Kryenegociatori i Republikës së Kosovës me Bashkimin Evropian, Jeton Zulfaj, priti në takim të Dërguarin e Posaçëm të Hungarisë për Ballkanin Perëndimor, András Klein, të shoqëruar nga Ambasadori i Hungarisë në Kosovë, László István Dux.
Takimi ishte vazhdimësi e bisedimeve të zhvilluara në Budapest në fillim të këtij muaji. Z. Zulfaj e falënderoi z. Klein për mikpritjen në Budapest dhe për vizitën e tij në Prishtinë.
Diskutimi u përqendrua në procesin e anëtarësimit të Kosovës në Bashkimin Evropian, zhvillimet rajonale dhe bashkëpunimin dypalësh. Z. Zulfaj theksoi se marrja e statusit të vendit kandidat dhe hapja e negociatave për anëtarësim në BE mbeten prioritete të Kosovës.
Në këtë kontekst, u vlerësua roli i Hungarisë si partnere e Kosovës në fushën e sigurisë, përmes kontributit të saj të vazhdueshëm në misionin e NATO-s. U theksua gjithashtu rëndësia e forcimit të marrëdhënieve ekonomike dhe bashkëpunimit institucional ndërmjet dy vendeve.
Zulfaj vlerësoi shkëmbimin përmbajtësor të pikëpamjeve me z. Klein, si dhe perspektivën e Hungarisë si vend i Evropës Qendrore, me përvojë në procesin e anëtarësimit në BE dhe si pjesë e grupit “Miqtë e Ballkanit Perëndimor”. Ai shprehu interesimin për vazhdimin e dialogut dhe thellimin e bashkëpunimit.
Burimi: RTKLive