Juristja e medias, Flutura Kusari, ka reaguar lidhur me presionin me të cilin, sipas saj, po përballen gazetarët Lirim Mehmetaj dhe Fidan Jupolli, duke i bërë thirrje Qeverisë së Kosovës që të ndërmarrë masa konkrete për mbrojtjen e gazetarëve.
Përmes një reagimi, Kusari ka kërkuar ndryshimin e ligjeve dhe krijimin e mekanizmave për mbrojtjen e gazetarëve, duke theksuar se situata në të cilën punojnë gazetarët në Kosovë është e rrezikshme.
“Oj Qeveri, wake up! Lirim Mehmetaj po përballet me presion të jashtëzakonshëm. Fidan Jupolli po përballet me presion të jashtëzakonshëm. Çfarë duhet të ndodhë më shumë që Qeveria e Kosovës të fillojë t’i ndryshojë ligjet dhe të krijojë mekanizma për mbrojtjen e gazetarëve?”, ka shkruar Kusari.
Ajo ka thënë se do të vazhdojë të ngrejë shqetësimin për sigurinë e gazetarëve, duke u bazuar edhe në përvojën e saj të punës në vende ku janë vrarë gazetarë.
“Po e them prapë dhe kom me përsëritë vazhdimisht. Unë punoj në vende ku janë vra gazetarë. Atmosfera në të cilën punojnë gazetarët në Kosovë ka ngjashmëri të madhe me ato vende. Nuk po them se në Kosovë do të vriten gazetarë, por situata është e rrezikshme dhe qeveria duhet të zgjohet nga gjumi dhe ta marrë seriozisht këtë punë”, ka theksuar ajo.
Kusari ka propozuar dy masa konkrete që, sipas saj, duhet të ndërmerren për të përmirësuar sigurinë e gazetarëve në Kosovë.
“Pika nr. 1 është krijimi i një Trupi Koordinues për Sigurinë e Gazetarëve.
Pika nr. 2 është propozimi i ndryshimeve në Kodin Penal, të cilat do t’i ashpërsonin dënimet për sulmet ndaj gazetarëve”, ka shkruar Kusari.
Ajo ka theksuar se këto propozime nuk janë ide të reja, por masa që, sipas saj, po ndërmerren nga shtetet demokratike që angazhohen për lirinë e medias dhe mbrojtjen e gazetarëve.
“Këto dy pika nuk janë shpikje të miat, por masa që po ndërmerren nga shtetet demokratike që kujdesen realisht për lirinë e medias dhe mbrojtjen e gazetarëve”, ka shtuar Kusari.
Aktorja amerikane Selma Blair është akuzuar për sulm të shkallës së dytë pas një incidenti gjatë një fluturimi të kompanisë Delta Air Lines, me destinacion Nju Jorkun, të dielën në mbrëmje.
Sipas TMZ, ylli i “Cruel Intentions” dyshohet se ka tentuar të hapë derën e avionit gjatë fluturimit dhe ka sulmuar dy pjesëtarë të ekuipazhit.
Pas uljes, aktorja u mor në mbajtje nga autoritetet dhe u dërgua në spital për vlerësim mjekësor. Të hënën, ajo pagoi 20 mijë dollarë garanci dhe u lirua, ndërsa pritet të paraqitet para gjykatës në janar, transmeton Klankosova.tv.
Përfaqësuesi i saj deklaroi se Blair kishte përjetuar një urgjencë mjekësore gjatë fluturimit dhe se aktualisht ndodhet në gjendje të qëndrueshme.
Ky nuk është incidenti i parë i tillë për aktoren. Në vitin 2016, ajo u raportua se kishte bërtitur në mënyrë të pakontrolluar gjatë një fluturimi nga Meksika drejt Los Anxhelosit dhe ishte nxjerrë nga avioni me barelë.
Blair, e diagnostikuar me sklerozë të shumëfishtë në vitin 2018, kishte kërkuar falje pas incidentit të mëparshëm, duke thënë se kishte përzier alkoolin me medikamentet./Klankosova.tv
Tetë persona u plagosën gjatë një sulmi me thikë në një supermarket në qytetin koreano-jugor Incheon të martën ku njëri prej tyre pësoi arrest kardiak, njoftoi policia.
Oficerët që mbërritën në vendngjarje arrestuan një të dyshuar mashkull dhe po hetonin motivin e rrethanat e sulmit, deklaroi me telefon një zëdhënës i policisë.
