Category: Lajme

  • Mika Adams MVP i javës së pestë

    Mika Adams MVP i javës së pestë

    Adams ishte ndër më meritorët në fitoren e Rahovecit 029 ndaj Pejës me rezultat 106:95, duke regjistruar 31 pikë, gjashtë kërcime dhe dhjetë asistime, me indeks të përgjithshëm prej 35.

    Me këtë paraqitje, basketbollisti i Rahovecit 029 fitoi epitetin e MVP-së së javës së pestë të elitës së basketbollit të Kosovës.

    Përveç Adamsit, në pesëshen më të mirë të javës janë përzgjedhur edhe Kentrell Pullian i Vëllaznimit, Davontrey Thomas i Golden Eagle Yllit, Vincent Golson i Sigal Prishtinës dhe Kenny Hasbrouck i Trepçës.

    Top 5 lojtarët e javës së pestë

    Mika Adams (Rahoveci 029): 31 pikë, 6 kërcime, 10 asistime – Indeksi 35.

    Kentrell Pullian (Vëllaznimi): 28 pikë, 7 kërcime, 7 asistime.

    Davontrey Thomas (Golden Eagle Ylli): 26 pikë, 6 kërcime, 3 asistime – Indeksi 33.

    Vincent Golson (Sigal Prishtina): 30 pikë, 1 kërcim, 6 asistime – Indeksi 29.

    Kenny Hasbrouck (Trepça): 15 pikë, 2 kërcime, 2 asistime – Indeksi 17.

    Burimi: RTKLive

  • Gaxherri: Protesta në Shqipëri është pa kokë, do të shuhet së shpejti (VIDEO)

    Gaxherri: Protesta në Shqipëri është pa kokë, do të shuhet së shpejti (VIDEO)

    Gaxherri: Protesta në Shqipëri është pa kokë, do të shuhet së shpejti (VIDEO)

    Gazetari Ardian Gaxherri ka komentuar protestat që po zhvillohen prej disa ditësh në Shqipëri, duke i cilësuar ato si të paorganizuara dhe pa një udhëheqje të qartë.

    Në “Kosova Today”,  Gaxherri tha se protestës i mungon një këshill organizativ dhe se, sipas tij, kryeministri Edi Rama po i lejon protestat të vazhdojnë pa ndërhyrë drejtpërdrejt.

    “Kjo protestë është pa kokë, është si pula pa kokë që kërcen sa andej-këndej. Kjo protestë është pa këshill organizativ dhe, po të donte Edi Rama, për një ditë do ta…protestën. Rama po tregohet i zgjuar, po i lë këta adoleshentë të dalin e t’i vjedhin dyqanet. Kjo protestë së shpejti do të shuhet, sepse është protestë pa kokë”, deklaroi Gaxherri.

  • PE: Dënojmë dhunën gjatë protestave në Tiranë

    PE: Dënojmë dhunën gjatë protestave në Tiranë

    “Dënojmë përshkallëzimin e dhunshëm të këtyre protestave, sulmet ndaj institucioneve publike dhe shkatërrimin e pronës publike dhe private. U bëjmë thirrje protestuesve të tregojnë vetëpërmbajtje maksimale dhe të përmbahen nga çdo akt dhune, pasi veprime të tilla nuk kontribuojnë në gjetjen e një zgjidhjeje dhe nuk kanë vend në demokraci”, thuhet në deklaratën zyrtare të PE-së.

    Gjithashtu, Delegacioni i PE shpreh shqetësimin serioz për raportimet mbi përdorimin e tepruar të forcës policore ndaj protestuesve. “U bëjmë thirrje autoriteteve të tregojnë vetëpërmbajtje. Gjithashtu, u bëjmë thirrje organeve përkatëse të bëjnë gjithçka që është e mundur për të përcaktuar përgjegjësinë individuale për çdo akt dhune, përfshirë rastet e përdorimit të tepruar të forcës”.

    “Theksojmë se e drejta për lirinë e tubimit paqësor dhe lirinë e shprehjes mbrohet si nga Karta e të Drejtave Themelore të Bashkimit Evropian, ashtu edhe nga Konventa Evropiane për të Drejtat e Njeriut. Protestuesit, në këtë rast të rinjtë, kanë të drejtë të shprehin pikëpamjet e tyre, veçanërisht për çështje që ndikojnë drejtpërdrejt në të ardhmen e tyre. Për këtë arsye, u bëjmë thirrje autoriteteve të garantojnë ushtrimin e lirisë së tubimit, përfshirë edhe të drejtën për të protestuar në mënyrë paqësore”, thuhet në deklaratën zyrtare.

