Category: Lajme

  • Besa Famgas mposht Kastriotin në një superndeshje

    Besa Famgas mposht Kastriotin në një superndeshje

    Të dielën mbrëma në palestrën “Karagaçi” në Pejë, Besa Famgas fitoi ndaj Kastriotit të Ferizajt me rezultat 29:28.

    Skuadra pejane herët në ndeshje krijoi epërsi bindëse. Pjesa e parë përfundoi 16:12.

    Por ferizajasit nuk u dorëzuan dhe u afruan në 27:25 në minutën e 55-të. Më pas u afruan edhe në 28:27 në minutën e 57-të. Besa Famgas shënoi për 29:27 përmes Oliver Rabek në minutën e 59-të, ndërsa në minutën e fundit Kastrioti shënoi për 29:28 nëpërmjet Eray Karakoç. Por Besa e kishte aksionin e fundit dhe kështu fitorja i takoi kësaj skuadre.

    Deniz Terziqi i shënoi tetë gola për Besa Famgas. Shtatë i kishte Yassine Henahen e nga katër Jon Muqolli e Oliver Rabek.

    Vuk Lakiçeviq ishte më efikasi te Kastrioti me shtatë gola. Nga gjashtë i realizuan Karakoç e Festim Mustafa.

    Ishte kjo ndeshja e fundit e xhiros së tretë të Superligës së Kosovës.

    Besa Famgas e shënoi fitoren e tretë dhe udhëheqë me gjashtë pikë. Kastrioti ka një fitore e një humbje.

    Burimi: RTKLive

  • Policia e Kosovës me radio të sajën, ngjashëm mund të veprojnë edhe institucionet tjera

    Policia e Kosovës me radio të sajën, ngjashëm mund të veprojnë edhe institucionet tjera

    Deri më tani për punën e Policisë u raportua në media, tani një gjë të tillë do të mund ta bëjë vet ky institucion. Kjo pasi që Policia e Kosovës po synon ta hap “Radio Policia”, e kjo gjë po kritikohet nga profesorë dhe jurist të gazetarisë.

    Hapjen e një radio të tillë nga Policia po e shohin si model i “Radio KFOR-it”.

    “Ju informojmë se, Policia e Kosovës vite më parë ka filluar analizimin përmes grupit punues për radio të Policisë së Kosovës. Lidhur me këtë Policia e Kosovës ka konsultuar edhe partnerë ndërkombëtarë e vendor, përfshirë edhe modelin e radio KFOR-it që funksionon që nga paslufta në Kosovë, si dhe takime me disa radio të ndryshme në Kosovë, për procedurat e funksionimit dhe punës së tyre në transmetim të lajmit/informacionit. Andaj sipas planifikimeve e procedurave të parapara, PK-ja ka bërë analizë për radio të PK- së, me qëllim të promovimit të punës së policisë në komunitet dhe policia me qenë sa më afër qytetarëve për të adresuar shqetësimet e çështjet e sigurisë në bashkësi”.

    Një inciativë të tillë profesori Alban Zeneli e konsideron edhe si një hap që mund të shërbejë si ide për institucionet e tjera shtetërore.

    “Në parim ideja e Policisë së Kosovës është e gabuar për shkak të disa arsyeve, se pari si një agjenci e zbatimit të ligjit është agjenci shtetërore dhe rrjedhimisht nëse kërkesa e Policisë aprovohet nga KPM, secila agjenci përfshirë ministritë, do të hapte stacionet e veta. Është në kundërshti me logjijkën e tregut të lirë të mediave”.

    Sipas profesorit të gazetarisë, radiostacionet e tilla mund të krijohen vetëm në kohë trazirash.

    “Krahasimi me radio-KFOR, është krejtësisht I gabuar për shkak se RADIO KFOR është formësu nga misioni ushtarak I NATOS, për cka është themelu është për një komunikim emergjent gjatë luftës, ato arsye nuk ekzistojnë më, ashtu siç duhet të mos ekzistojë më as Radio KFOR”.

    Për këtë çështje ka ngritur kritika edhe juristja e mediave, Flutura Kusari, duke paralajmëruar për rrezikun e propagandës shtetërore, ndikimit politik dhe kostos financiare për buxhetin e vendit.