Një dëshmitar, i cituar nga agjencia e lajmeve Yonhap, tha se i dyshuari dukej se kishte thika të lidhura në të dyja duart dhe lëvizte nëpër disa kate të kompleksit tregtar, duke sulmuar njerëzit gjatë rrugës, përpara se të neutralizohej nga kalimtarët dhe t’i dorëzohej policisë.
Raportet e mediave koreano-jugore e përshkruanin të dyshuarin si një burrë rreth të 60-ave, i cili mbante një byzylyk elektronik monitorimi në kyçin e këmbës.
Mes viktimave kishte gjashtë gra dhe dy burra; një grua rreth të 20-ave pësoi arrest kardiak, thuhej në raporte, transmeton Klankosova.tv.
Incheon, në perëndim të Seulit, është vendndodhja e aeroportit kryesor të Koresë së Jugut dhe bën pjesë në zonën e gjerë metropolitane të Seulit, raporton Reuters.
Korea e Jugut u trondit nga një sërë sulmesh me thikë gjatë vitit 2023, përfshirë incidente që lanë pas disa të vdekur dhe të plagosur.
Kohët e fundit, në muajin maj, një vajzë 17-vjeçare u vra me thikë dhe një adoleshent tjetër u plagos në qytetin jugperëndimor Gwangju nga një burrë rreth të 20-ave, i cili më vonë u dënua nga gjykata me burgim të përjetshëm, transmeton Klankosova.tv.
Ish zëvendëskryeministrit të parë, Artan Grubi sot i mbaron arresti shtëpiak.
Vendimi ekzekutohet sipas fuqisë së ligjit pasi kalojnë 60 ditë nga dita e dorëzimit të propozim-akuzës.
Megjithatë, Grubi i cili gati 8 muaj ka qëndruar në arrest shtëpie kërkon që t’i kthehet edhe pasaporta.
Për këtë ka ofruar prona si garanci në vlerë mbi 335 mijë euro.
Nga Gjykata Penale e Shkupit theksojnë shkurt për Alsat M, se për këtë propozim ende nuk kanë vendosur pasi e presin mendimin nga Prokuroria, e cila pritet që ta japë gjatë kësaj jave.
Ndërkohë vazhdon gjykimi për Grubin lidhur me keqpërdorimet në “Lotarinë Shtetërore”, megjithatë për dallim nga herët e kaluara, Grubi do të paraqitet në Gjykatë pa shoqërim policor.
Grubi gjykohet për “keqpërdorimin e detyrës zyrtare” pasi ka udhëhequr mbledhjen e Qeverisë ku është miratuar pika e rendit të ditës për nisjen e organizimit të pavarur të lojërave elektronike të fatit, ndonëse sipas Prokurorisë kjo nuk ka qenë e ligjshme. Sipas tyre, këtë e ka bërë në bashkëpunim me të akuzuarin e parë, ish drejtorin Përparim Bajrami.
Me këtë, Prokuroria pretendon se Grubi ka hapur rrugën që Lotaria Shtetërore t’i blejë VLT aparatet në vlerë mbi 9,7 milionë euro edhe pse të njëjtat nuk kanë qenë të nevojshme.
Pretendimet e këtilla Grubi i ka hedhur poshtë nën arsyetimin se për vendimin në mbledhje të Qeverisë kanë votuar 20 anëtarë, të gjithë “për”.
Nga ana tjetër, teza e mbrojtjes së Grubit, por edhe të akuzuarve të tjerë është se ata kanë mbrojtur interesin shtetëror, me qëllim që përfitimi të shkojë direkt te Lotaria Shtetërore dhe jo të ndahet me partnerë të tjerë.
Lënda u hap në dhjetor të vitit 2024, rreth një javë pasi Shtetet e Bashkuara të Amerikës e futën në Listë të Zezë për korrupsion së bashku me ish gjyqtarin e Apelit Enver Bexheti. SHBA-ja i akuzoi për përfshirje në korrupsion të rëndësishëm, duke pretenduar se kishin pranuar ryshfet për të penguar proceset gjyqësore të lidhura me dënimin e ish shefit të Policisë Sekrete Sasho Mijallkov.
Megjithatë, Artan Grubi u largua nga Maqedonia më 15 dhjetor, duke kaluar pikën kufitare të Bllacës drejt Kosovës.
Pas alarmit për arratisje, Grubi njoftoi në Facebook se ka udhëtuar për vizitë private dhe sapo t’i kryejë obligimet do të kthehet në shtëpi.
Megjithatë, obligimet e Grubit zgjatën mbi 14 muaj, për çka shteti shpalli fletëarrest të brendshëm ndërkombëtar.
