Category: Lajme

  • Mbahet seanca gjyqësore për sulmin në kanalin e “Ibër-Lepencit”

    Mbahet seanca gjyqësore për sulmin në kanalin e “Ibër-Lepencit”

    Sipas dosjes së Prokurorisë Speciale të Republikës së Kosovës, Jovan Viqentijeviq dyshohet se, së bashku me vëllain e tij, Dragisha Viqentijeviq, ka dëmtuar qëllimisht infrastrukturën e kanalit, duke përdorur eksploziv, me qëllim të kryerjes së veprës penale të terrorizmit.

    Në këtë rast është i akuzuar edhe Igor Dimoviq, i cili nuk ndodhet në paraburgim. Ndërkaq, dy vëllezërit Viqentijeviq janë duke u mbajtur në paraburgim.

    Shpërthimi në kanalin e “Ibër-Lepencit” ndodhi në nëntor të vitit 2024, ndërsa dyshohet se u përdorën rreth 20 kilogramë eksplozivë. Si pasojë, u shkaktuan dëme në infrastrukturën jetike të furnizimit me ujë, duke ngritur shqetësime për sigurinë e infrastrukturës kritike në Kosovë.

    Autoritetet e Kosovës e kanë cilësuar ngjarjen si sulm terrorist, ndërsa kanë ngritur akuza ndaj Serbisë për përgjegjësi lidhur me rastin.

    Në shkurt të vitit 2026, të akuzuarit u deklaruan të pafajshëm para gjykatës. Në kuadër të procesit gjyqësor, pritet të shqyrtohen provat e paraqitura nga Prokuroria, si dhe pretendimet dhe qëndrimet e mbrojtjes.

    Seanca në Pallatin e Drejtësisë në Prishtinë pritet të jetë pjesë e procesit gjyqësor për zbardhjen e plotë të rrethanave të sulmit ndaj kanalit të “Ibër-Lepencit”.

    Burimi: RTKLive

  • Moti: Nga 1°C në 19°C, vranësira dhe intervale me diell

    Moti: Nga 1°C në 19°C, vranësira dhe intervale me diell

    Moti: Nga 1°C në 19°C, vranësira dhe intervale me diell

    Moti gjatë ditës së sotme do të jetë kryesisht i vranët, por nuk do të mungojnë edhe intervalet kohore me diell.

    Temperaturat minimale, sipas Institutit Hidrometerologjik, do të lëvizin nga 1 deri në 4°C, ndërsa ato maksimale pritet të arrijnë nga 15 deri në 19°Cm transmeton Klankosova.tv

    Era do të fryjë nga drejtimi i veriperëndimit, me shpejtësi prej 1 deri në 3 m/s.

  • Mblidhet Kryesia e Kuvendit, këto janë tri pikat e rendit të ditës

    Mblidhet Kryesia e Kuvendit, këto janë tri pikat e rendit të ditës

    Mblidhet Kryesia e Kuvendit, këto janë tri pikat e rendit të ditës

    Kryesia e Kuvendit të Kosovës do të mblidhet sot, për të diskutuar tri pika që lidhen me organizimin e seancës së ardhshme plenare.

    Sipas planifikimeve, seanca plenare do të përfshijë deklarimet jashtë rendit të ditës dhe pyetjet parlamentare, në përputhje me Rregulloren e Kuvendit.

    Ndër çështjet që pritet të trajtohen është edhe formimi i Komisionit Ad-Hoc, i cili do të merret me përzgjedhjen e katër kandidatëve për anëtarë të Bordit të Radiotelevizionit të Kosovës (RTK).

    Po ashtu, pritet të hidhet në votim propozimi i Listës Serbe për emërimin e deputetëve në komisionet parlamentare./Klankosova.tv

  • Kryesia e Kuvendit mblidhet në orën 11:00

    Kryesia e Kuvendit mblidhet në orën 11:00

    Në kuadër të përgatitjeve për seancën plenare, anëtarët e kryesisë pritet të shqyrtojnë disa pika, përfshirë miratimin e procesverbalit nga seanca e mëparshme, deklarimet jashtë rendit të ditës dhe pyetjet parlamentare.

    Një nga çështjet kryesore të rendit të ditës është formimi i Komisionit Ad-Hoc për përzgjedhjen e kandidatëve për anëtarë të Bordit të Radiotelevizionit të Kosovës (RTK). Komisioni do të jetë përgjegjës për përzgjedhjen e kandidatëve për dy anëtarë nga komuniteti shqiptar, një anëtar nga komuniteti serb dhe një anëtar nga komunitetet joshumicë.

    Po ashtu, në rend dite është edhe votimi i propozimit të Grupit Parlamentar të Listës Serbe për emërimin e deputetëve në komisionet parlamentare.

