Category: Lajme

  • Prokuroria Speciale ngre aktakuzë ndaj një personi për pjesëmarrje në grup kriminal

    Prokuroria Speciale ngre aktakuzë ndaj një personi për pjesëmarrje në grup kriminal

    Prokuroria Speciale ngre aktakuzë ndaj një personi për pjesëmarrje në grup kriminal

    Prokuroria Speciale ka ngritur aktakuzë ndaj të pandehurit me inicialet F.A., për veprën penale “Pjesëmarrja ose organizimi i grupit kriminal të organizuar”, lidhur me veprën penale “Mashtrimi”.

    Aktakuza është dorëzuar në Gjykatën Themelore në Prishtinë.

    Sipas Prokurorisë, F.A. dyshohet se gjatë periudhës nga shtatori i vitit 2012 deri në qershor të vitit 2013, në Vushtrri, ka vepruar si anëtar i një grupi kriminal të organizuar.

    Ky grup, sipas aktakuzës, kishte për qëllim përfitimin e kundërligjshëm të dobisë pasurore përmes realizimit të kredive bujqësore në një institucion bankar, transmeton Klankosova.tv.

  • Bedri Hamza i prerë: PDK nuk pranon kushte! (VIDEO)

    Bedri Hamza i prerë: PDK nuk pranon kushte! (VIDEO)

    Bedri Hamza i prerë: PDK nuk pranon kushte! (VIDEO)

    Kreu i Partisë Demokratike të Kosovës, Bedri Hamza, në një konferencë për media ka bërë të ditur se partia që ai e drejton nuk pranon kushte.

    Ai tha se Projektligji për Ndryshimin e Ligjit për Gjykatën Speciale duhet të kalojë sot, transmeton Klankosova.tv.

    “PDK nuk pranon kushte. Flasim me respekt, flasim me prioritete. Ligji nuk është veç për PDK-në. Dje është proceduar në seancë Ligji, është votu në lexim të parë. Jam në shpresë dhe i thërras prapë që të vijnë në seancë dhe ta procedojmë në lexim të dytë”, tha i pari i PDK-së.

  • A e voton PDK çdo emër të VV-së për president, që Projektligji për Specialen të kryhet?

    A e voton PDK çdo emër të VV-së për president, që Projektligji për Specialen të kryhet?

    A e voton PDK çdo emër të VV-së për president, që Projektligji për Specialen të kryhet?

    Kryetari i PDK-së, Bedri Hamza, është pyetur nëse partia e tij do ta votojë “çdo lloj emri për president”, në mënyrë që procesi për ndryshimin e Ligjit për Dhomat e Specializuara të përfundojë.

    Hamza ka thënë se deputetët e partisë që drejton kanë të drejtë të vendosin sipas bindjeve të tyre, raporton Klankosova.tv

    “PDK voton, megjithatë deputetëve kurrë nuk iu kërkoj t’i nënshtrohen çfarëdo vullneti të kërkujt. E kanë të drejtën e plotë që të votojnë sipas bindjeve të tyre”, tha Hamza.

    Megjithatë, ai shtoi se brenda grupit parlamentar diskutohen të gjitha temat, por çdo vendim respektohet.

    “Ka një harmoni, në grup parlamentar diskutojmë të gjitha temat. Debati është prezent. Në fund, vendimet i respektojmë”. /Klankosova.tv

  • Dy burra në Karolinën e Veriut ndalohen duke lëvizur në rrugë me një divan

    Dy burra në Karolinën e Veriut ndalohen duke lëvizur në rrugë me një divan

    Policia në Karolinën e Veriut ka hasur një prej mjeteve më të pazakonta të transportit në rrugët e qytetit, pasi ndaloi dy burra që po lëviznin mbi një divan të vërtetë.

    Departamenti i Policisë Charlotte-Mecklenburg tha në rrjetet sociale se bëhej fjalë për një rast “padyshim të veçantë”, pasi efektivët ndaluan dy persona që po udhëtonin në rrugën S. Tryon Street… mbi një divan.

