Mijëra protestues kanë marshuar në disa qytete të Shteteve të Bashkuara të Amerikës në kuadër të protestave mbarëkombëtare “No Kings”, kundër presidentit Donald Trump, duke kërkuar respektimin e të drejtave të barabarta dhe pjesëmarrje më të madhe qytetare në zgjedhje.
Demonstratat u mbajtën në Uashington, Los Angeles dhe South Portland të shtetit Maine, ku qytetarët shprehën kundërshtimin e tyre ndaj politikave të administratës Trump.
Në kryeqytetin amerikan, protestuesit bartën një figurë të presidentit Trump të punuar me letër, pranë Memorialit të Lincoln. Ndërkaq, në Los Angeles, turma të mëdha u mblodhën para bashkisë, ku vëmendje tërhoqi edhe një protestues i veshur si personazhi Batman.
Një pjesë e madhe e pankartave u bënin thirrje qytetarëve të votonin herët në zgjedhjet e mesmandatit, ndërsa në South Portland protestuesit u rreshtuan përgjatë rrugës dhe morën mbështetje nga shoferët, të cilët u binin borive.
Gjatë marshimeve, folësit dhe demonstruesit kërkuan mbrojtjen e të drejtave të barabarta. Disa prej tyre kërkuan gjithashtu që Agjencia Amerikane e Emigracionit dhe Doganave (ICE) t’i japë fund veprimtarisë së saj.
Protestat “No Kings” janë pjesë e një mobilizimi qytetar kundër politikave të administratës Trump dhe asaj që organizatorët e konsiderojnë përqendrim të tepruar të pushtetit në duart e presidentit amerikan.
Ministria e Bujqësisë, Pylltarisë dhe Zhvillimit Rural (MBPZhR), përmes Agjencisë për Zhvillimin e Bujqësisë (AZhB), ka njoftuar se gjatë kësaj jave do të nisë lëshimi i vendimeve dhe realizimi i pagesave për fermerët përmes skemës së Pagesave Direkte 2026.
Sipas njoftimit të ministrisë, për këtë skemë janë pranuar gjithsej 33,460 aplikime, ndërsa shqyrtimi administrativ i tyre dhe kontrollet në terren për sipërfaqet bujqësore tashmë kanë përfunduar.
Paralelisht me realizimin e pagesave, do të publikohen edhe listat e përfituesve. Pas përfundimit të këtij procesi, do të vazhdohet me pagesat për skemat e tjera të mbështetjes për bujqësinë.
Ministria ka bërë të ditur gjithashtu se fermerët që kanë kultivuar grurë do të mbështeten për sipërfaqet e mbjella, plehun artificial dhe shpenzimet e naftës.
Mbështetja për këto kategori do të realizohet sipas normave dhe shumave të aplikuara në vitet e mëparshme.
Skuadra kryeqytetase tregoi karakter dhe vendosmëri në këtë përballje, duke arritur ta sigurojë fitoren falë golit të Rin Ahmetit në minutën e 49-të.
Ndeshja mes dy skuadrave u karakterizua me rivaliteti të theksuar, ndërsa Prishtina arriti ta shfrytëzojë rastin vendimtar për të dalë nga kjo sfidë me tri pikë të rëndësishme.
Goli i Ahmetit rezultoi vendimtar për kryeqytetasit, të cilët arritën ta ruajnë epërsinë deri në vërshëllimën e fundit të gjyqtarit.
Pas kësaj fitore, Prishtina ka 23 pikë aq sa ka edhe Malisheva në kreun e tabelës, kurse, Ballkani renditet e gjashta me 13 sosh.
Prokuroria Speciale ka ngritur aktakuzë ndaj tre personave për shitje të paautorizuar të narkotikëve dhe armëmbajtje pa leje, në një rast që përputhet me arrestimin e Abedin Ismajlit, Besart Mulakut dhe Fisnik Ukës, të raportuar ekskluzivisht nga Gazeta Sinjali.
Sipas aktakuzës, më 22 prill 2025, rreth orës 15:00, në Prishtinë, të pandehurit, duke vepruar në bashkëkryerje dhe pas koordinimit paraprak, dyshohet se kanë shitur një kilogram kokainë për 27 mijë euro.
