shallet janë shpesh të mëdha, ndonjëherë pothuajse sa një batanije e vogël. Të hedhura lirshëm mbi supe ose të mbështjella rreth qafës, ato krijojnë një pamje të ngrohtë dhe të harmonizuar.
Profimedia
Pallto me prerje sakoje
Palltoja me prerje sakoje është ndër alternativat më elegante për garderobën e punës dhe daljet në mbrëmje.
Reverët dhe struktura e saj kombinohen bukur me pantallona klasike, funde apo fustane, duke i dhënë veshjes një pamje të rregullt
.
Mëngë të fryra për një prekje romantike
Palltot me mëngë të fryra, të njohura edhe si mëngë balonë, u përshtaten atyre që pëlqejnë detajet romantike dhe prerjet e pazakonta.
Vëllimi te mëngët e bën pallton tërheqëse edhe pa motive apo zbukurime të tjera.
Motive kafshësh
Leopardi dhe zebra janë zgjedhje për ata që duan një pallto që tërheq menjëherë vëmendjen.
Këto motive shfaqen si në gëzofin artificial, ashtu edhe në pëlhura me sipërfaqe të lëmuar. Për një kombinim të ekuilibruar, shoqërojini me veshje njëngjyrëshe dhe aksesorë të thjeshtë. /Telegrafi/