    Po, një divan i vërtetë. Fotot nga vendi i ngjarjes tregojnë mobilien të vendosur mbi dy skuterë elektrikë, me dy burrat duke e përdorur atë si një lloj mjeti transporti.

    Policia, ndonëse e pranoi kreativitetin e tyre, u kujtoi qytetarëve se siguria duhet të jetë gjithmonë prioritet në rrugë, transmeton Telegrafi.

    “Pavarësisht se çfarë po ‘drejtoni’ – nëse mund ta quajmë kështu – ju lutemi mendoni së pari për sigurinë”, shkroi policia, duke paralajmëruar se mjete të tilla mund të befasojnë shoferët e automjeteve dhe t’i shpërqendrojnë ata gjatë drejtimit.

    Efektivët ngritën edhe një pyetje për qytetarët: nëse një mjet i pazakontë në rrugë mund të shkaktojë hutim apo reagime të pasigurta nga shoferët e tjerë, ndoshta është më mirë të rishikohet ideja e përdorimit të tij.

    Nuk është bërë e ditur nëse dy burrat janë gjobitur apo kanë marrë ndonjë masë tjetër për këtë udhëtim të pazakontë.

    Në fund, policia nuk e la pa një batutë rastin, duke sugjeruar se, si rregull, mobiliet që lëvizin është më mirë t’ia lëmë IKEA-s. /Telegrafi/

  • Më 13 tetor i skadon arresti shtëpiak, Grubi ofron 335 mijë euro garanci për marrjen e pasaportës

    Më 13 tetor i skadon arresti shtëpiak, Grubi ofron 335 mijë euro garanci për marrjen e pasaportës

    Ish-zëvendëskryeministri, Artan Grubi i cili në rastin e “Lotarisë” ndodhet në cilësinë e të akuzuarit të tretë, më 13 tetor pritet t’i ndërpritet masa e arrestit shtëpiak.

    Për të garantuar mos arratisjen dhe për t’i kthyer pasaportën, Grubi ka ofruar garanci prej 335 mijë eurove.

    Grubi në arrest shtëpie ndodhet që 23 shkurti i këtij viti kur pas gati 15 muajve arrati u dorëzua vullnetarisht në pikën kufitare Bllacë.

    Masa e arrestit shtëpiak ju caktua mbi bazën e raporteve nga shërbimet inteligjente se siguria e tij private dhe familjare janë të cenuara.

    Grubi në rastin “Lotaria” akuzohet se në ditën kur është sjell vendimi për ri-organizimin e industrisë së lojërave të fatit, ai ka udhëhequr me seancën e Qeverisë.

    Në fillim flet-arresti ndaj tij ishte lëshuar për “mashtrim në shërbim ndërsa më pas u rikualifikua në “shpërdorim të detyrës zyrtare”.

    Gjatë gjykimit ka deklaruar se nuk ndjehet fajtor për veprën e cila i ngarkohet dhe se pika për të cilën prokuroria e ndjek penalisht është miratuar në Qeveri më votim unanim, ndërsa e njëjta paraprakisht kishte marrë pëlqimin e Ministrisë së Financave.

    Dëmi në buxhet sipas prokurorisë arrin gati 10 milion euro. Një muaj më parë, organeve të ndjekjes penale ju dorëzua edhe i akuzuari i parë për këtë vepër, Përparim Bajrami.

  • WhatsApp mund të bllokojë hyrjen në llogari në telefonat me Android dhe iOS të vjetër

    WhatsApp mund të bllokojë hyrjen në llogari në telefonat me Android dhe iOS të vjetër

    WhatsApp raportohet se ka nisur testimin e një funksioni të ri sigurie që mund t’ua bllokojë përdoruesve hyrjen në llogari nëse telefoni i tyre përdor një version të vjetër të Android ose iOS.