Aktakuza është dorëzuar në Gjykatën Themelore në Prishtinë. Prokuroria i ngarkon të pandehurit me veprat penale të shitblerjes dhe shpërndarjes së paautorizuar të narkotikëve, si dhe posedimit të paautorizuar të armëve.
Sinjali kishte raportuar më 22 prill 2025 se Abedin Ismajli, Besart Mulaku dhe Fisnik Uka ishin arrestuar gjatë një operacioni të Antidrogës. Sipas raportimit të atëhershëm, gjatë bastisjeve ishin sekuestruar 2.6 kilogramë kokainë, një armë me 35 fishekë, dy vetura, tre telefona dhe 4 mijë euro para të gatshme.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
Mbrojtësi i Endrit Nikës, i cili ishte dënuar për vrasjen e të dashurës argjentinase, Maria Clara Urdangaray, ka dorëzuar kallëzim penal ndaj drejtuesve të Hotel Sonoma në Fushë Kosovë, ku ndodhi rasti më 1 gusht 2023. Avokati Tomë Gashi kërkon nga Prokuroria Themelore në Prishtinë hetimin e Brahim dhe Mirlind Zeqirit për katër vepra penale.
Në kallëzimi të cilin e ka siguruar gazetarja e Klan Kosova, Blerta Ahmeti, pretendohet se hoteli ishte ndërtuar pa leje, se dritarja nga e cila ra për vdekje Maria Clara Urdangaray nuk ishte montuar sipas standardeve të sigurisë dhe se pas ngjarjes kishte pasur ndërhyrje në vendin e ngjarjes.
Avokati Gashi, në emër të klientit të tij Endrit Nika, më 9 qershor 2026 ka paraqitur kallëzim penal në Prokurorinë Themelore në Prishtinë kundër pronarit dhe drejtorit të Hotel Sonoma, Brahim Zeqiri, dhe menaxherit të hotelit, Mirlind Zeqiri.
Në kallëzimin penal, drejtuar kryeprokurorit të atëhershëm të Prokurorisë Themelore në Prishtinë, Zejnullah Gashi, avokati kërkon hetimin e dy të dyshuarve për veprat penale të ndërtimit pa leje, shkaktimit të rrezikut të përgjithshëm, deklarimeve të rreme dhe manipulimit me prova.
Pretendimet e avokatit lidhen me vdekjen e shtetases argjentinase Maria Clara Urdangaray, e cila më 1 gusht 2023 ra nga dritarja e dhomës 403, në katin e gjashtë të Hotel Sonoma, në Fushë Kosovë.
Kallëzimi penal mbështetet, sipas Gashit, në dokumentacionin e siguruar nga Komuna e Fushë Kosovës, në ekspertizat teknike të administruara në procedurën gjyqësore dhe në procesverbalin e dëshmisë së menaxherit të hotelit, raporton gazetarja Blerta Ahmeti.
Pretendimet për ndërtim pa leje dhe legalizimin e hotelit
Në pjesën e parë të kallëzimit, avokati pretendon se objekti ku funksionon Hotel Sonoma është ndërtuar dhe është vënë në shfrytëzim pa lejen e nevojshme të ndërtimit.
Sipas dokumentacionit komunal, të cilit i referohet Gashi, kërkesat për legalizimin e objektit ishin refuzuar vazhdimisht, ndërsa ndaj tij ishin shqiptuar masa dhe gjoba për shkak të ndërtimit pa leje.
Në dokument thuhet se objekti është legalizuar më 28 tetor 2024, më shumë se një vit pas vdekjes së Maria Clara Urdangaray. Sipas avokatit, legalizimi është bërë në kategorinë “Banim”, e jo si objekt hotelierik, ndonëse ndërtesa ishte shfrytëzuar për akomodimin e mysafirëve.
Gashi pretendon se kjo rrethanë ngre dyshime edhe për ushtrimin e veprimtarisë hotelierike në kundërshtim me destinimin dhe kushtet për të cilat objekti ishte legalizuar.
