Gjykata e Apelit e ka mbyllur për publikun seancën e Kolegjit ku do të elaborohen ankesat ndaj vendimit të Gjykatës Themelore në Prishtinë, me të cilin u shpallën fajtorë dhe u dënuan Naim Murseli, Granit Plava dhe Kushtrim Kokalla, për vrasjen e Liridona Ademajt më 29 nëntor 2023.
Me aktgjykimin e 21 prillit 2026, Gjykata Themelore në Prishtinë dënoi Naim Murselin dhe Granit Plavën me burgim të përjetshëm, ndërsa Kushtrim Kokallën me 30 vjet burgim, pasi u shpallën fajtorë për vrasjen e Liridona Ademajt, raporton “Betimi për Drejtësi“.
Kolegji i Apelit në këtë rast përbëhet nga Mentor Hajra- kryetar, Xhevdet Abazi- gjyqtar referues dhe Arben Hoti- anëtar.
Gjyqtari referues Abazi tha se në seancën e Apelit do të elaborohen ankesat e Prokurorisë Themelore në Prishtinë, e mbrojtësve të të akuzuarve: Shemsedin Piraj, Ndrecë Dodaj dhe Skender Dodaj, si dhe përfaqësuesit të palës së dëmtuar- avokatit Leutrim Sylaj.
Gjyqtari tha se Prokuroria dhe pala e dëmtuar, kanë paraqitur ankesë për shkak të vendimit mbi dënimin për të akuzuarin Kokalla, duke kërkuar edhe për të dënim me burgim të përjetshëm.
Kurse, Prokuroria e Apelit ka propozuar po ashtu që Kokallës t’i shqiptohet dënim me burgim të përjetshëm.
Më pas, gjyqtari Hajra bëri të ditur se seanca do të vazhdojë e mbyllur për publikun për shkak të rrethanave të rastit, gjegjësisht raportet familjare të palëve.
“Arsyet pse seanca do të vazhdojë e mbyllur, do t’i japë kolegji pasi publiku të largohet nga salla”, theksoi Hajra.
Burimi: Dukagjini