    Sipas një raporti të ri, funksioni po shpërndahet përmes një përditësimi nga serveri, që do të thotë se përdoruesit nuk kanë nevojë të instalojnë një version specifik të aplikacionit për ta marrë atë. Funksioni duket se po shpërndahet si për pajisjet Android, ashtu edhe për iPhone.

    Nëse WhatsApp përcakton se sistemi operativ i telefonit është shumë i vjetër, përdoruesi mund të përballet me një ekran që e pengon të hyjë në llogarinë e tij. Në të njëjtën kohë, aplikacioni udhëzon përdoruesin të hapë Settings në telefon dhe të instalojë përditësimin më të fundit të disponueshëm të sistemit.

    Pas përditësimit të sistemit operativ, përdoruesi mund të provojë sërish të hyjë në WhatsApp dhe, nëse pajisja plotëson kërkesat, hyrja duhet të funksionojë normalisht, transmeton Telegrafi.

    Ekrani i ri gjithashtu tregon se si mund të kontrollohet versioni aktual i Android ose iOS. Sipas raportit, përdoruesit nuk do të kenë mundësi ta anashkalojnë këtë kërkesë.

    Arsyeja kryesore besohet të jetë siguria. Versionet e vjetra të sistemeve operative mund të përmbajnë dobësi të njohura që mund të shfrytëzohen nga sulmuesit për instalimin e programeve keqdashëse.

    Edhe pse WhatsApp përdor enkriptim nga skaji në skaj për mesazhet dhe thirrjet, kjo nuk e mbron domosdoshmërisht përdoruesin nëse pajisja e tij është komprometuar. Për shembull, një përdorues mund të marrë nga një kontakt i besuar një lidhje që instalon malware në telefon.

    Megjithatë, ende nuk dihet se cilat versione të Android dhe iOS do të preken nga kjo masë. WhatsApp nuk ka njoftuar zyrtarisht se për cilat pajisje apo versione të sistemit operativ do të aktivizohet funksioni.

    Prandaj, nëse përdoruesit shfaqet një njoftim që kërkon përditësimin e sistemit operativ para hyrjes në WhatsApp, kjo mund të jetë pjesë e masave të reja të sigurisë së platformës. /Telegrafi/

  • Renault rikthen Espace në rrënjë, koncepti i ri elektrik synon t’i bëjë minifurgonët sërish tërheqës

    Renault rikthen Espace në rrënjë, koncepti i ri elektrik synon t’i bëjë minifurgonët sërish tërheqës

    Renault po përgatitet të rikthejë një nga modelet më ikonike në historinë e saj te filozofia që e bëri të famshëm. Kompania franceze do të prezantojë konceptin e ri E-Space Concept më 12 tetor, gjatë Panairit të Automjeteve në Paris, duke e riinterpretuar idenë e “voiture à vivre” – makinës së krijuar për të jetuar dhe udhëtuar me sa më shumë hapësirë e fleksibilitet.

    Prezantimi vjen në një moment interesant për emrin Espace. Modeli që Renault ende shet sot nuk është më një minivan tradicional, por një SUV. Gjenerata e gjashtë ka pozicion më të lartë, dimensione dhe elemente tipike të një SUV-je, duke u larguar ndjeshëm nga koncepti origjinal i modelit.

    E-Space Concept duket se synon pikërisht rikthimin te kjo filozofi. Renault thotë se koncepti është një interpretim modern i Espace të parë, të prezantuar në vitin 1984, një model që në atë kohë ishte novator për mënyrën se si shfrytëzonte hapësirën.

    I zhvilluar në bashkëpunim me Matra, Espace i parë ofronte një kabinë jashtëzakonisht të gjerë në raport me përmasat e jashtme, deri në shtatë vende dhe një konfigurim shumë fleksibël. Sediljet e pasme mund të hiqeshin ose riorganizoheshin, ndërsa ato të përparme mund të rrotulloheshin, duke e kthyer kabinën në një lloj salloni të vogël mbi rrota.