Për këtë pjesë, avokati kërkon që të hetohet përgjegjësia e pronarit dhe menaxherit të hotelit për ndërtimin, vënien në funksion dhe shfrytëzimin e objektit.
Ekspertizat: Dritarja paraqiste rrezik të lartë
Një pjesë e rëndësishme e kallëzimit penal lidhet me gjendjen teknike të dritares së dhomës 403, nga e cila ra për vdekje Maria Clara Urdangaray.
Sipas dokumentit, në procedurën penale me numër PKR.nr.31/25, të zhvilluar në Gjykatën Themelore në Prishtinë, janë administruar ekspertiza të ekspertëve të inxhinierisë mekanike Naser Lajqi, Ilir Doçi dhe Azem Kyçyqky, e të cilën expertizë për herë të parë në publik e kishte prezentuar emisionit MAT në Klan Kosova, në edicionin kushtuar rastit të Maria Clara Urdangaray të publikuar m 27 gusht të vitit 2025.
Avokati u referohet gjetjeve të tyre në superekspertizën e datës 6 shkurt 2025, në të cilën, sipas kallëzimit, është konstatuar se siguria e dritares ishte e ulët për shkak të sistemit të montimit dhe mekanizmave të përdorur.
Sipas këtyre gjetjeve, mekanizmat dhe “çernierat e instaluara” nuk ofronin siguri të mjaftueshme ndaj forcave vertikale, ndërsa sistemi nuk kishte mekanizëm sigurues që do ta pengonte zhvendosjen e dritares.
Në kallëzim përmendet edhe ekspertiza e ekspertit të mekanikës, Ermal Maqedonci, të datës 13 maj 2026.
Sipas përshkrimit të avokatit, eksperti ka konstatuar se dritarja nuk ishte montuar në përputhje me udhëzimet teknike të prodhuesit. Në vendin e montimit kishte copëza betoni që, sipas tij, e ulnin më tej sigurinë e dritares, ndërsa grepi mbajtës nuk ishte vendosur plotësisht dhe në mënyrë të rregullt.
Bazuar në këto gjetje, Gashi pretendon se dritarja paraqiste rrezik jashtëzakonisht të lartë për personat që qëndronin në afërsi të saj.
Avokati argumenton se mangësitë teknike dhe mungesa e masave të nevojshme të sigurisë duhet të hetohen në kuadër të veprës penale të shkaktimit të rrezikut të përgjithshëm, duke marrë parasysh edhe pasojën fatale të ngjarjes.
Hotel Sonoma ndryshon dritaren pas vdekjes së Maria Clara Urdangaray
Në kallëzim ceket se pas ngjarjes së 1 gushtit 2023, kur Clara ra me gjithë kornizën e dritares nga kati i gjashtë i këtij hoteli, gjatë zhvillimit të procedurës hetimore, është ndryshuar dritarja e dhomës 403.
Hulumtimi i emisionit MAT, “Misteri i dhomës 403: Çka i ndodhi Maria Clarës?”, kishte vënë në pah se ekzaminimet në vendin e ngjarjes për expertizën dhe superexpertizën e expërtëve nga lëmi i makinerisë/Inxhinierisë mekanike, Azem Kycyku, Naser Lajci dhe Ilir Doci, ishin bërë më 8, 15 dhe 17 janar të vitit 2025 – apo 17 muaj pas rastit.
Dhe expertët në raportin e tyre kishin konstatuar se “kjo super ekspertizë është bërë në dhomën 303, një kat më poshtë sesa vendi ku ka ndodhur ngjarja, pasi që në dhomën 403 menaxhmenti i hotelit ka vendosur dritare të re, me 3 shtresa, një më shumë sesa ishte paraprakisht dhe e kanë përforcuar më shumë sesa ishte e përforcuar paraprakisht”.
Avokati pretendon se këto ndryshime janë bërë pa lejen e organeve kompetente dhe se mund të kenë ndryshuar gjendjen fillestare të një elementi me rëndësi për hetimin e rrethanave të vdekjes.
Për këtë arsye, ai kërkon që Prokuroria të shqyrtojë nëse veprimet e pretenduara përbëjnë vepër penale dhe nëse kanë ndikuar në mundësinë e vlerësimit të saktë të gjendjes së dritares në kohën e ngjarjes.