Në mëngjesin e 23 shkurtit, Grubi në Maqedoni hyri nga kishte dalë.
Nëpër media dolën filmimet në të cilat shihej Grubi me pranga, pasi ishte vetëdorëzuar.
Prej Pikës Kufitare Bllacë, Grubi dërgohet në Burgun e Shutkës, megjithatë vetëm pas disa orësh ai dërgohet në shtëpi pasi organet e sigurisë kishin alarmuar se rrezikohet jeta e Grubit në paraburgim.
Nga vdekja e punëtorit në Ferizaj dhe dhuna në familje në Drenas e Lipjan, te të shtënat me armë në një aheng familjar në Ferizaj dhe incidentet me policinë në Prishtinë e Gjilan, ngjarjet e fundit kanë vënë në lëvizje Policinë në disa rajone të Kosovës.
Sinjali ju sjell përmbledhjen e rasteve kryesore të raportuara gjatë 24 orëve të fundit.
Punëtori bie nga 7 metra te objekti i “Endriti EEA” dhe humb jetën – pronari i kompanisë punëkryese ndalohet për 48 orë
Një punëtor, Musli Musliu, ka humbur jetën më 12 tetor në Ferizaj, pasi dyshohet se ra nga rreth shtatë metra lartësi gjatë punimeve në objektin e “Endriti EEA”.
Pronari i kompanisë punëkryese “Hansi SHPK”, Besar Topalli, është ndaluar për 48 orë. Rasti po hetohet për dy vepra penale që lidhen me sigurinë në vendin e punës.
Ekskluzive | Policia ndal BMW-në te Rrethi i Viktorisë – shoferit i gjenden mbi 4.6 gramë drogë dhe cigare me marihuanë
Policia ka ndaluar një BMW te Rrethi i Viktorisë në Prishtinë, ku gjatë kontrollit të shoferit janë gjetur 4.61 gramë substancë e dyshuar narkotike dhe një cigare e dyshuar me marihuanë.
Pas intervistimit, shoferi është liruar në procedurë të rregullt. Rasti po hetohet.
5. Shkoi në Polici për problem me qiradhënësin – përfundon duke sulmuar dy zyrtarë policorë
Një person që ishte paraqitur në Stacionin Policor Jugu në Prishtinë për një problem me qiradhënësin, dyshohet se ka sulmuar dy zyrtarë policorë.
Ai është dërguar për trajtim në Forenzikën Psikiatrike në QKUK dhe më pas është liruar në procedurë të rregullt. Rasti është iniciuar si “Sulm ndaj personit zyrtar”.
Të shtëna me armë në aheng familjar në Ferizaj – sekuestrohet pistoleta “Zoraki” dhe gëzhojat
Të shtëna me armë janë raportuar më 12 tetor gjatë një ahengu familjar në fshatin Surqinë të Ferizajt.
Policia ka identifikuar të dyshuarin dhe ka sekuestruar një pistoletë “Zoraki”, karikatorin dhe dy gëzhoja. I dyshuari është liruar në procedurë të rregullt, ndërsa hetimet vazhdojnë.
Incident në sheshin e Gjilanit – 26-vjeçari dyshohet se kërcënoi policët dhe i lëndoi gjatë arrestimit
Dy zyrtarë policorë janë lënduar mbrëmjen e 12 tetorit në Gjilan, gjatë arrestimit të një 26-vjeçari, i cili dyshohet se i kishte kërcënuar dhe më pas i kishte sulmuar.
Njëri nga policët ka pranuar trajtim mjekësor, ndërsa i dyshuari është ndaluar për 48 orë.
Gruaja denoncon bashkëshortin për dhunë fizike në Lipjan – thotë se sjellja po përsëritet
Një grua në Lipjan ka denoncuar bashkëshortin për dhunë fizike, duke pretenduar se ai e kishte goditur disa herë në trup, ndërsa ishte në gjendje të dehur.
Ajo ka deklaruar se sjellje të tilla janë përsëritur. I dyshuari është liruar në procedurë të rregullt, ndërsa gruaja është larguar te familja e saj.
Këto ishin disa nga ngjarjet që shënuan 24 orët e fundit në Kosovë.
SINJALI 24 – Kur ti flije, ne e përcollëm Kosovën.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
Policia e Kosovës ka gjetur 26 mijë e 900 franga zvicerane gjatë kontrollit të një automjeti në fshatin Vërmicë.
Sipas njoftimit të Policisë, rasti ka ndodhur të hënën, rreth orës 21:15, kur zyrtarët policorë, gjatë patrullimit, kanë hasur në dy automjete, njëri me targa të Kosovës dhe tjetri me targa të Shqipërisë.