    Burimi: Dukagjini

  • Trump njofton për “paqe energjetike” mes Rusisë e Ukrainës, Zelensky: Lajm për mua

    Trump njofton për “paqe energjetike” mes Rusisë e Ukrainës, Zelensky: Lajm për mua

    Trump njofton për “paqe energjetike” mes Rusisë e Ukrainës, Zelensky: Lajm për mua

    Presidenti amerikan, Donald Trump, ka thënë se Rusia dhe Ukraina kanë arritur marrëveshje për një “armëpushim energjetik”, i cili hyn në fuqi “menjëherë”, duke shtuar se të dyja palët janë pajtuar me të.

    Rusia ende nuk ka reaguar, por mediumi amerikan Axios ka raportuar se presidenti ukrainas, Volodymyr Zelensky, e ka cilësuar njoftimin e Trumpit si “lajm për mua”, raporton BBC, transmeton Klankosova.tv.

    Më herët, Trump e kishte paralajmëruar Ukrainën që “të ndalojë me çdo kusht” sulmet ndaj rafinerive të naftës në Rusi.

    Ky zhvillim vjen në mes të përplasjeve në rritje mes Trumpit dhe Zelenskyt. Ky i fundit kishte deklaruar të dielën se Ukraina do të jetë “e gatshme të ndalojë sulmet ndaj rafinerive ruse të naftës, nëse Rusia i ndal sulmet ndaj infrastrukturës sonë energjetike”.

    Si Rusia, ashtu edhe Ukraina, i kanë shtuar sulmet ndaj infrastrukturës gjatë muajve të fundit, ndërsa lufta mes tyre po vazhdon në vitin e pestë, pas pushtimit në shkallë të gjerë të Ukrainës nga Rusia.

    Në ndërkohë, presidenti ukrainas, Volodymyr Zelensky, ka konfirmuar se e mbështet armëpushimin energjetik të shpallur nga Trump.

    “Ukraina e mbështet armëpushimin dhe është e rëndësishme që edhe Rusia ta mbështesë atë”, ka shkruar ai në X.

    “Jemi në pritje të detajeve nga pala amerikane”, ka thënë Zelensky.

    “Nga ana jonë, Ukraina i mbështet gjithmonë plotësisht hapat drejt uljes së tensioneve, mbrojtjes së jetëve dhe vendimeve të nevojshme për t’i dhënë fund luftës dhe për të garantuar paqe të qëndrueshme”. /Klankosova.tv

  • Seedorf do të jetë trajneri i ri i Corinthiansit

    Seedorf do të jetë trajneri i ri i Corinthiansit

    Seedorf do të jetë trajneri i ri i Corinthiansit

    Ish-mesfushori i njohur, Clarencee Seedorf do të ketë një mision të vështirë, pasi Corinthians po kalon një periudhë të vështirë në kampionatin brazilian dhe synon të largohet nga zona e rrezikut.

    Seedorf ka drejtuar më parë Milanin, Shenzhenin në Kinë, Deportivo La Corunan dhe përfaqësuesen e Kamerunit.

    Si futbollist, ai fitoi katër herë Ligën e Kampionëve me tri skuadra të ndryshme: Ajaxin, Real Madridin dhe Milanin. Me skuadrën italiane e fitoi trofeun në dy raste.

    Holandezi e njeh edhe futbollin brazilian, pasi në fund të karrierës si lojtar ishte pjesë e Botafogos.

    Tashmë, Seedorf pritet të nisë një kapitull të ri në karrierën e tij, këtë herë në krye të Corinthiansit.

  • Polonia arreston një person të dyshuar për planifikimin e atentatit ndaj kryeministrit Tusk

    Polonia arreston një person të dyshuar për planifikimin e atentatit ndaj kryeministrit Tusk

    Polonia arreston një person të dyshuar për planifikimin e atentatit ndaj kryeministrit Tusk

    Kryeministri i Polonisë, Donald Tusk, ka bërë të ditur se është arrestuar një person i dyshuar për planifikimin e një atentati ndaj tij dhe ministrit të Mbrojtjes.

    Ministria e Brendshme e vendit kishte raportuar më herët se policia kishte marrë informacione të besueshme për sulme të mundshme ndaj Tuskut dhe Wladyslaw Kosiniak-Kamysz, raporton BBC, transmeton Klankosova.tv.

    Shërbimet e sigurisë mbajtën një takim të jashtëzakonshëm të dielën, pasi morën informacione për sulmet e planifikuara. Një zëdhënës tha se zyrtarët po e trajtonin kërcënimin me “seriozitet maksimal”.