    Në fund të mbledhjes, Kryesia do të shqyrtojë edhe propozimet dhe kërkesat e paraqitura.

    Burimi: RTKLive

  • java nis me mot të butë, reshje shiu priten të enjten dhe të premten

    java nis me mot të butë, reshje shiu priten të enjten dhe të premten

    Temperaturat do të mbeten relativisht të buta për këtë periudhë të vitit, ndërsa era do të fryjë kryesisht nga drejtimet jugperëndimore dhe veriperëndimore, me intensitet të ulët deri mesatar.

    Sot, parashikohet mot kryesisht i vranët, me intervale me diell. Temperaturat minimale do të lëvizin nga 1 deri në 4 gradë Celsius, ndërsa ato maksimale nga 15 deri në 19 gradë.

    Të martën, moti pritet të jetë me diell dhe vranësira të shpërndara. Temperaturat minimale do të jenë nga 4 deri në 7 gradë Celsius, ndërsa maksimalet nga 16 deri në 20 gradë.

    Të mërkurën, do të ketë vranësira dhe intervale me diell, ndërsa temperaturat maksimale pritet të arrijnë deri në 21 gradë Celsius. Era do të fryjë nga jugperëndimi, me shpejtësi prej 1 deri në 4 metra në sekondë.

    Të enjten, parashikohet mot me diell dhe vranësira të shpërndara. Megjithatë, shtimi i vranësirave gjatë ditës mund të sjellë reshje shiu në disa zona. Temperaturat minimale do të lëvizin nga 4 deri në 7 gradë Celsius, ndërsa maksimalet mund të arrijnë deri në 21 gradë.

    Të premten, moti do të vazhdojë të jetë i ndryshueshëm, me shtim të vranësirave dhe mundësi për reshje shiu në disa pjesë të vendit. Temperaturat minimale do të jenë nga 4 deri në 9 gradë Celsius, ndërsa maksimalet nga 14 deri në 17 gradë. Era do të fryjë nga veriperëndimi, me shpejtësi prej 1 deri në 5 metra në sekondë.

    Sipas parashikimit meteorologjik, pjesa e parë e javës pritet të jetë kryesisht e qëndrueshme, me intervale me diell dhe temperatura relativisht të larta për këtë periudhë. Ndërkaq, të enjten dhe të premten rriten gjasat për reshje shiu në disa zona të Kosovës.

    Burimi: RTKLive

  • I pandalshëm edhe në moshën 39-vjeçare: Messi shkëlqen dhe thyen rekord historik në MLS

    I pandalshëm edhe në moshën 39-vjeçare: Messi shkëlqen dhe thyen rekord historik në MLS

    I pandalshëm edhe në moshën 39-vjeçare: Messi shkëlqen dhe thyen rekord historik në MLS

    Lionel Messi po vazhdon të dominojë futbollin amerikan, duke vërtetuar se mosha për të mbetet thjesht një numër.

    Ylli argjentinas ishte protagonisti kryesor në fitoren 3-1 të Inter Miamit në udhëtim ndaj Atlanta United, duke shënuar dy gola spektakolarë dhe duke e çuar në 25 numrin e përgjithshëm të realizimeve për këtë edicion në Major League Soccer (MLS).

    Kjo sfidë shënoi edhe rikthimin e tij në “Mercedes-Benz Stadium” për herë të parë që nga gjysmëfinalja e paharrueshme e Kupës së Botës 2026, ku Argjentina eliminoi Anglinë.

    Përveç dopietës, 39-vjeçari vendosi një tjetër standard të paprecedentë në SHBA: me 25 gola dhe 15 asistime gjatë këtij sezoni, Messi u bë futbollisti i parë në historinë e MLS-së që arrin të paktën 15 asistime në tri edicione radhazi.

    Goli i parë i takimit dhuroi magji të pastër: tetë herë fituesi i Topit të Artë mori topin nga mesi i fushës, dribloi mbrojtjen vendase dhe, pas një kombinimi të shpejtë me shokun e skuadrës, e dërgoi topin në rrjetë me goditje të menjëhershme. Më pas, ai vulosi edhe golin e tij të 25-të, duke blinduar kryesimin në garën për këpucën e artë.

    Paraqitja mbresëlënëse la pa fjalë edhe trajnerin e Inter Miamit, Kily Gonzalez, i cili pas ndeshjes nuk i kurseu elozhet për kapitenin e tij.

    “Nuk mund ta besoj që ky njeri bën gjëra të tilla në moshën 39-vjeçare. Ajo që më gëzon më shumë është se ai ndihet i lumtur. Kur Messi është i lumtur, ai luan në këtë mënyrë dhe e shijon lojën. Për mua, ai është një jashtëtokësor. Më mahnit me çdo lëvizje dhe në çdo seancë stërvitore”, deklaroi Gonzalez.