    “Bëjmë thirrje për një dialog paqësor, konstruktiv dhe serioz ndërmjet të gjitha palëve të interesuara, me synimin për të gjetur një zgjidhje konkrete për adresimin e çdo pakënaqësie të shprehur nga protestuesit, në përputhje me ligjet shqiptare dhe standardet evropiane. Respektimi i shtetit të së drejtës mbetet kriteri kryesor dhe kusht i detyrueshëm për përparimin e Shqipërisë në rrugën drejt anëtarësimit në Bashkimin Evropian, përfundon deklarata e Delegacionit të Parlamentit Evropian për marrëdhëniet me Shqipërinë.

    Burimi: RTKLive

  • Shpërthen Rabiot: Nuk e di nëse e merituam fitoren

    Shpërthen Rabiot: Nuk e di nëse e merituam fitoren

    Kuqezinjtë patën një epërsi të konsiderueshme, por në fund u detyruan të luftonin deri në minutat e fundit për ta ruajtur fitoren. Kjo paraqitje ka shqetësuar Rabiot, i cili nuk e ka fshehur pakënaqësinë e tij, pavarësisht tri pikëve të fituara.

    “E zhvilluam shumë mirë pjesën e parë, por më pas, çuditërisht, në të dytën e humbëm kontrollin e ndeshjes. Jam shumë i nervozuar, sepse nëse luajmë kështu në pjesën e dytë, atëherë nuk vlen asgjë paraqitja e mirë në të parën. Fatmirësisht fituam, por nuk e di nëse e merituam”, deklaroi mesfushori francez.

    Rabiot u ndal edhe te rënia e përqendrimit që Milani ka shfaqur në disa ndeshje, duke theksuar se problemi nuk lidhet me përgatitjen fizike, por me aspektin psikologjik dhe mentalitetin e skuadrës.

    “Problemi nuk është fizik, por psikologjik. Ishim në epërsi prej tre golash dhe më pas e ulëm vëmendjen dhe përqendrimin. Kur përballesh me një skuadër cilësore, rrezikon të barazohesh ose edhe të humbasësh”, u shpreh ai.

    Mesfushori theksoi se ekipi duhet të punojë më shumë në aspektin e mentalitetit, duke përfshirë edhe lojtarët që aktivizohen nga stoli.

    “E kam thënë edhe pas ndeshjes me Sassuolon se duhet të punojmë për mentalitetin. Edhe ata që hyjnë në fushë nga stoli duhet të japin më shumë dhe të përshtaten menjëherë me ritmin e ndeshjes. Futbolli është i tillë: nëse e humb përqendrimin, rrezikon ta humbësh ndeshjen”, theksoi Rabiot.

    Pavarësisht kritikave, francezi e pranoi rëndësinë e fitores ndaj Atalantës, por mesazhi i tij ishte i qartë: Milani duhet të përmirësojë qëndrueshmërinë gjatë gjithë ndeshjes, nëse dëshiron të arrijë objektivat e këtij sezoni.

    “Gjithsesi, janë tri pikë të rëndësishme”, përfundoi ai.

    Burimi: RTKLive

  • Zbulohen emrat e vëllezërve që u vranë në Kamëz, i plagosuri tjetër në gjendje të rëndë

    Zbulohen emrat e vëllezërve që u vranë në Kamëz, i plagosuri tjetër në gjendje të rëndë

    Zbulohen emrat e vëllezërve që u vranë në Kamëz, i plagosuri tjetër në gjendje të rëndë

    Një ngjarje e rëndë është shënuar mesditën e kësaj të hëne në Kamëz, ku dy vëllezër janë vrarë me armë zjarri ndërsa një i tretë është plagosur.

    Tre vëllezërit u përfshinë në një konflikt, i cili dyshohet të ketë nisur për motive banale.

    Abcnewsal, mëson se një prej viktimave, Selam Islamaj ka vdekur në vendin e ngjarjes, ndërsa vëllai i tij Nazmi Islamaj vdiq si pasojë e plagëve të marra në spital.

    Sakaq, te Trauma po merr mjekim Shefqet Islamaj, i cili mësohet se ka mbëtur i plagosur rëndë nga të shtënat me armë, transmeton Klankosova.tv

    Sakaq, autori i krimit të dyfishtë Ngushellim Manzi, fqinj me tre vëllezërit është arrestuar nga policia shqiptare.

  • Delegacioni i Parlamentit Evropian: Dënojmë përshkallëzimin e dhunshëm të protestave

    Delegacioni i Parlamentit Evropian: Dënojmë përshkallëzimin e dhunshëm të protestave

    Delegacioni i Parlamentit Evropian: Dënojmë përshkallëzimin e dhunshëm të protestave

    Delegacioni i Parlamentit Evropian për marrëdhëniet me Shqipërinë dhe raportuesi i përhershëm i shtetit shqiptar kanë shprehur shqetësimin e thellë për protestat.