    Tusk falënderoi policinë për “veprimin e shpejtë dhe vendimtar” në arrestimin e të dyshuarit.

    I dyshuari, shtetas polak, u arrestua në rajonin e Silesisë së Poshtme, bëri të ditur për mediat lokale Jacek Dobrzynski, zëdhënës i Koordinatorit të Shërbimeve Speciale.

    “Në këtë rast, bëhet fjalë për një gjasë të lartë që këto kërcënime të mund të realizohen”, tha ai.

    Plani u zbulua pasi Shërbimi i Mbrojtjes së Shtetit, përgjegjës për sigurinë e ministrave, ia përcolli policisë një email që përmbante informacione për sulmin e mundshëm, tha Karolina Galecka, zëdhënëse e Ministrisë së Brendshme.

    Tusk është kryeministër i Polonisë që nga viti 2023, pasi e kishte mbajtur këtë detyrë edhe nga viti 2007 deri më 2014.

    Ai shërbeu si president i Këshillit Evropian nga viti 2014 deri më 2019. /Klankosova.tv

  • Ferizaj mposhtet edhe në ndeshjen e dytë nga VIF-i

    Ferizaj mposhtet edhe në ndeshjen e dytë nga VIF-i

    Në palestrën në Greme, Ferizaj pësoi me rezultat 28:17. Kështu, skuadra ferizajase ndalet në raundin e dytë të Kupës Evropiane për hendbolliste.

    Pjesa e parë ishte e fortë dhe përfundoi 11:11. Por në pjesën e dytë mysafiret shfaqën dukshëm më tepër.

    Edona Rogova i kishte nëntë pritje për Ferizajn. Më efikasja ishte Sevdanur Ozkan me gjashtë gola. Katër i kishte Elsa Kongjeli, kurse nga tri i realizuan Agnesa Hysa dhe Luna Gonçalves.

    Ndeshja e parë mes këtyre dy skuadrave u zhvillua të premten.

    Burimi: RTKLive

  • Kosova thyen rekord negativ me energjinë elektrike – Importi i rrymës trefishohet, qytetarët përballen me çmime të larta

    Kosova thyen rekord negativ me energjinë elektrike – Importi i rrymës trefishohet, qytetarët përballen me çmime të larta

    Kosova thyen rekord negativ me energjinë elektrike – Importi i rrymës trefishohet, qytetarët përballen me çmime të larta

    Kosova ka shënuar një rekord negativ në sektorin energjetik, duke arritur nivelin më të lartë të varësisë nga importi i energjisë elektrike në më shumë se dy dekada.

    Sipas të dhënave të Agjencisë së Statistikave të Kosovës (ASK), gjatë vitit 2025 importi neto i energjisë elektrike arriti në 1.612 gigavat-orë (GWh), pothuajse trefish më shumë krahasuar me vitin 2024, kur ishte 538 GWh.

    Kjo sasi përbën 29.2 për qind të konsumit të regjistruar të energjisë elektrike, duke shënuar nivelin më të lartë që nga viti 2002.

    Ndërkohë, prodhimi vendor ka pësuar rënie të ndjeshme. Termocentralet e Kosovës prodhuan 5.254 GWh energji elektrike, apo 15 për qind më pak se një vit më parë, duke shënuar nivelin më të ulët të prodhimit që nga viti 2008.

    Në anën tjetër, konsumi i energjisë elektrike ka vazhduar të rritet, duke arritur në 5.530 GWh. Vetëm amvisëritë konsumuan 3.393 GWh, që përbën rreth 61 për qind të konsumit të përgjithshëm.

    Një ndër sfidat kryesore mbetet vjetërsia e termocentraleve. Njësitë aktive të Kosovës A datojnë nga vitet 1970, ndërsa ato të Kosovës B nga vitet 1983 dhe 1984.

    Varësia nga importi ka ardhur edhe me kosto të lartë financiare.

    Sipas Ministrisë së Ekonomisë, çmimi mesatar i importit të energjisë elektrike ishte 46 euro për megavat-orë gjatë periudhës 2011–2020, ndërsa në vitet 2021–2024 arriti në 148 euro.

    Kjo situatë është reflektuar edhe në faturat e qytetarëve. Nga 1 maji 2025, Zyra e Rregullatorit për Energji miratoi rritjen e tarifave të energjisë elektrike për 16.1 për qind.

