Sulmet ruse gjatë natës kanë lënë më shumë se 850 mijë persona pa energji elektrike në pjesë të ndryshme të Ukrainës. Ndërkohë, presidenti ukrainas, Volodymyr Zelensky, ka njoftuar se forcat ruse kanë kryer një sulm me dron në vendin ku po zhvillohen operacionet e kërkim-shpëtimit në Komyshuvakha, pas bombardimit të së hënës që shkaktoi të paktën 55 viktima.
Kompania ukrainase e energjisë DTEK njoftoi se forcat ruse kishin ndërmarrë një “sulm masiv” ndaj sektorit energjetik të vendit, duke shënjestruar objekte të rëndësishme në rajonin lindor të Dnipropetrovskut, transmeton Telegrafi.
Sipas kompanisë, mbi 600 mijë banorë në distriktet Pavlohrad, Samar, Kamianske dhe Dnipro, përfshirë edhe qytetin e Dnipros, mbetën pa energji elektrike. Autoritetet njoftuan më vonë se furnizimi me energji në këtë rajon po rikthehej gradualisht.
Zelensky bëri të ditur se ndërprerje të shumta të energjisë janë regjistruar edhe në rajone të tjera, përfshirë Kharkivin në verilindje dhe Zhytomyrin në veriperëndim të vendit. Në këtë të fundit, sipas tij, 140 ndërtesa banimi kanë mbetur pa ngrohje pas një sulmi rus.
Autoritetet lokale në Kharkiv raportuan se rreth 250 mijë konsumatorë kishin mbetur pa energji elektrike, por furnizimi ishte rikthyer më vonë.
Rusia ka shtuar sërish sulmet ndaj infrastrukturës energjetike ukrainase, në prag të dimrit. Sipas raportimeve, Moska po shfrytëzon mungesën e raketave ukrainase për interceptimin e sulmeve ajrore, në përpjekje për të dobësuar qëndresën e vendit.
Zelensky deklaroi se vetëm gjatë javës së fundit, forcat ruse kanë lëshuar drejt Ukrainës 115 raketa, afro 1 mijë e 900 bomba ajrore të drejtuara dhe më shumë se 3 mijë dronë sulmues.
Presidenti ukrainas njoftoi të dielën në mëngjes se Rusia kishte kryer edhe një sulm me dron në vendin ku ekipet e shpëtimit po vazhdojnë kërkimet pas bombardimit të së hënës në Komyshuvakha.
“Fatkeqësisht, mund të ketë ende njerëz të tjerë nën rrënoja. Cinikë dhe brutalë në mënyrë të skajshme”, shkroi Zelensky në platformën X.
Shërbimi Shtetëror i Emergjencave i Ukrainës deklaroi se Rusia kishte shënjestruar qëllimisht punonjësit e ekipeve të emergjencës në vendngjarje, por bëri të ditur se asnjëri prej tyre nuk ishte lënduar.
Bombardimi i së hënës goditi një shkollë, të cilën autoritetet ukrainase thonë se e përdornin për qëllime humanitare. Sulmi ndodhi pas një armëpushimi të kufizuar lokal mes Kievit dhe Moskës, i cili kishte mundësuar largimin e civilëve nga qyteti Oleshky, i pushtuar nga Rusia, në rajonin jugor të Khersonit.
Ndërkohë, një person u vra dhe tre të tjerë u plagosën të dielën nga një sulm në një zonë banimi të qytetit Dnipro.
Kreu i administratës ushtarake rajonale, Oleksandr Hanzha, tha se nga sulmi kishte shpërthyer një zjarr dhe se të paktën një shtëpi private ishte shkatërruar plotësisht. Ai shtoi se dyshohet që persona të tjerë mund të kenë mbetur të bllokuar nën rrënoja.
Zelensky ka akuzuar Kremlinin se po i intensifikon sulmet për të shtuar presionin ndaj Ukrainës në prag të bisedimeve të planifikuara trepalëshe mes Kievit, Moskës dhe Uashingtonit në Abu Dhabi. /Telegrafi/