Automjetet drejtoheshin nga dy persona, një shtetas i Kosovës dhe një shtetas i Shqipërisë.
Gjatë kontrollit të automjetit me targa vendore, policia ka gjetur shumën prej 26 mijë e 900 frangash zvicerane.
Të dy personat janë shoqëruar në stacionin policor për procedura të mëtejshme, ndërsa rasti është iniciuar si “Shpëlarje parash”.
Një projektligj i ri në Danimarkë ka nxitur debat, pasi parashikon që mësuesit të kenë të drejtë të përdorin forcë fizike ndaj nxënësve në situata të caktuara, për të parandaluar përshkallëzimin e konflikteve në shkolla.
Sipas raportimit të gazetës franceze “Le Monde”, mësuesit mund të lejohen ta ndalojnë fizikisht një nxënës ose ta largojnë me forcë nga klasa, nëse ai refuzon të dalë dhe pengon mësimin.
Ndërhyrja do të mund të bëhej edhe kur nxënësi paraqet rrezik për veten apo të tjerët, shkatërron gjësende ose pengon seriozisht zhvillimin e orës mësimore, shkruan Bild, transmeton Klankosova.tv.
Ministri i Arsimit, Magnus Heunicke, ka thënë se synimi i projektligjit është të sigurojë qetësi dhe rend në shkolla, si dhe t’u japë mësuesve më shumë siguri për mënyrën se si mund të veprojnë kur një situatë del jashtë kontrollit.
Nisma vjen pas shqetësimeve për rritjen e dhunës në shkollat daneze. Sipas një studimi të autoritetit danez për mbikëqyrjen e punës, më shumë se një e katërta e mësuesve kanë raportuar rritje të sjelljeve të dhunshme dhe përçarëse, ndërsa në çdo klasë të pestë dhuna drejtohet edhe ndaj mësimdhënësve.
Projektligji pritet të shqyrtohet dhe të votohet në Parlament./Klankosova.tv
Kryetari i Prishtinës, Përparim Rama, ka reaguar lidhur me sulmet, montazhet denigruese dhe kërcënimet që, sipas tij, po përballet gazetari Lirim Mehmetaj.
Në një reagim publik, Rama ka theksuar se sulmet ndaj gazetarëve dhe kundërshtarëve politikë rrezikojnë vlerat demokratike dhe lirinë e shprehjes, transmeton Klankosova.tv.
“Sulmet ndaj gazetarëve janë alarm për demokracinë!”, ka shkruar Rama.
Ai ka paralajmëruar se trajtimi i gazetarëve si armiq dhe shënjestrimi i kundërshtarëve politikë mund të dëmtojnë themelet e demokracisë, duke theksuar se pasojat e një procesi të tillë do t’i bartë e gjithë shoqëria.
“Sot mund të jetë gazetari. Nesër kundërshtari politik. Pasnesër secili qytetar që guxon të mendojë ndryshe!”, ka shkruar Rama.
Në reagimin e tij, Rama ka nënvizuar rëndësinë e mbrojtjes së lirisë së shprehjes, duke vlerësuar se liria e fituar me shumë mund po minohet në dimensione të ndryshme.
Ai ka bërë thirrje që të kuptohet rëndësia e ruajtjes së demokracisë dhe e të drejtës së secilit qytetar për të shprehur mendimin e tij pa frikë.
Gjykata e Apelit ende nuk ka marrë vendim për ndërprerjen e masës së paraburgimit ndaj dy veteranëve, Fadil Zogajt dhe Ekrem Selimit.
Kjo gjykatë ka konfirmuar për Klankosova.tv se e ka pranuar ankesën lidhur me këtë rast dhe se aktualisht është duke e shqyrtuar atë
“Gjykata e Apelit ka pranuar lëndën me ankesë. Të njëjtën e ka në shqyrtim. Pra, kjo gjykatë ende nuk ka vendosur, siç ka pasur pretendime në disa gazeta online”, ka bërë të ditur zëdhënësja Laureta Ulaj.
Ajo ka shtuar se Apeli do të vendosë brenda afateve të përcaktuara ligjore në lidhje me ankesën.
Fadil Zogaj dhe Ekrem Selimi ishin arrestuar nën dyshimin për sulm ndaj deputetit të Lëvizjes Vetëvendosje, Fahrush Rexhepi. Ata dyshohen për veprën penale “Sulmi ndaj personit zyrtar në bashkëkryerje”.