    Situata mbetet sfiduese edhe gjatë vitit 2026.

    Sipas bilancit të miratuar nga ZRrE-ja, gjatë këtij viti është parashikuar importimi i 2.158 GWh energji elektrike, ndërsa eksporti pritet të arrijë në 536 GWh.

    Po ashtu, remontet e planifikuara në termocentralin Kosova B parashohin ndërprerje të gjata të funksionimit të blloqeve, duke e shtuar nevojën për furnizim nga jashtë.

    Të dhënat tregojnë se kapacitetet aktuale prodhuese nuk janë të mjaftueshme për të mbuluar kërkesën e vendit, duke e lënë Kosovën të varur nga importi i energjisë elektrike.

    Sinjali – aty ku e vërteta flet para lajmit!

    /GazetaSinjali/

    The post Kosova thyen rekord negativ me energjinë elektrike – Importi i rrymës trefishohet, qytetarët përballen me çmime të larta appeared first on Sinjali.

    Burimi: Sinjali

  • Bashkimi Evropian për Planin e Rritjes: Afati i ardhshëm për raportim janari i 2027-ës

    Bashkimi Evropian për Planin e Rritjes: Afati i ardhshëm për raportim janari i 2027-ës

    Zgjedhja e presidentit të Kosovës u mirëprit nga Bashkimi Evropian.

    Por, përtej zhbllokimit institucional, sfida e radhës për shtetin, mbetet rikuperimi i kohës së humbur.

    Në kuadër të kësaj, përmes një përgjigje me shkrim për televizionin Dukagjini, BE përmendi edhe Planin e Rritjes nga i cili shteti pritet të përfitojë mbi 882 milionë euro.

    E pikërisht për shkak të kuvendit jofunksional për një kohë të gjatë, shtetit të Kosovës, sipas BE-së, i ka skaduar afati për zbatimin e 13 nga 63 hapave, për reforma në qershor të këtij viti.

    Kësisoj, Kosova në korrik dorëzoi kërkesën e saj të parë zyrtare për disbursim, e cila aktualisht po shqyrtohet.

    “Ashtu si të gjithë përfituesit e tjerë të Instrumentit për Reforma dhe Rritje, Kosova rrezikon të humbasë fondet nëse nuk përmbush një hap brenda periudhës shtesë të lejuar. Kjo periudhë ka përfunduar në fund të qershorit 2026 për 13 nga 64 hapat, përkatësisht për ata që fillimisht ishin paraparë të përmbusheshin në qershor 2025. Shërbimet e Komisionit Evropian janë duke e vlerësuar aktualisht këtë kërkesë. Afati i ardhshëm për raportim do të jetë në janar 2027, kur përfundon periudha shtesë e lejuar për hapat që fillimisht ishin paraparë për dhjetor 2024 dhe dhjetor 2025”.

    Ndërkohë, në institucionet tashmë të konsoliduara, thonë se nuk ka më pengesa për të vazhduar me reformat.

    Ministrja e Tregtisë, Mimoza Kusari-Lila, thotë se ministrië mund të nisin punën në përmbushjen e objektivave që lidhen me Planin e Rritjes.

    “Në ministrinë që drejtoj, e kemi prezantu në lexim të parë ligjin për ndërmarrësi dhe inevstime, është një prej objektibvave në kuadër të Planit të Rritjes, e cila duhet të miratohet në lexim të dyte deri në fund të dhjetorit, tashmë nuk shohim asnjë problem që kjo të procedojë pa asnjë pengesë”.

    Ndërsa, drejtori i Këshillit të Investitorëve Evropianë në Kosovë, Emrush Ujkani, konsideron se institucionet duhet që sa më shpejtë të fillojnë punën, në mënyrë që të përfitojnë maksimalisht nga Plani i Rritjes.

    “Isntitucionet e tona duhet të gjitha bashkarishjt të bëjënë gjithcka që të përfitojnë maksimalisht, Nuk kemi kohë për të humbur, dhe institucionet e vendit, shoqëria, kanë nevojë shumë për këtë mbështetje”.

    Sipas Bashkimit Evropian, më 16 prill 2026, Komisioni Evropian ka lëshuar 61,8 milionë euro në formë të financimit paraprak për Kosovën, në kuadër të Instrumentit për Reforma dhe Rritje. Kjo erdhi pas ratifikimit të Marrëveshjeve për Instrumentin dhe për Huamarrjen nga Kosova, në fillim të muajit shkurt.

