Kombëtarja e Kosovës ka vazhduar sot (e martë) përgatitjet për dy ndeshjet e ardhshme në Ligën e Kombeve, duke zhvilluar seancën e dytë stërvitore në prag të përballjeve kundër Izraelit dhe Irlandës.
Atmosfera në kampin e Dardanëve është shumë e mirë, me futbollistët që po punojnë me përkushtim për t’u përgatitur sa më mirë për dy sfidat e rëndësishme që i presin.
Në stërvitjen e sotme kanë qenë të pranishëm pothuajse të gjithë futbollistët e ftuar nga përzgjedhësi, me përjashtim të Lumbardh Dellovës, i cili mungoi në këtë seancë.
Ndërkohë, rikthimi në Kombëtare ka sjellë emocione pozitive për Betim Fazliji dhe Kreshnik Hajrizin, të cilët janë shprehur të lumtur që sërish janë pjesë e Dardanëve.
Të dy futbollistët kanë shprehur optimizëm për dy ndeshjet e ardhshme, duke besuar se Kosova mund të arrijë rezultate pozitive dhe ta vazhdojë me sukses rrugëtimin në Ligën e Kombeve.
Dardanët do të vazhdojnë me seancat stërvitore në ditët në vijim, me synimin që të jenë në formën më të mirë të mundshme për dy sfidat e radhës. /Telegrafi/