Menaxheri i hotelit dyshohet për deklarim të rremë
Sipas dokumentit, gjatë dëshmisë së tij në seancën e 10 korrikut 2025, pronari i hotel Sonoma Mirlind Zeqiri ishte pyetur nga mbrojtja nëse hoteli kishte procedura të dokumentuara për mirëmbajtjen dhe inspektimin e rregullt të xhamave.
Përgjigjja e tij, siç citohet në kallëzim, ishte: “Nuk kam njohuri nëse ekzistojnë procedura të dokumentuara për xhamat, por kur është ndërtuar hoteli është bërë pranimi nga institucionet përkatëse dhe është xham statik që nuk hapet.”
Gashi pretendon se pjesa e deklaratës për pranimin e objektit nga institucionet kompetente bie ndesh me dokumentacionin komunal, sipas të cilit objekti nuk kishte pasur leje ndërtimi në kohën e ndërtimit dhe ishte legalizuar më vonë në kategorinë “Banim”.
Në bazë të kësaj mospërputhjeje të pretenduar, avokati kërkon hetimin e Mirlind Zeqirit për veprën penale të deklarimit të rremë.
Kërkohet ekspertizë për incizimet e kamerave të sigurisë
Në pjesën e katërt të kallëzimit, avokati ngre dyshime për mungesën e një pjese të incizimeve të kamerave të sigurisë së hotelit.
Sipas tij, bëhet fjalë për incizimet që lidhen me periudhën menjëherë pas ngjarjes fatale dhe pas daljes së Endrit Nikës nga dhoma 403.
Gashi vlerëson se kjo periudhë është e rëndësishme për sqarimin e plotë të rrethanave të rastit, përfshirë veprimet e personave përgjegjës dhe gjendjen e vendit të ngjarjes.
Për këtë arsye, ai i kërkon Prokurorisë që incizimet e siguruara nga hoteli të dërgohen në Agjencinë e Kosovës për Forenzikë, për ekspertizë lidhur me mundësinë e konsumimit të veprës penale të manipulimit me prova.
Kërkohet nisja e hetimeve ndaj pronarit dhe menaxherit
Në përfundim të dokumentit, avokati Tomë Gashi kërkon nga Prokuroria Themelore në Prishtinë që të nxjerrë aktvendim për fillimin e hetimeve ndaj Brahim dhe Mirlind Zeqirit dhe, pas përfundimit të tyre, të ngrejë aktakuzë nëse provat e mbështesin një veprim të tillë.
Ai pretendon se përgjegjësit e hotelit kanë kontribuar në krijimin dhe vazhdimin e një gjendjeje të rrezikshme për mysafirët, ndërsa vdekja e Maria Clara Urdangaray, sipas tij, duhet të hetohet edhe në raport me kushtet teknike të objektit dhe funksionimin e tij.
Kallëzimi penal përfshin katër vepra të pretenduara: ndërtimin pa leje, shkaktimin e rrezikut të përgjithshëm, deklarimet e rreme dhe manipulimin me prova.
Deri në një vendim të organeve kompetente, pretendimet ndaj Brahim dhe Mirlind Zeqirit mbeten të pakonfirmuara nga një vendim gjyqësor. Paraqitja e kallëzimit penal nuk nënkupton se të dyshuarit janë shpallur fajtorë.
Për këtë rast, Klan Kosova ka provuar të kontaktoj me Brahim Zeqiri, pronar i hotelit Sonoma, por në linjën telefonike të hotelit, nga recepcioni, i është thënë mediumit se “Brahimi nuk pranon të flas me medie”.
Klani, ka kontaktuar më pas edhe Mirlind Zeqirin, menaxher në po këtë hotel. Përmes telefonit ai ka deklaruar se nuk është në dijeni për kallëzimin që avokati Tomë Gashi e ka iniciuar ndaj tij dhe pronarit të hotel Sonoma.
“Nuk kam pranu kurrgjë, nuk jam në dijeni”, ka deklaruar Zeqiri përmes telefonit.