    Burimi: Dukagjini

  • Çka shkruan në opinionet ligjore të ministrive për ndryshimet e ligjit të Gjykatës Speciale?

    Çka shkruan në opinionet ligjore të ministrive për ndryshimet e ligjit të Gjykatës Speciale?

    Para se të procedohej nga Qeveria për në Kuvend për votim për ndryshimet e propozuara për ligjin për Dhomat e Specializuara për Kosovën u dhanë tri opinione nga departamentet përgjegjëse.

    Opinioni i parë është ai i ministrisë së Drejtësisë, e cila kishte thënë se duke pasur parasysh që ligjit lidhet me Kushtetutën, duhet vlerësim i mëtejm nga Kuvendi.

    “Duke marrë parasysh natyrën e veçantë kushtetuese dhe ndërkombëtare të materies që synohet të rregullohet, vlerësojmë se Projektligji kërkon vlerësim të mëtejshëm të specializuar në kuadër të Kuvendit të Republikës së Kosovës, ku edhe është ndërmarrë nisma legjislative në fjalë.”

    Një tjetër opinion, por që flet për implikimet financiare, është ai i departamentit të buxhetit në kuadër të Ministrisë së Financave.

    Këshilli Gjyqësor e ai Prokurorial që vazhdimisht ankohen për mungesë të buxhetit të mjaftueshëm, mund të ballafaqohen me shpenzime shtesë, për zbatimin e këtij ligji.

    “Ky projektligj do të zbatohet nga Këshilli Gjyqësor i Kosovës (KGJK), përkatësisht Departamenti Special i Gjykatës Themelore, Apelit ose Supremes në Prishtinë dhe nga Këshilli Prokurorial Kosovës (KPK) përkatësisht nga Prokuroria Speciale e Republikës së Kosovës. Ndarjet buxhetore të planifikuara me Ligjin me Nr.10/L-001 mbi Ndarjet Buxhetore për Buxhetin e Republikës së Kosovës për KGJK -në dhe KPK-në për vitin 2026 dhe vlerësimet për vitet 2027-2028 janë në shumë të përgjithshme prej 181,079,607 euro, të shpërndara për vite, numër të punëtorëve dhe kategori.”

    Në këtë dokument thuhet se çdo kosto shtesë që rrjedh si rezultat i obligimeve ligjore nga zbatimi i këtij ligji duhet të adresohet në planifikimet e rregullta buxhetore.

    I fundit dokument i renditur që flet për ndryshimet e propozuara, është ai i zyrës së kryeministrit e që është i fokusuar në përputhshmërinë me legjislacionin e BE-së.

    “Projektligji për ndryshimin dhe plotësimin e Ligjit Nr.05/L-053 për Dhomat e Specializuara dhe Zyrën e Prokurorit të Specializuar synon të krijoj mekanizma të strukturuar institucionalë, kornizë të qarta juridiksionale, të ruaj garancitë e gjykimit të drejtë, paanshmërinë gjyqësore dhe sundimin e ligjit bazuar në aktet ligjore të së drejtës ndërkombëtare dhe të BE-së për pavarësinë gjyqësore dhe drejtësinë penale.”

    Ndryshimet ligjore të ligjit për Dhomat e Specializuar për Kosovën, kaluan të martën në lexim të dytë, në Kuvendin e Kosovës.

    Burimi: Dukagjini

  • Liverpool mposhtet në Anfield nga Manchester City

    Liverpool mposhtet në Anfield nga Manchester City

    Liverpool mposhtet në Anfield nga Manchester City

    Liverpool është mposhtur në shtëpi nga Manchester City në kuadër të xhiros së gjashtë të Premierligës.

    “The Reds” pësuan humbje në Anfield me rezultat 0-3.

    Ndeshja ishte e ekuilibruar deri në minutën e 62-të kur Gravenberch u përjashtua nga loja pas dy kartonëve të kuq.

    Haaland hapi llogarinë e golave në minutën e 65-të të takimit, kurse Doku e dyfishoi epërsinë në minutën e 68-të të ballafaqimit.

    Epilogun takimit ia vendosi Cherki me golin e tij të shënuar në minutën e 78-të.

    Pas këtij takimi, Liverpool pozicionohet në vendin e 9-të në tabelë, me 9 pikë, kurse City prin tabelën me 18 pikë të arkëtuara.