    Ata dënuan përshkallëzimin e dhunshëm të protestave, sulmet ndaj institucioneve dhe dëmtimin e pronës publike e private, duke u bërë thirrje protestuesve për vetëpërmbajtje.

    Njëkohësisht, delegacioni ka shprehur shqetësim për raportimet mbi përdorimin e tepruar të forcës policore dhe kërkuan hetimin e çdo rasti dhune për të përcaktuar përgjegjësitë individuale, shkruan Tv Klan, transmeton Klankosova.tv.

    Ata theksuan se liria e tubimit dhe e shprehjes paqësore është një e drejtë themelore, veçanërisht për të rinjtë që kërkojnë të shprehin shqetësimet për të ardhmen e tyre.

    Në përfundim, Delegacioni i Parlamentit Evropian bën thirrje për dialog konstruktiv mes palëve, duke nënvizuar se respektimi i shtetit të së drejtës mbetet kusht thelbësor për përparimin e Shqipërisë drejt anëtarësimit në Bashkimin Evropian.

    Deklarata e Delegacionit të Parlamentit Evropian:

    Në emër të Delegacionit të Parlamentit Evropian për marrëdhëniet me Shqipërinë dhe si raportues i përhershëm i Parlamentit Evropian për Shqipërinë, shprehim shqetësimin tonë të thellë për ngjarjet e fundit që kanë ndodhur në vend, dhe në veçanti në Tiranë. 

    Ne dënojmë përshkallëzimin e dhunshëm të këtyre protestave, sulmet ndaj institucioneve publike dhe shkatërrimin e pronës publike dhe private. U bëjmë thirrje protestuesve të ushtrojnë vetëpërmbajtje maksimale dhe të përmbahen nga çdo akt dhune, pasi ato nuk kontribuojnë në një zgjidhje dhe nuk kanë vend në demokraci.

    Gjithashtu shprehim shqetësim serioz në lidhje me raportet për përdorim të tepruar të forcës policore kundër protestuesve. U bëjmë thirrje autoriteteve të përdorin përmbajtje. Gjithashtu u bëjmë thirrje organeve përkatëse të bëjnë çmos për të përcaktuar përgjegjësinë individuale për çdo akt dhune, përfshirë përdorimin e tepruar të forcës.

    Ne nënvizojmë se e drejta e lirisë së tubimit dhe shprehjes paqësore gëzon mbrojtje si nga Karta e BE-së për të Drejtat Themelore ashtu edhe nga Konventa Evropiane për të Drejtat e Njeriut. Protestuesit – në këtë rast, të rinjtë – kanë të drejtë të shprehin pikëpamjet e tyre, veçanërisht për çështje që ndikojnë drejtpërdrejt në të ardhmen e tyre. Prandaj, ne i nxisim autoritetet të mbrojnë ushtrimin e lirisë së tubimit, duke përfshirë edhe protestën paqësore.

    Ne bëjmë thirrje për një dialog paqësor, konstruktiv dhe të sinqertë midis të gjitha palëve të interesuara, me qëllim gjetjen e një zgjidhjeje kuptimplote për të adresuar çdo ankesë të shprehur nga protestuesit, në përputhje me ligjet shqiptare dhe standardet evropiane. Respekti për sundimin e ligjit mbetet kriteri kryesor dhe kushti i detyrueshëm për përparimin e Shqipërisë në rrugën e saj të anëtarësimit në Bashkimin Evropian.

  • Ferizaj: Lëndohet 68 vjeçari, dyshohet se tentoi t’i vë flakën vetes

    Ferizaj: Lëndohet 68 vjeçari, dyshohet se tentoi t’i vë flakën vetes

    Ferizaj: Lëndohet 68 vjeçari, dyshohet se tentoi t’i vë flakën vetes

    Një person rreth 68 vjeç është lënduar pasi dyshohet se ka tentuar t’i vërë flakën vetes duke përdorur benzinë, në rrugën “Mehmet Begraca” në Ferizaj.

    Rastin e ka konfirmuar për Klankosova.tv zëdhënësi i Policisë për Rajonin e Ferizajt, Kanun Veseli.

    Sipas tij, policia është njoftuar për rastin mbrëmë, rreth orës 20:10, ndërsa në vendin e ngjarjes ka konstatuar se familjarët e personit kishin arritur ta shuanin zjarrin.

    “I lënduari është trajtuar fillimisht nga ekipet emergjente dhe më pas është dërguar në Qendrën Emergjente në Ferizaj për trajtim të mëtejmë. Sipas informatave fillestare të policisë, gjendja e tij shëndetësore ishte stabile”, ka deklaruar Veseli për Klankosova.tv.