Më tej, lidhur me akuzat e ngritura nga avokati Gashi, Zeqiri ka deklaruar se “Unë jam menaxher nuk është se merrna fort me këtë pjesën e ndërtimit nuk muj me të thënë kurrgjë. Nuk muj me të dhënë asnjë lloj përgjigje që lidhet me ndërtim”, ka përfunduar Mirlindi duke mbyllur telefonin më pas.
Historia e gjykimit të rastit
Më 1 gusht 2023, Policia e Kosovës kishte paraqitur kallëzim penal ndaj Nikës për veprën penale të vrasjes. Më pas, Prokuroria kishte zhvilluar hetime dhe kishte ngritur aktakuzë ndaj tij për veprën “Vrasje e rëndë”, më 11 shkurt të vtit 2025.
19 shkurt 2026, Endrit Nika u dënua me 18 vjet burgim për vrasjen e argjentinases maria Clara Urdangaray.
Më 15 maj 2026 avokati Tomë Gahsi kishte paraqitur ankesë kundër këtij aktgjykimi, në Gjykatën e Apelit të Kosovës.
Gjykata e shkallës së dytë, më 7 gusht të vitit 2026 mori vendim që të anuojë vendimin e shkallës së parë dhe rasti të kthehet në rigjykim.
Më 1 shtator të këtij viti, ka filluar procesi i rigjykimit ndaj Endrit Nikës, në Gjykatën Themelore në Prishtinë, për vrasjen e maria Clara Urdangaray.
Prokuroria Speciale e Republikës së Kosovës ka dorëzuar aktakuzë në Gjykatën Themelore në Prishtinë, ndaj të pandehurve A.I., B.M., dhe F.U., për veprat penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge” dhe “Mbajtja në pronësi, kontroll ose posedim të paautorizuar të armëve”.
Sipas aktakuzës, më 22.04.2025, rreth orës 15:00, në Prishtinë, të pandehurit duke vepruar në bashkëkryerje dhe pas koordinimit paraprak, pa autorizim kanë realizuar shitjen e 1 kilogram kokainë në vlerë prej 27,000 eurosh, ndërsa gjatë kontrolleve policore janë sekuestruar gjithsej 4 kilogramë e 955.62 gramë kokainë, si dhe pajisje për paketimin e narkotikëve, transmeton Klankosova.tv.
“Përveç pikës së parë të aktakuzës, të pandehurit F.U. dhe B.M. akuzohen edhe për kryerjen e veprës penale “Mbajtja në pronësi, kontroll ose posedim të paautorizuar të armëve”, pasi që, nga një datë e pavërtetuar e deri më 22.04.2025, në Prishtinë, në kundërshtim me Ligjin për Armët, kanë mbajtur në pronësi dhe nën kontroll, në mënyrë të paautorizuar, armë zjarri të llojit pistoletë”, thuhet në njoftim.
PSRK i ka propozuar Gjykatës konfiskimin e pasurisë, ndaj së cilës është nxjerrë urdhër ndalues përfundimtar, në përputhje me dispozitat përkatëse të Kodit të Procedurës Penale të Republikës së Kosovës.
Kryeministri i Kosovës, Albin Kurti, ka pranuar një letër urimi për mandatin e ri nga kryeministri i Sllovenisë, Janez Janša.
Në letrën e tij, Janša ka shprehur besimin se marrëdhëniet miqësore dhe partneriteti ndërmjet Kosovës dhe Sllovenisë do të vazhdojnë të forcohen në dobi të qytetarëve të të dyja vendeve, duke shprehur gatishmërinë për vazhdimin e bashkëpunimit.
“Sllovenia i kushton rëndësi të posaçme marrëdhënieve të saj me shtetet e Evropës Jug-Lindore dhe përparimit të tyre në rrugën drejt integrimit Evropian. Ju lutem, jini të sigurt që Kosova mund të vazhdojë të llogarisë në mbështetjen e plotë të vendit tonë dhe në ndihmë në këtë fushë”, ka shkruar Janša.