  • Hoffenheimi ia dedikon fitoren  Albian Hajdarit

    Hoffenheimi ia dedikon fitoren  Albian Hajdarit

    Hoffenheimi ia dedikon fitoren  Albian Hajdarit

    Hoffenheimi ka regjistruar një fitore tejet të rëndësishme në udhëtim ndaj Borussia Monchengladbachut, duke shënuar kështu suksesin e parë jashtë fushe për këtë edicion garues.

    Ndonëse e nisën kampionatin me luhatje dhe formë të zbehtë, duket se gjermanët tashmë po e gjejnë ritmin e tyre me synimin e qartë për t’u ngjitur sa më shpejt në pjesën e epërme të renditjes tabelare, transmeton Klankosova.tv.

    Megjithatë, ajo që ra në sy pas këtij triumfi ishte dedikimi special nga klubi. Hoffenheimi këtë fitore ua kushtoi dy lojtarëve të lënduar, mbrojtësit të Kosovës Albian Hajdari dhe mesfushorit Nathan de Cat, të cilët aktualisht janë jashtë fushave të blerta.

    Për Hajdarin ky është një moment i vështirë. Pasi la pas lëndimin e pësuar gjatë grumbullimit me Kombëtaren e Kosovës, mbrojtësi pësoi një goditje të re në këmbë gjatë stërvitjeve me ekipin gjerman, çka do ta mbajë atë jashtë për disa javë.

    Ky lëndim ngre alarmin edhe te “Dardanët”, pasi mbetet ende në pikëpyetje nëse Hajdari do të arrijë të rikuperohet në kohë për dy sfidat vendimtare të muajit nëntor ndaj Izraelit dhe Irlandës.

  • Katër gola në “Bernabeu”, Real Madridi shkëlqen ndaj Sevillës para ‘El Clasicos’

    Katër gola në “Bernabeu”, Real Madridi shkëlqen ndaj Sevillës para ‘El Clasicos’

    Katër gola në “Bernabeu”, Real Madridi shkëlqen ndaj Sevillës para ‘El Clasicos’

    Real Madridi ka vazhduar serinë mbresëlënëse në La Liga duke arkëtuar fitoren e tetë radhazi në shtëpi, pasi mposhti pastër Sevillën me rezultat bindës 4-1 në “Santiago Bernabeu”. Me këto tre pikë, skuadra e drejtuar nga Jose Mourinho ka ngushtuar sërish në gjashtë pikë distancën me liderin e tabelës, Barcelonën.

    Pas triumfit dramatik 4-3 ndaj Romës në Champions League gjatë mesjavës, “Los Blancos” e kthyen vëmendjen te kampionati me synimin e qartë për të mos lejuar shkëputjen e katalanasve, të cilët kishin fituar sfidën e tyre të shtunën.

    Rrugën drejt fitores e hapi talenti turk Arda Guler në minutën e 30-të përmes një goditjeje të harkuar mjeshtërore, i shërbyer nga Yan Diomande pas një aksioni të nisur nga Jude Bellingham.

    Vetëm shtatë minuta më vonë, Kylian Mbappe dyfishoi shifrat. Bellingham dhuroi një asist spektakolar me thembër për francezin, i cili e kontrolloi topin me klas dhe shënoi nga afërsia për 2-0.

    Në pjesën e dytë, Mbappe shënoi të dytin personal dhe të tretin për skuadrën nga pika e bardhë, duke realizuar me një parabolë elegante të stilit “Panenka”, pasi më herët Diomande fitoi penalltinë.

    Mysafirët arritën të ngushtonin shifrat përmes Manuel Buenos, i cili shfrytëzoi një huti të mbrojtjes vendase.

    Megjithatë, festa e andaluzianëve zgjati vetëm dy minuta, pasi i riu Yan Diomande kurorëzoi paraqitjen mbresëlënëse me një goditje të fuqishme për rezultatin përfundimtar 4-1.

    Me këtë sukses, Real Madridi ngjitet në vendin e tretë duke lënë pas Real Betisin dhe shkon me moral të lartë drejt përballjes së madhe ‘El Clasico’ kundër Barcelonës fundjavën e ardhshme.

    Ndërkohë, Sevilla vazhdon mallkimin ndaj madrilenëve, duke regjistruar ndeshjen e 16-të radhazi pa fitore në takimet direkte mes tyre.

     

  • Rrjetet sociale dëmtojnë trurin

    Rrjetet sociale dëmtojnë trurin

    Rrjetet sociale dëmtojnë trurin

    Rrjetet sociale kanë revolucionarizuar mënyrën se si komunikojmë, por përdorimi i vazhdueshëm i tyre ngre shqetësime për ndikimin në përqendrimin dhe aftësinë për të menduar në mënyrë kritike.