    “Në vendin e ngjarjes kanë dalë njësitë policore të rendit dhe hetuesit, të cilët po merren me sqarimin e rrethanave të rastit”, shtoi ai.

  • Shala: Kushdo që vjen në krye të PDK-së, nuk e forcon atë në kuptimin elektoral (VIDEO)

    Shala: Kushdo që vjen në krye të PDK-së, nuk e forcon atë në kuptimin elektoral (VIDEO)

    Shala: Kushdo që vjen në krye të PDK-së, nuk e forcon atë në kuptimin elektoral (VIDEO)

    Analisti Azdren Shala ka deklaruar se ndryshimi i kryetarit të Partisë Demokratike të Kosovës nuk do të ndikojë në rritjen e mbështetjes elektorale të këtij subjekti.

    Në emisionin “Kosova Today”, Shala tha se problemi i PDK-së qëndron te mungesa e unitetit brenda ekipit që e rrethon kryetarin.

    “E parëndësishme është kush është kryetari. Problemi është se ekipi që i rri prapa kryetarit nuk është kurrë unik, nuk është kurrë në unison. PDK-ja, si krejt partitë në Kosovë, me përjashtim të VV-së, që ka dorë të hekurt Kurtin, janë të ndara në dysh ose treshe, varësisht prej interesave. Nuk është çështje emri. Kushdo që bëhet kryetar i PDK-së, për mua nuk e forcon në kuptimin elektoral. Nuk pres sukses”, deklaroi Shala.

     

  • Gazetari Qarri flet për protestën studentore në Shqipëri: Akumulim i pushtetit

    Gazetari Qarri flet për protestën studentore në Shqipëri: Akumulim i pushtetit

    Gazetari Qarri flet për protestën studentore në Shqipëri: Akumulim i pushtetit

    Gazetari Flavio Qarri ka folur rreth protestave të studentëve në Shqipëri.

    Në emisionin “Kosova Today”, gazetari thotë se protestat vijnë si pasojë e akumulimit të pushtetit, transmeton Klankosova.tv.

    “Thelbi është që akumulimi i pushtetit dhe përqendrimi te një njeri i vetëm i çdo institucioni, hapësire dhe amortizatori social, pikërisht te emri i Edi Ramës, ka vrarë çdo mundësi që të ketë hallka të ndërmjetme për të zgjedhur problematika të veçanta, gjatë kohës dhe gjatë rrugës”, u shpreh ai.

  • Ndahet nga jeta aktivisti i Aleancës, Argjir Rexha

    Ndahet nga jeta aktivisti i Aleancës, Argjir Rexha

    Ndahet nga jeta aktivisti i Aleancës, Argjir Rexha

    Ka ndërruar jetë si pasojë e një infarkti aktivisti i Aleancës, Argjir Rexha. Lajmin e ka bërë të ditur kryetari i Aleancës, Ardian Gjini, i cili përmes një telegrami ngushëllimi ka shprehur pikëllimin për ndarjen e parakohshme nga jeta të Rexhës.

    Në telegramin e ngushëllimit, Gjini e ka përshkruar Rexhën si një aktivist të ditëve të para, i cili me vullnet, vizion dhe idealizëm dha kontribut të rëndësishëm në rrugëtimin e përbashkët të Aleancës.

    “Si një ndërmarrës dhe menaxher i suksesshëm, ai solli inovacion në gastronominë e Prishtinës dhe tregoi profesionalizëm të pashoq në fushën e shpedicionit dhe procedurave doganore, duke qenë gjithmonë një zë i fuqishëm për përkrahjen e bizneseve vendore dhe zhvillimin lokal,” ka shkruar kryetari i Aleancës.

    Sipas Gjinit, Rexha do të kujtohet si njeri pozitiv, i afërt dhe gjithmonë i gatshëm për të kontribuar për një të ardhme më të mirë.

    “Humbëm një mik dhe bashkëpunëtor të pashoq, besnikëria, sinqeriteti dhe energjia e të cilit do të na mungojnë çdo ditë”, ka shkruar Gjini në telegramin e ngushëllimit.

    Në fund, kryetari i Aleancës u ka shprehur ngushëllime familjes Rexha, miqve, kolegëve dhe bashkëpunëtorëve.

    Rexha ishte baba i një djali 2 vjeç dhe një vajze 3 muajshe.

    Sinjali – aty ku e vërteta flet para lajmit!

    /GazetaSinjali/

    The post Ndahet nga jeta aktivisti i Aleancës, Argjir Rexha  appeared first on Sinjali.

    Burimi: Sinjali