    Modeli luajti një rol të rëndësishëm edhe në krijimin dhe zhvillimin e segmentit evropian të MPV-ve dhe minivanëve. Në atë periudhë, tregu dominohej nga hatchback-ët, sedanët dhe karavanët, ndërsa Espace tregoi se një makinë familjare mund të ofronte hapësirë dhe fleksibilitet të jashtëzakonshëm pa u bazuar në një furgon tradicional.

    Megjithatë, suksesi nuk erdhi menjëherë. Në muajin e parë të shitjeve në Francë, Renault arriti të shiste vetëm nëntë Espace. Blerësve iu desh kohë të përshtateshin me idenë e një makine që nuk ishte as veturë tradicionale dhe as furgon. Me kalimin e viteve, koncepti u bë i suksesshëm dhe prodhues të tjerë iu bashkuan segmentit në rritje të MPV-ve.

    Ironikisht, ky segment më vonë u godit rëndë nga popullariteti i SUV-ve. Minivanët ofronin hapësirë të madhe, sedilje fleksibile, dukshmëri të mirë dhe përmasa relativisht kompakte, por humbën betejën e imazhit ndaj SUV-ve, të cilat u perceptuan si më moderne dhe më tërheqëse.

    Koncepti i ri i Renault duket se po përpiqet ta ndryshojë pikërisht këtë perceptim, transmeton Telegrafi.

    Nga pamja, E-Space Concept kombinon elemente retro me një dizajn futurist. Forma e kutizuar, mbivaret e shkurtra dhe pjesa e përparme të kujtojnë Espace-in origjinal, ndërsa rrotat e mëdha, logoja e ndriçuar dhe kamerat në vend të pasqyrave anësore i japin një pamje moderne.

    Edhe dorezat tradicionale të dyerve janë zëvendësuar me elemente të integruara në vijën anësore të karrocerisë, duke krijuar një profil më të pastër.

    Renault nuk ka zbuluar ende specifikat teknike, por ka konfirmuar se koncepti është 4.7 metra i gjatë, afërsisht sa Espace-i aktual. Ndryshimi kryesor qëndron te sistemi i lëvizjes: shkronja “E” në emërtim tregon se koncepti është tërësisht elektrik.

    Ende nuk dihet nëse E-Space Concept do të mbetet vetëm një ushtrim dizajni apo do të shndërrohet në një model të prodhimit. Nëse Renault vendos ta çojë projektin në prodhim, ai mund të përballet me modele si Volkswagen ID. Buzz, një tjetër minivan elektrik që ndërthur teknologjinë moderne me nostalgjinë për një formë klasike të makinave familjare.

    Përgjigjja do të vijë më 12 tetor, kur Renault do ta zbulojë zyrtarisht E-Space Concept në Paris. Nëse koncepti shndërrohet në një model real, Renault mund të jetë duke provuar nëse minivanët mund të rikthehen në modë – këtë herë me motor elektrik. /Telegrafi/

  • Gjykata spanjolle heq urdhër-arrestin për Puigdemont, hapet rruga për kthimin e tij

    Gjykata spanjolle heq urdhër-arrestin për Puigdemont, hapet rruga për kthimin e tij

    Gjykata e Lartë e Spanjës ka hequr urdhër-arrestin kombëtar ndaj ish-presidentit të Katalonjës, Carles Puigdemont, duke larguar një nga pengesat kryesore ligjore për rikthimin e tij në Spanjë.

    Vendimi u mor nga gjyqtari Pablo Llarena, pasi Gjykata Kushtetuese e Spanjës mbështeti zbatimin e ligjit të amnistisë për personat e ndjekur penalisht në lidhje me përpjekjen për pavarësinë e Katalonjës, transmeton Telegrafi.

    Puigdemont jeton jashtë Spanjës që prej vitit 2017, kur u largua nga vendi pas shpalljes së njëanshme të pavarësisë së Katalonjës dhe ndërhyrjes së qeverisë qendrore përmes nenit 155 të Kushtetutës, i cili i mundësoi Madridit të merrte kontrollin e drejtpërdrejtë të rajonit.