Në letrën e tij, kryeministri i Sllovenisë ka theksuar rëndësinë e forcimit të partneritetit ndërmjet dy vendeve dhe mbështetjen e vazhdueshme për përparimin e Kosovës drejt integrimit evropian.
Trajneri i Paris Saint-Germainit, Luis Enrique, ka deklaruar se skuadra e tij synon t’ia shkaktojë humbjen e parë Barcelonës këtë sezon, në prag të përballjes mes dy ekipeve në Ligën e Kampionëve.
Spanjolli ka shprehur respekt të madh për ish-klubin e tij, ku ka qenë futbollist dhe trajner, duke theksuar se ruan një lidhje të veçantë me Barcelonën dhe Kataloninë.
“Fakti që Barcelona është e pamposhtur përbën një motivim shtesë për ne. Duam të jemi skuadra e parë dhe e vetme që e mposht Barcelonën këtë sezon”, ka deklaruar Enrique.
Ai ka folur edhe për Lamine Yamalin, duke refuzuar krahasimet e talentit të ri me Lionel Messin dhe duke vlerësuar se futbollisti duhet të përqendrohet në zhvillimin e vet.
Enrique ka theksuar se PSG-ja duhet të kontrollojë posedimin e topit dhe të luajë si ekip për të neutralizuar rrezikun që paraqet Barcelona.
Sulmuesi i Kombëtares së Kosovës ishte ndër protagonistët e fitores së Kharkivit, që të hënën e mposhti Livyi Beregun me rezultat 2:1, në ndeshjen e vlefshme për xhiron e nëntë të kampionatit ukrainas.
Zabërgja gjeti rrugën drejt rrjetës në minutën e 36-të, kur shënoi për 1:1, duke rikthyer baraspeshën dhe duke i dhënë skuadrës së tij mundësinë për të vazhduar luftën për fitore.
Futbollisti 25-vjeçar qëndroi në fushë deri në minutën e 81-të, ndërsa bashkëlojtari i tij, Ermir Rashica, u aktivizua në minutën e 70-të.
Me këtë realizim, Zabërgja ka regjistruar gjashtë gola dhe një asistim në kampionatin ukrainas këtë edicion, duke konfirmuar rëndësinë e tij në repartin ofensiv të Kharkivit.
Paraqitjet e mira të sulmuesit kosovar nuk janë kufizuar vetëm në kampionat. Ai ka kontribuar edhe në Kupën e Ukrainës, ku deri më tani ka shënuar dy gola dhe ka dhënë tri asistime.
Kryeministri Albin Kurti, pranoi letër urimi për mandatin e ri nga kryeministri i Mbretërisë së Belgjikës, Bart De Wever.
Sipas njoftimit nga Zyra e Kryeministrit, në letrën drejtuar Kurtit, De Wever theksoi se kontaktet ndërmjet dy qeverive janë shtuar në vitet e fundit, transmeton Klankosova.tv.
“Kontaktet politike ndërmjet dy qeverive tona janë shtuar në vitet e fundit dhe, pasi ju takova në New York në shtatorin e vitit të kaluar, ju mirëpritët ministrin tim të Punëve të Jashtme, z. Prévot, në Prishtinë në prill të këtij viti. Këto shkëmbime reflektojnë marrëdhëniet e shkëlqyera ndërmjet dy vendeve tona”, shkroi De Wever.
Duke vlerësuar bashkëpunimin aktual, kryeministri De Wever shprehu gatishmërinë për zgjerimin e tij, duke përmendur edhe rolin e mërgatës.
“Ju lutem, më lejoni të vlerësoj bashkëpunimin e shkëlqyer ndërmjet dy vendeve tona në fushat e policisë dhe gjyqësisë, sikurse përpjekjet tona të përbashkëta për të luftuar krimin e organizuar, një çështje që përbën shqetësim të madh për të dyja, Belgjikën dhe Kosovën. Shpresoj që do të kemi mundësi të zgjerojmë bashkëpunimin tonë më tej në fusha të tjera, përfshirë mbrojtjen dhe burgjet, gjithashtu duke thelluar lidhjet tona ekonomike, posaçërisht duke ndërtuar mbi lidhjet e forta njerëzore të krijuara nga diaspora”, vazhdoi ai.