NATO po redukton numrin e takimeve të nivelit të lartë, ndërsa samiti i udhëheqësve që ishte planifikuar të mbahej në Shqipëri në vitin 2027 nuk do të zhvillohet sipas kalendarit fillestar.
Sipas Associated Press, Aleanca ka planifikuar vetëm një takim të ministrave të Jashtëm për vitin 2027, në vend të dy takimeve që mbahen zakonisht.
Në kalendar nuk figuron as takimi i zakonshëm i ministrave të Mbrojtjes në tetor.
Ndryshimet janë pjesë e një riorganizimi më të gjerë të takimeve të NATO-s, në një periudhë tensionesh për shpenzimet e mbrojtjes, luftën në Ukrainë dhe marrëdhëniet ndërmjet aleatëve.
Kryeministri i Shqipërisë, Edi Rama, kishte njoftuar më herët se samiti i planifikuar në Tiranë nuk do të mbahej në vitin 2027.
Sipas tij, nëse samiti organizohet në vitin 2028, Tirana do të jetë nikoqire.
Sekretari i përgjithshëm i NATO-s, Mark Rutte, ka deklaruar se takimet e udhëheqësve do të organizohen kur të vlerësohen të nevojshme.
Ndryshimet nuk nënkuptojnë ndërprerjen e funksionimit të NATO-s, por reduktim të takimeve të planifikuara të nivelit të lartë.
Sinjali – aty ku e vërteta flet para lajmit!
Burimi: Sinjali