    Çështja kryesore juridike lidhej me përdorimin e fondeve publike për financimin e referendumit të pavarësisë të 1 tetorit 2017 dhe nëse kjo vepër mund të përfshihej në ligjin e amnistisë të miratuar në vitin 2024.

    Gjykata e Lartë kishte refuzuar deri tani ta zbatonte amnistinë për akuzat për keqpërdorim fondesh, duke argumentuar se organizatorët e referendumit kishin përfituar personalisht financiarisht.

    Por Gjykata Kushtetuese e hodhi poshtë këtë interpretim në një vendim që lidhej me ish-ministren rajonale katalanase Dolors Bassa. Pas këtij vendimi, gjyqtari Llarena vendosi të heqë urdhër-arrestin ndaj Puigdemont.

    Vendimi ndryshon ndjeshëm situatën ligjore të ish-presidentit katalanas. Deri tani, nëse do të kthehej në Spanjë, ai rrezikonte arrestimin për shkak të urdhrit aktiv.

    Miratimi i ligjit të amnistisë në vitin 2024 kishte krijuar tashmë mundësinë për rikthimin e tij, por Gjykata e Lartë kishte mbajtur në fuqi urdhër-arrestin kombëtar.

    Puigdemont u kthye për pak kohë në Barcelona në gusht të vitit 2024, për të marrë pjesë në një aktivitet që përkonte me votimin për emërimin e Salvador Illas si president i Katalonjës. Ai u shfaq publikisht, por më pas u largua sërish nga Spanja pa u arrestuar.

    Pas vendimit të ri gjyqësor, rikthimi i Puigdemont në Spanjë duket më i mundshëm se në çdo moment tjetër që nga largimi i tij në vitin 2017.

    Puigdemont, i cili aktualisht jeton në Waterloo të Belgjikës, ka planifikuar një konferencë për media të martën në mbrëmje, ku pritet të bëjë një “deklaratë institucionale”. Në aktivitet pritet të marrin pjesë edhe ish-ministrat katalanas Antoni Comín dhe Lluís Puig. /Telegrafi/

  • Nga paraqitjet brilante, te partneriteti me Dellovën dhe objektivat e Kosovës – Ilir Krasniqi rrëfehet për Telegrafin

    Nga paraqitjet brilante, te partneriteti me Dellovën dhe objektivat e Kosovës – Ilir Krasniqi rrëfehet për Telegrafin

    Mbrojtësi i Kosovës, Ilir Krasniqi, ishte ndër futbollistët më të dalluar të Dardanëve në katër ndeshjet e para të Ligës së Kombeve, duke luajtur të gjitha 360 minutat ndaj Austrisë, Irlandës dhe Izraelit. Në intervistën për Telegrafin, ai flet për paraqitjet e tij, statistikat e UEFA-s, bashkëpunimin me Lumbardh Dellovën dhe objektivat për dy ndeshjet e fundit të këtij cikli.

    Ilir Krasniqi ka qenë një nga lojtarët më të qëndrueshëm të Kosovës në katër ndeshjet e para të këtij cikli të Ligës së Kombeve. Mbrojtësi i Dardanëve ka luajtur çdo minutë në dy përballjet me Austrinë, si dhe në ndeshjet ndaj Irlandës dhe Izraelit, duke u shndërruar në një nga pikat kryesore të repartit mbrojtës të Kosovës.

    Paraqitjet e tij janë shoqëruar edhe me statistika të rëndësishme, pasi Krasniqi dhe Lumbardh Dellova janë ndër lojtarët me më së shumti topa të rikuperuar në Ligën e Kombeve, ndërsa mbrojtësi kosovar renditet edhe në top-pesëshen e kësaj gare për ndërhyrjet rrëshqitëse.

    Në një intervistë për Telegrafin, Krasniqi ka folur për këtë cikël, paraqitjet personale, bashkëpunimin me Dellovën dhe objektivin e Kosovës për dy ndeshjet e nëntorit.