    Në një kohë kur informacioni shpërndahet me shpejtësi dhe përdoruesit përballen çdo ditë me një numër të madh mesazhesh, lajmesh dhe njoftimesh, mbingarkesa informative mund të ndikojë në mënyrën se si njerëzit përpunojnë dhe vlerësojnë atë që lexojnë, shkruan eo, transmeton Klankosova.tv.

    Sipas neuroshkencëtarit Lamberto Maffei, rrjetet sociale mund të funksionojnë si një lloj “proteze” për trurin, duke ndikuar në mënyrën se si individët formojnë mendimet dhe gjykimet e tyre. Ekspozimi i vazhdueshëm ndaj mesazheve të përsëritura dhe informacioneve të ngjashme nga platforma të ndryshme mund të nxisë konsumimin pasiv të përmbajtjes, në vend të analizës së saj.

    Një tjetër shqetësim lidhet me rrezikun që përdoruesit të ndikohen më shumë nga mesazhet që përsëriten shpesh ose që përcillen me tone të forta, pa i shqyrtuar në mënyrë të pavarur faktet dhe burimet.

    Përhapja e telefonave inteligjentë dhe varësia gjithnjë e më e madhe nga komunikimi digjital e kanë bërë të vështirë shkëputjen nga rrjedha e pandërprerë e informacionit. Në këto kushte, zhvillimi i mendimit kritik dhe aftësia për të dalluar informacionin e besueshëm nga ai i pasaktë bëhen gjithnjë e më të rëndësishme.

    Maffei thekson rëndësinë e edukimit të brezave të rinj me ndjenjën e përgjegjësisë, duke nxitur leximin, mendimin e pavarur dhe interesin për shkencën.

  • Macron dënon dhunën në Francë: Përgjegjësit për trazirat do të japin llogari

    Macron dënon dhunën në Francë: Përgjegjësit për trazirat do të japin llogari

    Në një fjalim televiziv të dielën, Macron deklaroi se “asgjë nuk i justifikon” skenat e dhunës në qytetet franceze, ku një ndërtesë historike e bashkisë në Limoges u përfshi nga flakët, raporton Euronews.

    “Ata që plaçkitën do të duhet të paguajnë për dëmet, ndërsa ata që synuan të rrëzonin Republikën do të mbahen përgjegjës”, deklaroi Macron.

    Presidenti francez pranoi pakënaqësinë dhe zemërimin e qytetarëve, por dënoi ata që i cilësoi si “elementë kryengritës të së majtës radikale, të cilëve iu bashkuan shumë kriminelë”. Ai u bëri thirrje të gjithë politikanëve që ta dënojnë dhunën.

    Macron theksoi se duhet bërë dallimi mes qytetarëve që protestojnë në mënyrë paqësore për kërkesa legjitime dhe atyre që i shfrytëzojnë demonstratat për të shkatërruar dhe plaçkitur.

    Sipas Euronews, fjalimi i presidentit erdhi në një kohë kur ai, ministri i Brendshëm dhe kryeministri po përballen me kritika për mënyrën e menaxhimit të operacioneve policore gjatë protestave.

    Udhëheqësja e ekstremit të djathtë, Marine Le Pen, e cila kryeson në sondazhet për zgjedhjet presidenciale të prillit të ardhshëm, e akuzoi Macronin për qëndrim tepër të butë, ndërsa grupet progresiste dhe të Gjelbrit kritikuan përdorimin e tepruar të forcës policore ndaj protestuesve.

    Ndërkohë, udhëheqësi i së majtës radikale, Jean-Luc Mélenchon, është akuzuar nga kritikët për nxitje të kaosit dhe dhunës së mëtejshme.

    Macron nuk njoftoi masa shtesë sigurie, por tha se autoritetet lokale do të bashkëpunojnë drejtpërdrejt me policinë për mbrojtjen e qyteteve, ndërtesave publike dhe dyqaneve.

    Protestat e së shtunës në qytetet kryesore të Francës nisën për shkak të kostos së jetesës dhe përkeqësimit të kushteve të studentëve. Demonstratat fillimisht paqësore u shndërruan në trazira, me plaçkitje, zjarre dhe dëme të shumta materiale.

    Sipas shifrave zyrtare, më shumë se 2.000 persona janë arrestuar, ndërsa mbi 600 policë, xhandarë dhe zjarrfikës janë lënduar.

    Trazirat ndodhin në prag të zgjedhjeve presidenciale të vitit të ardhshëm. Macron deklaroi se Franca meriton zgjedhje të karakterizuara nga debati dhe jo nga dhuna.

    Burimi: RTKLive