    Duke folur për katër ndeshjet e para dhe mënyrën se si e vlerëson këtë cikël, Krasniqi tha se Dardanët janë përballur me sfida të vështira, por në përgjithësi kanë bërë mirë.

    “Po, padyshim që kanë qenë katër ndeshje mjaft të vështira, me një intensitet shumë të mirë. Mendoj se kemi bërë mirë në këto katër ndeshje, duke parë edhe rrjedhën e tyre dhe kundërshtarët me të cilët jemi përballur”, ka thënë fillimisht Krasniqi për Telegrafin.

    Sa i përket paraqitjeve të tij dhe faktit se ka luajtur çdo minutë në këto katër ndeshje, mbrojtësi kosovar u shpreh i lumtur me kontributin e dhënë për ekipin.

    “Po, këto ndeshje i kam shijuar çdo minutë të të qenurit në fushë. Mendoj se kjo ka ndikuar pozitivisht edhe në paraqitjet e mia dhe jam mjaft i lumtur që kam mundur të jap ndihmën dhe kontributin tim për ekipin, në mënyrë që të kemi paraqitje sa më pozitive”.

    Krasniqi foli edhe për statistikat e UEFA-s dhe bashkëpunimin me Lumbardh Dellovën, duke theksuar se ndeshjet e zhvilluara së bashku kanë ndikuar në rritjen e mirëkuptimit mes tyre.

    “Po, është e vërtetë. Janë momente mjaft domethënëse dhe jam shumë i lumtur për këtë. Besoj se ka ndikuar edhe fakti që kemi pasur disa ndeshje të zhvilluara së bashku. Dellova është një lojtar me shumë cilësi dhe kjo e bën më të lehtë bashkëpunimin tonë në fushë”, shtoi 26-vjeçari.

    Ndërkohë, duke folur për numrin e madh të ndërhyrjeve rrëshqitëse dhe stilin e tij të mbrojtjes, Krasniqi e lidhi këtë edhe me leximin e lojës dhe mënyrën se si ka luajtur Kosova.

    “Po, besoj se është pak edhe stil personal, sidomos sa i përket leximit të lojës. Gjithashtu, mënyra se si kemi luajtur me Kosovën e ka bërë këtë edhe më të dukshme në fushë”.

    Në lidhje me dy ndeshjet e fundit të nëntorit, ndaj Izraelit dhe Irlandës, Krasniqi pranoi se Dardanët i presin sfida të vështira, por beson se forca e grupit dhe mbështetja e tifozëve mund të bëjnë diferencën.

    “Na presin ndeshje mjaft të vështira. Duke parë që kemi luajtur më herët me këto ekipe, e kemi parë forcën e tyre dhe e dimë se çfarë na pret. Besoj se, si gjithmonë, fryma e grupit që kemi është shumë e mirë dhe duhet ta ndihmojmë njëri-tjetrin në fushë dhe të japim maksimumin. Kështu jemi shumë të fortë si ekip. Fakti që do të luajmë në shtëpi do të jetë një forcë dhe mbështetje e madhe nga tifozët tanë”.

    Në fund, Krasniqi foli për objektivin e Kosovës në dy ndeshjet e nëntorit, duke qenë i qartë se synimi i Dardanëve është të marrin maksimumin e pikëve.

    “Po, duke parë që i kemi këto pesë pikë, deri në nëntor do të jemi të përgatitur për të luftuar në maksimum dhe për të synuar pikët e plota. Sigurisht, si pjesë e këtij grupi, besoj shumë te ky ekip i bashkuar dhe te potenciali që kemi. Do të luftojmë të gjithë së bashku për dy fitore, për maksimumin e mundshëm dhe për ta arritur objektivin tonë”, përfundoi mbrojtësi i Kosovës.

    Ndryshe, ndeshja e raundit të pestë e Kosovës ndaj Izraelit është paraparë të luhet me 14 nëntor në stadiumin Fadil Vokrri në Prishtinë, ndërsa e fundit në grup ndaj Irlandës më 17 nëntor në Aviva Stadium të Dublinit. /Telegrafi/